ءبىز ۇمىتشاق حالىقپىز... وتكەنىمىزدى تەز ۇمىتىپ ۇلگىرمەستەن، بۇگىنىمىزدى دە باعدارلاي الماي جاتامىز. كىم ايتقانى ەسىمدە جوق: «ءبارىن كەشىرۋگە بولادى، كەمشىلىك – تۇزەلەر، ولقىلىق – تولار، دەگەنمەن، كەشەگىسىن بۇگىن، بۇگىنگىسىن ەرتەڭ ۇمىتاتىن ادامداردى (حالىقتى) ءوزى كەشىرسە دە، ۋاقىت كەشىرمەيدى»، – دەپتى. ءبىزدىڭ بويداعى وسى ۇمىتشاقتىق، ءوزىمىزدى ۇمىتا ءجۇرىپ، وزگەنى ۇلىقتاۋعا قۇمارلىق دەرتى كوپتەگەن ءىسىمىزدىڭ كەرى كەتۋىنە سەبەپكەر. ايتپەسە، ۇمىتۋعا بولمايتىن وقيعالار، زامانالار كوز جاسى، سونداي زۇلمات كەزەڭدە ءومىر سۇرگەن تاريحي تۇلعالار بىزدە جەتەرلىك. ءبىرىن بىلسەك، ەكىنشىسىن ۇمىتىپ، ەكىنشىسىن تانىساق، ءۇشىنشىسىن ىزدەۋسىز قالدىرىپ جاتامىز. ءبىزدىڭ بۇگىنگى كەيىپكەرىمىز، بەلگىلى مەسەنات، تالاي يگىلىكتى ىستەردىڭ ۇيىمداستىرۋشىسى بولىپ جۇرگەن، ەل مەن جەر ءۇشىن ايعاي-شۋسىز، تازا نيەتپەن ەڭبەك ەتكەن، ەڭ باستىسى، حالىق ساناسىن وتارسىزداندىرۋعا بار كۇش-قايراتىن سارقىپ جۇرگەن تۇلعا – قۋات ەسىمحانوۆ.
ءبىزدىڭ انىقتاما
قۋات ەسىمحان ۇلى ەسىمحانوۆ
1952 جىلى دۇنيە ەسىگىن اشقان.
ءار جىلدارى اقسۋ قالاسىنىڭ اكىمى، پەتروپاۆل وبلىسى، شىعىس قازاقستان وبلىسى اكىمىنىڭ ورىنباسارى بولدى. «ازىق-تۇلىك كەلىسىمشارت كورپوراسياسى» اق-نىڭ ۆيسە-پرەزيدەنتى، «قازاۆتوكولىك» اق-نىڭ پرەزيدەنتى، قازاقستان تەمىرجولى سالاسىندا باسشىلىق قىزمەتتەردە بولدى. ءقازىر استانادا قازاقستان تەمىرجولى «تەمىرجولجىلۋ» اق-نىڭ پرەزيدەنتى. ق ر ەڭبەك سىڭىرگەن مادەنيەت قايراتكەرى، «قۇرمەت» وردەنىنىڭ يەگەرى، ق ر «قۇرمەتتى تەمىرجولشىسى»، اقسۋ قالاسىنىڭ قۇرمەتتى ازاماتى.
وتارشىلدىق دەرتى...
تاۋەلسىزدىك بىزگە تاۋەلدىلىكتەن قۇتىلۋ ءۇشىن بەرىلدى. ءيا، ەلدىڭ تاۋەلسىزدىگى، جەردىڭ قوجاسىنىڭ كىم ەكەنى، شەكارانىڭ بەكىتىلۋى، ەكونوميكانىڭ ەركىندىك الىپ، نارىققا بەيىمدەلۋى، دۇنيە-مۇلىكتىڭ جەكەنىڭ قولىنا ءوتۋى – بۇل مەملەكەتتى نىعايتاتىن نەگىزگى فاكتورلار. ايتكەنمەن، ءبىر ەلدىڭ تولىققاندى تاۋەلسىز بولۋى ءۇشىن سول ەل حالقىنىڭ ساياسي-ەكونوميكالىق جاقتان عانا ەمەس، رۋحاني تۇرعىدان تاۋەلسىز بولۋى باستى شارت. ونسىز تاۋەلسىزدىك – تاۋمەندىلىكتىڭ ەكىنشى اتاۋى عانا ءبولماق-دۇر.
