دەپۋتاتتار پرەزيدەنت تۋرالى، قۇرىلتاي تۋرالى جانە ونىڭ دەپۋتاتتارىنىڭ مارتەبەسىنە قاتىستى زاڭ جوبالارىن قولدادى، دەپ حابارلايدى Dala News.
بۇل قۇجاتتار رەسپۋبليكالىق رەفەرەندۋمدا قابىلدانعان كونستيتۋسيا نورمالارىن ناقتىلاۋعا باعىتتالعان.
ءماجىلىس دەپۋتاتى سنەجاننا يماشيەۆانىڭ ايتۋىنشا، پرەزيدەنت تۋرالى زاڭ جوباسى مەملەكەت باسشىسىنىڭ مارتەبەسى مەن وكىلەتتىگىن ايقىندايدى.
«كونستيتۋسيالىق زاڭ جوباسى پرەزيدەنت پەن ۆيسە-پرەزيدەنتتىڭ قۇقىقتىق مارتەبەسىن ايقىندايدى. زاڭ جوباسى سەگىز ءبولىم مەن 43 باپتان تۇرادى»، – دەدى ول.
اتالعان زاڭ جوباسى ماجىلىسكە پرەزيدەنتتىڭ ارنايى جولداۋى ارقىلى زاڭنامالىق باستاما رەتىندە ەنگىزىلگەن.
زاڭ جوبالارىن ودان ءارى قاراۋ ءۇشىن ءماجىلىس پەن سەنات دەپۋتاتتارىنان بىرلەسكەن كوميسسيا قۇرىلدى. كوميسسيا قۇرامىنا ءبىرقاتار دەپۋتات ەنگىزىلىپ، ولار قۇجاتتاردى پىسىقتاۋمەن اينالىسادى.
سونىمەن قاتار ءماجىلىس قۇرىلتاي تۋرالى كونستيتۋسيالىق زاڭ جوباسىن دا قابىلدادى. بۇل قۇجات قۇرىلتايدىڭ قىزمەتىن ۇيىمداستىرۋ جانە ونىڭ دەپۋتاتتارىنىڭ قۇقىقتىق مارتەبەسىن بەلگىلەۋگە باعىتتالعان.
«زاڭ جوباسى قۇرىلتايدىڭ قىزمەتىن ۇيىمداستىرۋدى قۇقىقتىق تۇرعىدان رەتتەۋگە، سونداي-اق ونىڭ دەپۋتاتتارىنىڭ قۇقىقتىق مارتەبەسىن ايقىنداۋعا باعىتتالعان. زاڭ جوباسى 12 ءبولىم مەن 60 باپتان تۇرادى»، – دەدى يماشيەۆا.
وسىلايشا، قابىلدانعان زاڭ جوبالارى ەلدەگى كونستيتۋسيالىق رەفورمالاردى ىسكە اسىرۋعا جانە مەملەكەتتىك ينستيتۋتتاردىڭ قۇقىقتىق نەگىزىن ناقتىلاۋعا باعىتتالعان.
