قازاقستاننىڭ كاسىبي بوكس فەدەراسياسىنىڭ پرەزيدەنتى راحىمجان ەردەنبەكوۆ باسى داۋعا قالعان جانىبەك ءالىمحان ۇلىنىڭ دوپينگ-تەست ناتيجەلەرى بويىنشا ۆ سىناماسىن اشۋدىڭ رەسمي كۇنى مەن ۋاقىتى بەلگىلەنگەنىن حابارلادى. بۇل كەزەڭ پروسەستىك اشىقتىق پەن سپورتشىنىڭ قۇقىقتارىن ساقتاۋ تۇرعىسىنان اسا ماڭىزدى بولىپ سانالادى، دەپ حابارلايدى Dalanews.kz.
راحىمجان ەردەنبەكوۆتىڭ ايتۋىنشا، الەمدىك تاجىريبەدە ۆ سىناماسىن تالداۋ تەك ا سىناماسىنىڭ باستاپقى دەرەكتەرىن راستاۋ نەمەسە جوققا شىعارۋ قاجەتتىلىگى تۋىنداعان جاعدايدا عانا جۇرگىزىلەدى. پروسەدۋرا تاۋەلسىز اككرەديتتەلگەن زەرتحانادا جۇزەگە اسىرىلادى جانە سپورتشى وكىلدەرى مەن مۇددەلى تاراپتاردىڭ قاتىسۋ مۇمكىندىگىن قوسا العاندا، بارلىق حاتتامالار قاتاڭ ساقتالادى. ءدال وسى تەتىك كەز كەلگەن قاتەلىك پەن بۇرمالاۋدى بولدىرماي، وبەكتيۆتىلىكتىڭ باستى كەپىلى بولىپ تابىلادى.
«قازاقستاننىڭ كاسىبي بوكس فەدەراسياسى ۆ سىناماسىن اشۋ كۇنىنىڭ بەلگىلەنۋى ەشقانداي قۇقىقبۇزۋشىلىقتى مويىنداۋ بولىپ سانالمايتىنىن جانە الدىن الا قورىتىندى جاسالمايتىنىن اتاپ وتەدى. بۇل - حالىقارالىق انتيدوپينگتىك نورمالاردا كوزدەلگەن، ناقتى دەرەكتەردى تۇپكىلىكتى انىقتاۋعا باعىتتالعان ستاندارتتى رەگلامەنتتىك قادام. فەدەراسيانىڭ ۇستانىمى ءبىرىزدى ءارى ينستيتۋسيونالدىق سيپاتتا: ەكى سىناما بويىنشا رەسمي قورىتىندى الىنعانعا دەيىن كەز كەلگەن جاريا مالىمدەمە، بولجام نەمەسە باعالاۋ پىكىرلەرىنە جول بەرىلمەيدى. ادال سپورت قاعيداتتارى مەن سپورتشىلاردىڭ قۇقىقتارىن قورعاۋ تەك راستالعان دەرەكتەرگە عانا نەگىزدەلۋى ءتيىس، اقپاراتتىق دابىراعا ەمەس»، - دەدى ول.
جاعدايعا قاتىستى تۇپكىلىكتى اقپارات پەن قۇقىقتىق باعا بارلىق بەلگىلەنگەن راسىمدەر اياقتالىپ، ۋاكىلەتتى انتيدوپينگتىك ورگانداردان رەسمي قۇجاتتار الىنعاننان كەيىن ۇسىنىلادى. ءوز كەزەگىندە قازاقستاننىڭ كاسىبي بوكس فەدەراسياسى VADA ۇيىمىنان ا سىناماسى بويىنشا رەسمي ءارى تولىق جاۋاپ كۇتۋدە.
ەستەرىڭىزدە بۇعان دەيىن كاسىپقوي بوكس شەبەرى جانىبەك ءالىمحان ۇلى دوپينگ داۋىنا تاپ بولىپ، ونىڭ ماڭىزدى جەكپە-جەگى وتپەي قالعان.
