اتىراۋ وبلىسىنىڭ قۇرمانعازى اۋداندىق سوتىندا قازاقستان رەسپۋبليكاسىنىڭ قىلمىستىق كودەكسىنىڭ 115-1-بابى بويىنشا — زاڭسىز قۋدالاۋ (ستالكينگ) دەرەگىمەن قوزعالعان قىلمىستىق ءىس قارالدى. بۇل باپ بويىنشا وڭىردە العاش رەت سوت ۇكىمى شىعارىلدى، دەپ حابارلايدى Dalanews.kz.

سوت ماتەريالدارىنا سايكەس، 2025 جىلعى 5 قىركۇيەكتە ايىپتالۋشى ك. جابىرلەنۋشىنىڭ ۇيىنە كەلىپ، كىرەبەرىس ەسىكتى تارتىپ، تەرەزەنى قاعىپ، سودان سوڭ قاشىپ كەتكەن. كەيىن ايەلدىڭ قوزعالىسىن باقىلاۋ ماقساتىندا 2GIS قوسىمشاسى ارقىلى ونىڭ كامەلەتكە تولماعان بالالارىنىڭ تەلەفوندارىنا “دوستىققا قوسىلۋ” سۇرانىستارىن جىبەرىپ، ولاردىڭ ءبىرىنىڭ جۇرگەن جەرىن باقىلاعان.

ال 19 قىركۇيەكتە، ايىپتالۋشى ماس كۇيىندە اڭدۋىن جالعاستىرىپ، جابىرلەنۋشىنىڭ ۇيىنە قايتا كەلىپ، اشىق تۇرعان اۋلاعا كىرىپ، تەرەزەلەردەن سىعالاپ قاراعان. بۇل ارەكەتتەر جابىرلەنۋشىنىڭ ەركىنەن تىس، كۇش قولدانۋسىز جاسالعان.

سوت وتىرىسىندا پروكۋرور ايىپتالۋشىعا 200 ساعات قوعامدىق جۇمىس جازاسىن تاعايىنداۋدى سۇرادى. ال جابىرلەنۋشى قاتاڭىراق جازا قولدانۋدى تالاپ ەتىپ، مورالدىق زياندى وتەۋ تۋرالى ازاماتتىق تالاپ قويدى. ايىپتالۋشى كىناسىن جارتىلاي مويىندادى.

سوت جابىرلەنۋشىنىڭ جانە كۋاگەرلەردىڭ كورسەتۋلەرىن، بەينەجازبالاردى جانە باسقا دا دالەلدەردى نەگىزگە الا وتىرىپ، ايىپتالۋشىنىڭ كىناسىن تولىق دالەلدەنگەن دەپ تانىدى. ونىڭ ارەكەتتەرى ەلەۋلى زيان كەلتىرگەن زاڭسىز قۋدالاۋ رەتىندە سارالاندى.

ناتيجەسىندە سوت ۇكىمىمەن ازامات ك. 200 ساعات قوعامدىق جۇمىسقا تارتىلدى. سونداي-اق وعان مورالدىق زيان ءۇشىن 400 000 تەڭگە جانە وكىلىنىڭ قىزمەتتەرىنە كەتكەن شىعىنداردى جابۋ ءۇشىن 200 000 تەڭگە تولەۋ مىندەتتەلدى.