رۋحاني تاۋەلسىزدىك – سانانى وتارسىزداندىرۋ. ونى جۇيەلى جۇرگىزبەگەن حالىقتىڭ كەشەگى بوداندىق شەكپەنىن ءالى اڭسايتىنى، ءوزىنىڭ ەركىندىگىن قورعاۋدان بۇرىن، وزگەنىڭ پارمەنىمەن جۇرگەن كەزىن كوكسەپ، سوعان ەمىرەنىپ، سول ءۇشىن قىزمەت ەتەرى بۇگىنگى كوپتەگەن جايتتاردان بەلگىلى بولىپ وتىر.
تاۋەلسىزدىك جىلدارىن كوپ ادامدار «توي تويلاۋمەن» وتكىزىپ ءجۇرمىز دەپ سىناپ جاتادى. مەنىڭشە، بۇلاي دەۋ قاتە پىكىر. تاريحي تۇلعالار مەن وقيعالاردىڭ مەرەيلى نەمەسە اتاۋعا ءتيىس جىلدارىن ەسكە الۋ، سول ارقىلى بۇگىنگى ۇرپاق ساناسىندا ۇلتتىق قۇندىلىقتار مەن ۇلى ەسىمدەردى جاڭعىرتۋ كۇنى كەشە بوداندىق قامىتىن كيگەن ءار ەل ءۇشىن ماڭىزدى قادام. مۇنداي تاجىريبەدەن ءبىز عانا ەمەس، ءبىر كەزدەرى وتارلىقتىڭ قامىتىن كيگەن كەز كەلگەن مەملەكەت وتكەن.
بىزدە تاۋەلسىزدىك تۇسىندا وسى جولمەن جۇردىك. بۇعان كەلتىرەر مىسال كوپ. سونىڭ كوبى اكىمشىلىك قۇرىلىمداردىڭ جانە مەملەكەتتىڭ ىقپالىمەن جاسالدى. مۇنداي شارالاردى قوعامدىق بەلسەندىلەر مەن مەسەناتتار بىرىگىپ اتقارسا، اناعۇرلىم اۋقىمدى ءارى ماعىنالى بولارى داۋسىز.
جوق، ۇمىتۋعا بولمايدى!
وسى سالادا ايانباي ەڭبەك ەتكەن ازاماتتىڭ ءبىرى ءھام بىرەگەيى – قۋات ەسىمحانوۆ. ەسىمحان ۇلىنىڭ تىنىمسىز ەڭبەگىن شولىپ وتىرىپ، تاسادا قالعان تالاي تاعدىر يەسىنىڭ ءوز بيىگىنە ورناۋىنا ولشەۋسىز ۇلەس قوسقانىن بىلەر ەدىڭىز.
بۇعان كۇللى الاشقا اتى ءمالىم كەمپىرباي، ايگىلى «قورلان» ءانىنىڭ اۆتورى، قازاق ءان ونەرىنە ەرەكشە مانەرمەن جاڭالىق ەنگىزگەن ەستاي، سەگىز سەرى، قوجابەرگەن جىراۋ، جازۋشى ءسابيت دونەنتايەۆ، الاششىل تۇلعا وتىنشى ءالجانوۆ، ساكەن سەيفۋليننىڭ تۇياعى، اۋىر ازاپ جولىندا شەتىنەگەن ايان ساكەن ۇلى سەكىلدى وننان استام تاريحي ەسىمدەردىڭ حالىق جادىندا قايتا جاڭعىرۋىنا ىقپال ەتۋىن اتاۋعا بولادى. ءبىرىنىڭ باسىنا ەسكەرتكىش تۇرعىزسا، ەندى بىرىنە ەسكەرتكىش تاقتا ورناتۋعا مۇرىندىق بولدى. ءبىرىنىڭ كىتابىن شىعارىپ، اس بەرىپ، تۋىس-تۋعاندارىن جيناپ، كۇللى قازاق زيالىلارىنىڭ باسىن قوسىپ، ۇمىتىلماس شارا وتكىزسە، تاعى بىرىنە اقىندار مەن جازۋشىلاردى ۇيىمداستىرىپ، سوزدەن ولمەس ەسكەرتكىش قويعىزدى. بۇلاردىڭ كوبىن ەل بىلگەنىمەن، زيراتى قايدا ەكەنىن ۇمىتا باستاعان ەدى. ءبىرىن زامانى داۋىلى جاسىرسا، ەندى ءبىرىن ءوزىمىز ەسكەرۋسىز قالدىرعامىز. وسى ولقىلىقتىڭ ورنىن تولتىرۋ جولىنا ءدال ەسىمحانوۆتاي ەڭبەك ەتكەن ازاماتتار نەكەن-ساياق.
