الماتى قالاسىندا قوعامدىق كولىككە بولىنەتىن سۋبسيديا كولەمى شامامەن 460–470 تەڭگە شاماسىندا. بۇل تۋرالى قالالىق ءماسليحات دەپۋتاتى جالىن جاينارباي مالىمدەدى، دەپ حابارلايدى Dalanews.kz.
ونىڭ ايتۋىنشا، سۋبسيديا كولەمىنىڭ ۇلعايىپ كەتپەۋى ءۇشىن ول دەپۋتات بولىپ سايلانعان كەزدە “BUS/كيلومەتر” جۇيەسىنە كوشۋ تۋرالى ۇسىنىس جاساعان.
“باستى ماقسات – سۋبسيديا كولەمىن شەكتەي وتىرىپ، كولىك جۇيەسىن ءتيىمدى ەتۋ. "BUS كيلومەتر" جۇيەسىنە كوشسەك، قارجىلاندىرۋ ناقتى ءجۇرىپ وتكەن قاشىققا بايلانىستى ەسەپتەلەدى. دەگەنمەن بۇل جۇيەگە كوشۋ كەزىندە ءبىر-بىرىنىڭ باعىتىن قايتالايتىن اۆتوبۋستار كوپ، ول دا بولەك ماسەلە”، – دەيدى دەپۋتات.
جايناربايدىڭ ايتۋىنشا، الماتىدا ترانسپورتتىق ينفراقۇرىلىم مەن كولىك قاڭقاسىن (ترانسپورتنىي كاركاس) جۇيەلى دامىتۋ ماڭىزدى. وسىعان بايلانىستى ول قالالىق موبيلدىلىك باسقارماسىن ەكىگە ءبولۋ جونىندە ۇسىنىس بىلدىرگەن.
“بيىل جاڭا اكىم كەلگەننەن كەيىن باسقارما ەكىگە ءبولىندى: ءبىرى – كولىك، ەكىنشىسى – جول باعىتى بويىنشا. بۇل وتە دۇرىس شەشىم بولدى. ءقازىر ترانسپورت سالاسىنا كەلگەن جاڭا باسشى وسى سالانى جاقسى بىلەتىن ادام سياقتى. ول ءبىراز ءتيىمدى يدەيالارىن ايتتى، ەگەر سول جوسپارلار جۇزەگە اسسا، قالاداعى كولىك جۇيەسىندە ايتارلىقتاي وزگەرىس بولادى”، – دەدى ول.
دەپۋتاتتىڭ ايتۋىنشا، قازىرگى تاڭدا سۋبسيديا كولەمى ايتارلىقتاي جوعارى بولعانىمەن، قالا تۇرعىندارى ءۇشىن قوعامدىق كولىك جۇيەسىنىڭ قولايلىلىعى ءالى دە جەتكىلىكسىز.
“ەگەر ترانسپورتتىق كاركاس جوسپارى ءتيىمدى ىسكە اسسا، سۋبسيديا ءوز ءوزىن اقتايتىن دەڭگەيگە جەتەدى دەپ سەنەمىز”، – دەپ تۇيىندەدى ءماسليحات دەپۋتاتى جالىن جاينارباي.
ەسكە سالا كەتسەك، بۇعان دەيىن ەنەرگەتيكا مينيسترلىگىنىڭ بۇرىنعى كەڭەسشىسى، ساراپشى ولجاس ءبايدىلدينوۆ تاسىمالداۋشىلار شىعىنمەن جۇمىس ىستەپ جاتقانىن ايتىپ، اۆتوبۋس بيلەتى كەم دەگەندە 500 تەڭگە بولۋى ءتيىس دەگەن پىكىر بىلدىرگەن ەدى.
ساراپشىنىڭ بۇل پىكىرىنە ۇكىمەت تۇسىنىكتەمە بەردى.
ۇلتتىق ەكونوميكا ءبىرىنشى ۆيسە-مينيسترى ازامات ءامريننىڭ ايتۋىنشا، باعانىڭ ءوسۋى تەك وبەكتيۆتى سەبەپتەر بولعان جاعدايدا عانا مۇمكىن.
"مىسالى، ەگەر بەنزين قىمباتتاسا. ءبىراق بۇل ءار كومپانيانىڭ كوممەرسيالىق شەشىمى، مەملەكەت تاراپىنان بەكىتىلگەن نورما ەمەس"، – دەدى ول.
ال قارجى ۆيسە-مينيسترى ەرجان ءبىرجانوۆ ساراپشىنىڭ پىكىرى ونىڭ جەكە كوزقاراسى ەكەنىن ايتىپ، بيلىك تاراپىنان جولاقىنىڭ كۇرت قىمباتتاۋىنا جول بەرىلمەيتىنىن مالىمدەدى.
"قوعامدىق كولىك – حالىققا ارنالعان. سوندىقتان جولاقىنىڭ كۇرت وسۋىنە جول بەرىلمەيدى. ەگەر قوعامدىق كولىكتەگى باعالار وسسە، مەملەكەت بۇل باعىتتا قولداۋ كورسەتەدى"، – دەدى ول.
