“رۋىڭ كىم؟” فيلمىنەن كەيىن Tiger films كينوكومپانياسى جۇمىسىن توقتاتتى. بۇل تۋرالى كينوكومپانيا پروديۋسەرى المات شادمات مالىمدەدى، دەپ حابارلايدى Dalanews.kz.
“قۇرمەتتى ارىپتەستەر، سەرىكتەستەر جانە كورەرمەن، ءبىز Tiger films كومپانياسىنىڭ كينو ءوندىرىسى سالاسىنداعى قىزمەتىنە قاتىستى ماڭىزدى شەشىمىمىزدى رەسمي تۇردە مالىمدەيمىز. وسى ساتتەن باستاپ Tiger films كينو ءتۇسىرۋ جۇمىستارىن تولىعىمەن توقتاتادى. بۇل شەشىم ءبىر كۇندە قابىلدانعان جوق، جاعدايدى جان-جاقتى ساراپتاۋدىڭ ناتيجەسى. قازىرگى كينويندۋستريا تۇراقسىز، بولجاپ بولمايتىن، ۇلكەن قارجىلىق جانە رەپۋتاسيالىق قاۋىپتەرى بار سالا ەكەنىن تاجىريبە جۇزىندە كوردىك. قالىپتاسقان جاعدايدا كينو ءوندىرىستى جالعاستىرۋدى ەكونوميكالىق جانە ستراتەگيالىق تۇرعىدان ءتيىمسىز دەپ سانايمىز”، — دەيدى ول.
ايتۋىنشا، ەندى كومپانيا قىزمەتىنىڭ باعىتىن وزگەرتەدى. بۇدان بىلاي Tiger Films كاسىبي كينوتەحنيكا قۇرال-جابدىقتارىن باسقا پروديۋسەرلەر مەن شىعارماشىلىق توپتارعا جالعا بەرۋمەن اينالىسادى.
“ايتا كەتۋ كەرەك، بارلىق جوسپارلانعان ءتۇسىرىلىم پروسەستەرى اياقتالدى. قازىرگى تاڭدا ءبىرقاتار كارتينا پوست-پروداكشن كەزەڭىندە، ولار تولىعىمەن اياقتالادى. الايدا كەلەسى كەزەڭدە كينو ءوندىرىس باعىتى تولىعىمەن جابىلادى”، — دەپ قوستى ول.
ول بۇل شەشىمگە اسەر ەتكەن نەگىزگى فاكتورلارعا دا توقتالدى.
“سولاردىڭ ءبىرى ءفيلمىمىزدىڭ “وسكار” سىيلىعىنا جىبەرىلمەۋى ءۇشىن تۋىنداعان جانجال. سونىمەن قاتار جەكەلەگەن دەپۋتاتتاردىڭ مالىمدەمەلەرى ناتيجەسىندە Tiger films كينوكومپانياسىنا ايتارلىقتاي يميدجدىك جانە رەپۋتاسيالىق زيان كەلتىرىلدى. بۇل جاعداي ءبىز ءۇشىن سوڭعى شەشىمنىڭ قابىلداۋىنا تۇرتكى بولدى. سونىمەن قاتار بۇگىنگى جاعدايدا بىزگە كەدەرگىسىز جۇمىس ىستەۋگە مۇمكىندىك بەرىلەدى دەگەن سەنىم جوق. ەگەر كومپانيانىڭ قىزمەتى اشىق تۇردە ايىپتالسا، ال كاسىبي ەڭبەگىمىزگە كۇمان كەلسە، وندا بۇل باعىتتا جۇمىس ىستەۋدى جالعاستىرۋدىڭ ءمانى جوق دەپ ەسەپتەيمىز. وسى سەبەپتى ءبىز تايگەر فيلمس برەندىمەن كينو وندىرىسپەن اينالىسۋدان ءوز ەركىمىزبەن باس تارتامىز”، — دەيدى ول.
ونىڭ سوزىنشە، Tiger Films ءتورت جىل ىشىندە 56 فيلم ءتۇسىرىپ، جۇزدەگەن ماماندى تۇراقتى جانە ۋاقىتشا جۇمىسپەن قامتىپ، قازاق كينوسىنىڭ دامۋىنا ءوز ۇلەستەرىن قوسقان.
“بۇل تەك كومپانيانىڭ جەتىستىگى عانا ەمەس، قازاق كينوسىنىڭ دامۋىنا جاسالعان ۇلكەن قادام بولدى. ءبىز جاڭا ەسىمدەرگە مۇمكىندىك بەرىپ، جاس مامانداردىڭ تاجىريبە جيناۋىنا جانە كرەاتيۆتى يندۋستريانىڭ كاسىبي دەڭگەيىنىڭ وسۋىنە ءوز ۇلەسىمىزدى قوستىق”، — دەپ تۇيىندەدى ول.
ەسكە سالايىق، بۇعان دەيىن قازاقستاندا "رۋىڭ كىم؟" فيلمىنە تىيىم سالىنعان ەدى.
بۇل تۋرالى ءفيلمنىڭ شىعارماشىلىق توبى حابارلادى.
"رۋىڭ كىم؟" ءفيلمى 18 جەلتوقساننان باستاپ بەلگىلى ءبىر سەبەپتەرگە بايلانىستى كينوتەاترلاردا كورسەتىلۋىن توقتاتادى. بىزبەن بىرگە بولىپ، قولداۋ كورسەتكەندەرىڭىزگە العىس!"، - دەلىنگەن جازبادا.
ءفيلمنىڭ سەناريي اۆتورى نۇرجان ەركىن ۇلىنىڭ سوزىنشە، تۋىندىنىڭ پروكاتتان الىنۋىنا سەنزۋرا سەبەپ بولۋى مۇمكىن.