كۇلاش پەن قانابەك بايسەيىتوۆتەردىڭ ەلگە بارا جاتىپ، دەمالىپ، داستارقان جايعان جەرىنە دە ەسكەرتكىش-تاقتا ورناتىپ، قۇران وقىتىپ، دۇعا باعىشتاعانى ۇلى كوريفەيلەر الدىنداعى ۇلتتىق پارىز دەسەك تە بولاتىنداي. ەسىمحانوۆ الەمىنە ۇڭىلسەڭىز، مۇنداي يگى شارالاردىڭ كوبىنە ءوزى باستاماشى بولعانىن بايقايسىز.
ءقازىر ءوزىنىڭ اتا-باباسىن، رۋلاسىن، جەرلەسىن ىزدەپ، باتىرلارىن تانىتىپ، ءوز الىنشە ەڭبەك ەتىپ جاتىر. بىرىنىكى وڭدى ءىس بولسا، ەكىنشىسىنىكى وزگەدەن قالماۋ، ياكي ءوز اتىن شىعارۋ مۇعدارىنداعى ءىس. قاجەت ەمەس دەمەيمىز، دەسە دە، كەيدە وسىنداي شارالاردىڭ رۋح قايراۋ ءۇشىن ەمەس، رۋ جارىستىرۋ ناۋقانىنا اينالىپ كەتەتىنىن نەسىن جاسىرالىق!
قۋات اعا ەسىمحانوۆ مۇنداي داڭعازالىققا بوي الدىرماعان. مۇنى ءتۋابىتتى مىنەزى مەن ۇلتتىق قۇندىلىققا رۋلىق شەڭبەردەن قارامايتىن پاراسات-پايىمى ارقىلى جۇزەگە اسىرىپ وتىر دەۋگە بولادى. ايتپەسە، ەسىمحانوۆ وسكەن وڭىرىنەن ۇزاماي-اق، ءبىز ءالى ەسكەرمەي جۇرگەن تالاي تۇلعانىڭ وبرازى «شاڭ باسقان ارحيۆتەردەن» ارشىپ الار ەدى.
اجەنىڭ ەرتەگىن، تۇگەمەس اڭگىمەسىن، تۋىپ-وسكەن ولكەدەگى جىراۋلار جىرىن تىڭداعان، اناسىنىڭ ىزەتتى، ىزگىلىكتى ويلارىن تانىمىنا شەگەلەگەن ازاماتتاردىڭ قاي-قايسىسى دا بولاتتاي بەرىك، ادۋىن كەلەتىنى وسى قۋات ەسىمحانوۆ سەكىلدى اعالاردىڭ بويىنان مەنمۇندالاپ تۇرادى.
ەسىمحانوۆتىڭ مۇنداي ويلى جۇمىسىنا تۇرتكى بولعان دۇنيە – ءبىلىمدارلىعى، ءسوز تۇسىنەتىن ءارى ءسوز سىيلاي بىلەتىن ەرەكشەلىگى دەسەك، قاتەلەسپەسپىز.
بالا كەزىنەن ءان مەن جىرعا، تولعامالى، تولعامدى كۇيگە قانىپ وسكەن زەرەك جاستىڭ ەرجەتە كەلە ەل ىسىنە ارالاسقاندا ەڭ الدىمەن الاش ۇراندى ازاماتتاردى ىزدەۋى، سولاردىڭ ەسىمىن ۇلىقتاۋدى قولعا العانى زاڭدىلىق.
ءوزىنىڭ ەستەلىكتەرىنىڭ بىرىندە اناسىمەن بىرگە سەمەيدەگى ەت كومبيناتىنىڭ قاسىنان ءوتىپ بارا جاتقان كەزدەگى اراداعى اڭگىمە ايتىلادى. جاستايىنان قۋات ۇلىن ۇلتىنىڭ ايماڭداي ازاماتتارىنىڭ ەسىمدەرىنە قانىقتىرىپ وسىرگەن اياۋلى انا كوزىنە جاس الىپ: «ە، بۇل دالادا قانشاما ارىستاردىڭ تاعدىرى تالكەككە ۇشىرامادى دەيسىڭ. مىنا ماڭدا كەمپىربايدىڭ سۇيەگى جاتىر... تالاي ازامات ەسكەرۋسىز قالدى-اۋ...» دەپ كۇرسىنىپتى. انا كوڭىلىن ارىدان بولجاعان ەسىمحانوۆ كەيىن نار كەمپىربايعا ارناپ ەسكەرتكىش ورناتىپ، ەلدى جيىپ اس بەرىپ، ازاماتتىق پارىزىن ورىندادى.
