قازاقستان رەسپۋبليكاسى باس پروكۋراتۋراسىنىڭ قۇقىقتىق ستاتيستيكا جانە ارنايى ەسەپكە الۋ جونىندەگى كوميتەتى WhatsApp مەسسەندجەرىنە باعىتتالعان جاڭا كيبەرشابۋىل ءتۇرى پايدا بولعانىن مالىمدەدى، دەپ حابارلايدى Dalanews.kz.
ۆەدومستۆونىڭ قىلمىستىق قاۋىپ-قاتەرلەر مەن قوعامدىق قاۋىپسىزدىك تاۋەكەلدەرىن بولجاۋ ورتالىعىنىڭ دەرەگىنشە، كيبەرالاياقتار «GhostPairing» دەپ اتالاتىن جاڭا سحەما قولدانۋدا. بۇل ءادىس ارقىلى قاسكويلەر پارول بۇزباي-اق، SIM-كارتانى اۋىستىرماي-اق پايدالانۋشىنىڭ WhatsApp اككاۋنتىنا تولىق قول جەتكىزە الادى.
مالىمەتكە سايكەس، الاياقتار قوسىمشا قۇرىلعىلاردى بايلانىستىرۋ فۋنكسياسىن زاڭدى جولمەن پايدالانادى. جابىرلەنۋشىگە Facebook نەمەسە WhatsApp اتىنان جالعان حابارلاما جىبەرىلىپ، ول سەرۆيستەردىڭ ينتەرفەيسىن قايتالايتىن فەيك-پاراقشاعا باعىتتايدى. وندا تەلەفون ءنومىرى مەن راستاۋ كودىن ەنگىزۋ سۇرالادى. كود ەنگىزىلگەن ساتتەن باستاپ، قىلمىسكەر اككاۋنتقا سەنىمدى قۇرىلعى رەتىندە قوسىلىپ، حابارلامالارعا، مەديافايلدارعا، بايلانىستار تىزىمىنە جانە حات الماسۋعا تولىق قول جەتكىزەدى.
ەڭ ءقاۋىپتىسى — تەلەفون قالىپتى جۇمىس ىستەي بەرەدى، سوندىقتان پايدالانۋشى بۇزىلعانىن بىردەن اڭعارماۋى مۇمكىن. اككاۋنتتىڭ باسىپ الىنعانىن تەك «بايلانىستىرىلعان قۇرىلعىلار» ءبولىمىن تەكسەرۋ ارقىلى عانا انىقتاۋعا بولادى. بەلگىسىز قۇرىلعى انىقتالعان جاعدايدا، ونى دەرەۋ جويۋ قاجەت.
وسىعان بايلانىستى باس پروكۋراتۋرا ازاماتتاردى كيبەرقاۋىپسىزدىك تالاپتارىن ساقتاۋعا شاقىردى. اتاپ ايتقاندا:
-
كۇماندى حابارلامالار مەن سىلتەمەلەرگە وتپەۋ؛
-
WhatsApp راستاۋ كودىن بوگدە سايتتارعا ەنگىزبەۋ؛
-
ەكى فاكتورلى اۋتەنتيفيكاسيانى قوسۋ؛
-
اككاۋنت بەلسەندىلىگىن تۇراقتى باقىلاپ وتىرۋ ۇسىنىلادى.
ۆەدومستۆو ماماندارى ساقتىق شارالارىن ەلەمەۋ جەكە دەرەكتەردىڭ تارالۋىنا جانە الاياقتىققا اكەپ سوعۋى مۇمكىن ەكەنىن ەسكەرتەدى.
