كەلەر جىلدان باستاپ جاتتىقتىرۋشى-وقىتۋشىلاردىڭ جالاقىسى وسەدى. بۇل تۋرالى پرەمەر-مينيستر ولجاس بەكتەنوۆتىڭ ءماجىلىس دەپۋتاتتارىنىڭ ساۋالىنا بەرگەن رەسمي جاۋابىندا ايتىلعان، دەپ حابارلايدى Dalanews.kz Aikyn.kz-كە سىلتەپ.
بالالار مەن جاسوسپىرىمدەر سپورت مەكتەپتەرىندە ەڭبەك ەتەتىن جاتتىقتىرۋشى-وقىتۋشىلارعا بىلىكتىلىك شەبەرلىگى ءۇشىن لاۋازىمدىق جالاقىسىنىڭ 30%-ى مولشەرىندە قوسىمشا اقى تولەۋ جوسپارلانىپ وتىر.
"بۇل ماقساتتا 2025–2028 جىلدارعا ارنالعان رەسپۋبليكالىق بيۋدجەت جوباسىندا 1،8 ميلليارد تەڭگە قاراستىرىلعان. ءقازىر ۇكىمەتتىڭ ءتيىستى قاۋلىسىنا تولىقتىرۋلار ازىرلەنىپ، كەلىسۋ پروسەسىنەن ءوتىپ جاتىر"، – دەدى بەكتەنوۆ.
سونىمەن قاتار، قولدانىستاعى زاڭناما اياسىندا رەسپۋبليكالىق ماڭىزى بار قالالار مەن وبلىستىق اكىمدىكتەر جەرگىلىكتى بيۋدجەت ەسەبىنەن سپورت سالاسى قىزمەتكەرلەرىنە ۇستەمەاقى تاعايىنداۋعا، ال اۋىلدىق جەرلەردە جۇمىس ىستەيتىن ماماندارعا لاۋازىمدىق جالاقىسىنىڭ كەمىندە 25%-ى كولەمىندە قوسىمشا اقى تولەۋگە قۇقىلى.