انا دەمەكشى، بالا كەزىندە قۋات ەسىمحانوۆقا ابزال جاننىڭ ايتقان مىنا ءبىر ءسوزى ءار انا بالاسىنا ەسكەرتۋگە ءتيىس ماڭىزدى ءتۇيىن دەۋگە بولادى. ءتىپتى ءار شاڭىراقتىڭ تورىنە ءىلىپ قويسا دا ارتىقتىق ەتپەس دەيمىز. جاستايىنان اكەدەن ايىرىلىپ، قامكوڭىل وسكەن بالاعا: «ءار جىگىتتىڭ ىشىندە سىرعاۋىل بولادى. سول سىرعاۋىل مايىسسا ەشقاشان تۇزەلمەيدى. سەن اللادان وزگە ەشكىمگە قارىز ەمەسسىڭ! ەڭسەڭدى تىك ۇستا»، – دەگەن ەكەن. بۇل – انا ءسوزى! انا سوزىنەن ءقادىرلى ءسوز بولسىن با؟!.
[caption id="attachment_20794" align="alignright" width="361"]
قۇلاتىلعان ەرماك ەسكەرتكىشى[/caption]
ەرماكتى تۇعىرىنان تايدىرۋ
قۋات ەسىمحانوۆتىڭ ەسىمىن ەلگە تانىتقان وقيعانى قازىرگى وقىرمانداردىڭ كوبى ەسكەرمەۋى مۇمكىن. اسىرەسە، 1980 جىلدارى ەرماك قالاسىندا جاۋاپتى قىزمەت اتقارىپ جۇرگەن جىلدارىندا قۋات ەسىمحانوۆتىڭ ەسىمى اۋداننان اسىپ، رەسپۋبليكاعا جايىلا باستادى. ەرماك قالاسىنداعى ۇلتارالىق تەڭسىزدىكتى قوعامدىق تالقىعا سالىپ، بىردە ءبىر قازاق بالاباقشاسى جوق ەكەنىنە نازار اۋدارتتى. سىرەسكەن، قاسارىسقان جۇيەمەن بەتپە-بەت كەلگەن ول تىنباي ءجۇرىپ، وزدەرىنىڭ تۇرعىلىقتى حالىققا جاساعان قىسپاعىن زاڭ اياسىندا ءارى حالىقتى ۇيىستىرۋ ارقىلى دالەلدەپ، شوۆينيستىك پيعىلداردى جەڭە ءبىلدى. سول ارقىلى اۋدان كولەمىندە ءقازاقتىلدى بالاباقشالاردىڭ اشىلۋىنا ىقپال ەتكەن سوڭ، سول وڭىردەگى ءتيىستى ارحيۆتەردى كوتەرىپ، قازاق دالاسىنا ەرماكتىڭ قانداي قاتىسى بارلىعىنا كوز جەتكىزگىسى كەلەدى. ءبىراق بۇل وڭاي شارۋا ەمەس ەدى. اكادەميك ماناش قوزىبايەۆقا ارنايى جولىعىپ، ەرماكتىڭ ءومىرىن، قايدا تۋىپ، قايدا ولگەنىن انىقتاۋعا ۇسىنىس جاسايدى. اكادەميك ءوزىنىڭ رەسەيدەگى دوستارى ءارى تىنىمسىز ەڭبەگى ارقىلى ەرماكتىڭ باتىر ەمەس، قانىشەر، باسكەسەر بولعانىن، ونىڭ قازاق تاريحىنا ەش قاتىسى جوق ەكەنىن انىقتايدى. ونىڭ ومبى ماڭىنداعى تارسك قالاسىندا ومىردەن وتكەنى دە كوپ وتپەي بەلگىلى بولادى. سول كەزدە اۋدان باسشىلىعى قىزمەتىندە جۇرگەن ەسىمحانوۆ اۋدان اتىن وزگەرتۋ ۇسىنىسىن جاساپ، جۇرتتى تاعى دا وزىنە قاراتادى.1993 جىلى ەرماك اۋدانى اقسۋ بولىپ وزگەرتىلدى. بۇل ايتۋعا وڭاي، ىستەۋگە قيىن شارۋا ەدى. ەرماكتىڭ ەسكەرتكىشىن تاعىنان تايدىرۋدىڭ قانشالىقتى شۋ تۋدىرعانىن وسى كۇنى اڭىز رەتىندە قابىلدايتىندار بار. ونى قۇلاتپاق تۇگىل، ماڭىنا جولاتۋعا قارسى بولعان يمپەرياشىل پيعىلدار قاسارىسىپ باقتى. ءبىراق ەسىمحانوۆ باستاعان توپ بار كۇشىن سالىپ، الىپ ەسكەرتكىشتى بالتالاپ تاستاعانى تاۋەلسىزدىك تاريحىنداعى ايرىقشا وقيعالاردىڭ ءبىرى دەۋگە تولىق قۇقىمىز بار. ەسىمحانوۆتىاو وڭىردەگى قازاق ۇلتشىلدارى قولدادى ءارى وسى وقيعادا قازاقتاردىڭ جەڭىسكە جەتۋىن تىلەگەن ەلدە شەك بولمادى.
