“Rýyń kim?” filminen keiin Tiger films kinokompaniiasy jumysyn toqtatty. Bul týraly kinokompaniia prodiýseri Almat Shadmat málimdedi, dep habarlaidy Dalanews.kz.
“Qurmetti áriptester, seriktester jáne kórermen, biz Tiger films kompaniiasynyń kino óndirisi salasyndaǵy qyzmetine qatysty mańyzdy sheshimimizdi resmi túrde málimdeimiz. Osy sátten bastap Tiger films kino túsirý jumystaryn tolyǵymen toqtatady. Bul sheshim bir kúnde qabyldanǵan joq, jaǵdaidy jan-jaqty saraptaýdyń nátijesi. Qazirgi kinoindýstriia turaqsyz, boljap bolmaityn, úlken qarjylyq jáne repýtatsiialyq qaýipteri bar sala ekenin tájiribe júzinde kórdik. Qalyptasqan jaǵdaida kino óndiristi jalǵastyrýdy ekonomikalyq jáne strategiialyq turǵydan tiimsiz dep sanaimyz”, — deidi ol.
Aitýynsha, endi kompaniia qyzmetiniń baǵytyn ózgertedi. Budan bylai Tiger Films kásibi kinotehnika qural-jabdyqtaryn basqa prodiýserler men shyǵarmashylyq toptarǵa jalǵa berýmen ainalysady.
“Aita ketý kerek, barlyq josparlanǵan túsirilim protsesteri aiaqtaldy. Qazirgi tańda birqatar kartina post-prodakshn kezeńinde, olar tolyǵymen aiaqtalady. Alaida kelesi kezeńde kino óndiris baǵyty tolyǵymen jabylady”, — dep qosty ol.
Ol bul sheshimge áser etken negizgi faktorlarǵa da toqtaldy.
“Solardyń biri filmimizdiń “Oskar” syilyǵyna jiberilmeýi úshin týyndaǵan janjal. Sonymen qatar jekelegen depýtattardyń málimdemeleri nátijesinde Tiger films kinokompaniiasyna aitarlyqtai imidjdik jáne repýtatsiialyq ziian keltirildi. Bul jaǵdai biz úshin sońǵy sheshimniń qabyldaýyna túrtki boldy. Sonymen qatar búgingi jaǵdaida bizge kedergisiz jumys isteýge múmkindik beriledi degen senim joq. Eger kompaniianyń qyzmeti ashyq túrde aiyptalsa, al kásibi eńbegimizge kúmán kelse, onda bul baǵytta jumys isteýdi jalǵastyrýdyń máni joq dep esepteimiz. Osy sebepti biz Taiger Films brendimen kino óndirispen ainalysýdan óz erkimizben bas tartamyz”, — deidi ol.
Onyń sózinshe, Tiger Films tórt jyl ishinde 56 film túsirip, júzdegen mamandy turaqty jáne ýaqytsha jumyspen qamtyp, qazaq kinosynyń damýyna óz úlesterin qosqan.
“Bul tek kompaniianyń jetistigi ǵana emes, qazaq kinosynyń damýyna jasalǵan úlken qadam boldy. Biz jańa esimderge múmkindik berip, jas mamandardyń tájiribe jinaýyna jáne kreativti indýstriianyń kásibi deńgeiiniń ósýine óz úlesimizdi qostyq”, — dep túiindedi ol.
Eske salaiyq, buǵan deiin Qazaqstanda "Rýyń kim?" filmine tyiym salynǵan edi.
Bul týraly filmniń shyǵarmashylyq toby habarlady.
"Rýyń kim?" filmi 18 jeltoqsannan bastap belgili bir sebepterge bailanysty kinoteatrlarda kórsetilýin toqtatady. Bizben birge bolyp, qoldaý kórsetkenderińizge alǵys!", - delingen jazbada.
Filmniń stsenarii avtory Nurjan Erkinulynyń sózinshe, týyndynyń prokattan alynýyna tsenzýra sebep bolýy múmkin.
