مەملەكەت باسشىسى قاسىم-جومارت توقايەۆ قازاقستاندىقتاردى تاۋەلسىزدىك كۇنىمەن قۇتتىقتادى، دەپ حابارلايدى Dalanews.kz.
توقايەۆ بۇل كۇننىڭ ەل تاريحىنداعى ماڭىزىنا ايرىقشا توقتالدى.
"قۇرمەتتى وتانداستار!
تاۋەلسىزدىك كۇنى قۇتتى بولسىن!
بۇل مەرەكەنىڭ ەلىمىز ءۇشىن ءمان-ماڭىزى ايرىقشا. وسى كۇنى حالقىمىز قازاقستاندى ەگەمەن ەل رەتىندە دامىتۋ جولىندا ەرىكتى ءارى تۇپكىلىكتى تاڭداۋ جاسادى.
تاۋەلسىزدىك بارىنەن قىمبات! ءبىز بابالار رۋحىنا تاعزىم ەتىپ، وسكەلەڭ ۇرپاق الدىنداعى تاريحي جاۋاپكەرشىلىكتى سەزىنە وتىرىپ، وسى ۇستانىمعا ادال بولامىز"، - دەدى ول.
سونداي-اق ول ازاماتتاردىڭ ىنتىماعى مەن بىرلىگى، ءوزارا قولداۋى مەن قاجىرلى ەڭبەگىنىڭ ارقاسىندا ەلىمىز تاۋەلسىزدىكتى نىعايتۋ جولىندا ەلەۋلى جەتىستىكتەرگە جەتكەنىن اتاپ ءوتتى.
"ءقازىر بۇكىل الەم جىلدام وزگەرىپ جاتىر. ءتۇرلى سىناقتارمەن قاتار، تىڭ مۇمكىندىكتەرگە تولى جاڭا تاريحي ءداۋىر باستالدى.
مۇنداي جاعدايدا ءبىز جاس جانە وزىق ويلى ۇلت رەتىندە بولاشاققا زور ۇمىتپەن جانە نىق سەنىممەن قاراپ، بەرەكەلى بىرلىگىمىزدى ساقتاۋىمىز كەرەك. ەلىمىزدىڭ جاھاندىق دەڭگەيدەگى بەدەلى مەن باسەكەگە قابىلەتىن ارتتىرىپ، قازاقستاندى كوركەيگەن مەملەكەت رەتىندە دامىتۋ ءۇشىن ايانباي ەڭبەك ەتۋىمىز قاجەت.
ءقازىر جۇزەگە اسىرىلىپ جاتقان اۋقىمدى رەفورمالاردىڭ ناتيجەسىندە زور تابىسقا جەتەمىز دەپ سەنەمىن. جان-جاقتى جاڭعىرۋعا باعىتتالعان ستراتەگيالىق باعدارىمىزدان اۋىتقىماي، ادىلەتتى، كۇشتى، تازا، ءقاۋىپسىز قازاقستاندى قۇرامىز.
بارشاڭىزعا مول باقىت، باق-بەرەكە جانە تولاعاي تابىس تىلەيمىن!
قاستەرلى تاۋەلسىزدىگىمىز ماڭگى بولسىن!"، - دەپ مالىمدەدى مەملەكەت باسشىسى.