ەگەر وسى وقيعا وزگە مەملەكەتتەردە ىسكە اسقان بولسا، ەرماك ەسكەرتكىشىن قۇلاتۋ بارىسى تۋرالى دەرەكتى فيلمدەر ءتۇسىرىلىپ، وتارشىلدىقپەن كۇرەس تاريحىنداعى باستامالاردىڭ ءبىرى رەتىندە دارىپتەلەر ەدى. مۇنداي وقيعالاردى دا ۇمىتۋعا بولمايدى. ەگەر ەسىمحانوۆتىڭ قايسارلىعى ءار وڭىردەگى اۋدان، ايماق قىزمەتكەرلەرىندە بولعاندا، ءبىز تالاي سوۆەتتىك كوسەمدەر مەن يمپەريانىڭ جۇرەك سىزداتار بەلگىلەرىنەن الدەقاشان ازات بولعان بولار ەدىك-اۋ...
سول كەزدەرى پرەزيدەنت نازاربايەۆتىڭ ءوزى ەسىمحانوۆتاردى ىشتەي قولداپ، «ازاماتتار، مىقتى بولىڭدار!» دەگەن دەسەدى.
[caption id="attachment_20795" align="alignright" width="488"]
قازاقستان قالالارى كارتاسى[/caption]
قايران دا ءبىزدىڭ قىزىلجار...
سولتۇستىك قازاقستان وبلىسىنا قاجىمۇرات ناعمانوۆ وبلىس اكىمى بولىپ بارعاندا جەرگىلىكتى اۋزى دۋالى كىسىلەردىڭ ءبىرى اكىمگە ءبىر سۇراق قويىپتى دەسەدى. «بۇرىنعى اكىم بىزگە كەلگەندە ءبىر ۆاگون كومانداسىن ەرتىپ كەلىپ ەدى. ءسىز قانشا ۆاگون كادر اكەلەسىز؟».
توسىننان قويىلعان سۇراققا ەش ىركىلمەستەن جاۋاپ بەرگەن اكىم: «مەن ءبىر ۆاگونعا تاتيتىن ءبىر-اق ادام اكەلەمىن. ونى كەيىن بىلەسىڭدەر»، – دەگەن ەكەن.
سول ءبىر ۆاگونعا تاتيتىن ازامات ءبىزدىڭ كەيىپكەرىمىز قۋات ەسىمحانوۆ ەكەنىن جۇرتشىلىق كەيىن ءبىلىپتى. وسى كەزگە دەيىن ناعمانوۆ پەن ەسىمحانوۆ بىرلەسىپ ىستەگەن يگى جۇمىستار تۋرالى ءوڭىر حالقى تەك قانا ساعىنىشپەن ەسكە الادى.
پەتروپاۆل قالاسىنىڭ كوركەيۋى، ءوڭىر تۇرعىندارىنىڭ الەۋمەتتىك جاعدايىنىڭ جاقسارۋى، بيزنەس پەن كاسىپكەرلىكتىڭ دامۋىنا قوسقان ۇلەستەرىن ايتپاعاننىڭ وزىندە وسى ءوڭىردىڭ قازاقىلانۋىنا، بايىرعى اتاۋلارىنىڭ قايتا تۇلەۋىنە ەسىمحانوۆتىڭ قوسقان ۇلەسى ۇشان-تەڭىز. تاريحي تۇلعالاردىڭ ەسىمىن مەكتەپ، كوشەلەرگە بەرىپ، ولاردىڭ ءومىرى تۋرالى زەرتتەتىپ، وڭىردەگى قازاقتاردىڭ ەڭسەسىن كوتەرۋگە قولىنان كەلگەننىڭ ءبارىن جاسايدى.
