Atyraý oblysynyń Qurmanǵazy aýdandyq sotynda Qazaqstan Respýblikasynyń Qylmystyq kodeksiniń 115-1-baby boiynsha — zańsyz qýdalaý (stalking) deregimen qozǵalǵan qylmystyq is qaraldy. Bul bap boiynsha óńirde alǵash ret sot úkimi shyǵaryldy, dep habarlaidy Dalanews.kz.
Sot materialdaryna sáikes, 2025 jylǵy 5 qyrkúiekte aiyptalýshy K. jábirlenýshiniń úiine kelip, kireberis esikti tartyp, terezeni qaǵyp, sodan soń qashyp ketken. Keiin áieldiń qozǵalysyn baqylaý maqsatynda 2GIS qosymshasy arqyly onyń kámeletke tolmaǵan balalarynyń telefondaryna “dostyqqa qosylý” suranystaryn jiberip, olardyń biriniń júrgen jerin baqylaǵan.
Al 19 qyrkúiekte, aiyptalýshy mas kúiinde ańdýyn jalǵastyryp, jábirlenýshiniń úiine qaita kelip, ashyq turǵan aýlaǵa kirip, terezelerden syǵalap qaraǵan. Bul áreketter jábirlenýshiniń erkinen tys, kúsh qoldanýsyz jasalǵan.
Sot otyrysynda prokýror aiyptalýshyǵa 200 saǵat qoǵamdyq jumys jazasyn taǵaiyndaýdy surady. Al jábirlenýshi qatańyraq jaza qoldanýdy talap etip, moraldyq ziiandy óteý týraly azamattyq talap qoidy. Aiyptalýshy kinásin jartylai moiyndady.
Sot jábirlenýshiniń jáne kýágerlerdiń kórsetýlerin, beinejazbalardy jáne basqa da dálelderdi negizge ala otyryp, aiyptalýshynyń kinásin tolyq dáleldengen dep tanydy. Onyń áreketteri eleýli ziian keltirgen zańsyz qýdalaý retinde saralandy.
Nátijesinde sot úkimimen azamat K. 200 saǵat qoǵamdyq jumysqa tartyldy. Sondai-aq oǵan moraldyq ziian úshin 400 000 teńge jáne ókiliniń qyzmetterine ketken shyǵyndardy jabý úshin 200 000 teńge tóleý mindetteldi.