سول كەزدە ەسىمحانوۆ ءوزى باس بولىپ بۇل جەردە ابىلاي حان ورداسىنىڭ بولعانىن ناقتى ايعاقتارمەن دالەلدەگەن. ماسكەۋدەگى سىرتقى ىستەر مينيسترلىگىنىڭ جەر تولەسىندەگى قۇپيا ارحيۆتەردى ءوزى بارىپ اقتارىپ، ابىلاي حان ورداسىنىڭ سمەتالىق-جوباسىن كورىپ، ارنايى ەلگە اكەلەدى. ودان بولەك، وڭىردەگى قازاق تاريحىنا بەلگىلى ەرەن تۇلعالاردىڭ ەسىمىن ۇلىقتاپ، ولاردى ناسيحاتتاۋعا دا ءبىر كىسىدەي ەڭبەك سىڭىرەدى. قىزىلجار دەگەن اتاۋدى ءجيى اتاپ، بازارعا، ءىرى ساۋدا ورىندارىنا، ەڭ باستىسى حالىق كوپ جيىلاتىن ورىندارعا قىزىلجار ەسىمىن بەرە باستايدى. ءتىپتى، سوناۋ كەڭەس كەزىندە ءوڭىردىڭ اتاۋىن قىزىلجار دەپ وزگەرتۋ تۋرالى ناقتى شەشىم قابىلدانعان قۇجات بارىن انىقتاپ، پەتروپاۆلدى قىزىلجار دەپ وزگەرتۋ ۇسىنىسىن ءوزى قولىنا الادى.
امال نەشىك، سول كەزدەرى ساياسي دارمەنسىزدىك پەن دەپۋتاتتاردىڭ بۇلعالاق تىرلىگى وسى ىسكە شەكتەۋ قويدى. سونداعى دەپۋتاتتاردىڭ ايتقان ءۋاجى: «انا حالىقتان ۇيات بولادىعا» سايىپتى. ەسىمحانوۆ بۇل بايلامعا كۇيىنىپ:«انا حالىقتىڭ كوڭىلىن ويلايتىندار كوپ ەكەن. مىنا حالىقتىڭ كوڭىلىن نەگە ويلامايدى؟!» دەپ كۇيىنگەنىن كورگەن جۇرت ءالى كۇنگە ايتادى...
ەگەر ەسىمحانوۆ باستاعان ءىس جۇزەگە اسسا، ءالى كۇنگە سولتۇستىكتەگى كورشىنىڭ ۋاقىتىمەن ۇيىقتاپ، سول ۋاقىتپەن وياناتىن ءوڭىردىڭ اتاۋى الدەقاشان قازاقشالانار ەدى.
بۇل دا ءبىر كەم دۇنيە.
ءتۇيىن:
ەسىمحانوۆ تۋرالى ايتار اڭگىمە مۇنىمەن تۇگەسىلمەيدى. ەل ءۇشىن ايعايسىز-اق ابىرويلى ءىس اتقارعان تۇلعانى جۇزبە-جۇز كورمەسەك تە، ىستەگەن ەڭبەكتەرىن جاستايىمىزدان ەستىپ وستىك. ءبىزدىڭ ماقسات – ەل الدىندا تىك سويلەپ، بۇگەجەكتەمەي، «سىرعاۋىلىن» مايىستىرماي جۇرگەن ازاماتتاردىڭ كوپ بولۋىنا عيبراتتىق تۇلعالاردى كەڭىرەك تانىستىرۋ. ول ءبىر ماقالانىڭ جۇگى ەمەس. قۋات ەسىمحانوۆ – بۇگىنگى جاس شەندىلەر مەن «كرەاتيۆتىلىكتى ۇناتاتىن» شەكپەندىلەر ءۇشىن ۇلگى تۇتۋعا ابدەن لايىق تۇلعا. قالاداعى ەرماكتاردان قۇتىلعانىمىزبەن، ساناداعى ەرماكتاردان ءالى قۇتىلا الماي جۇرگەنىمىزدى كەيدە امالسىز مويىندايمىز. ەندىگى لەكتىڭ – جاستاردىڭ جۇمىسى سول بولۋعا ءتيىس!
ايالدار كۇنتۋعان
