پرەزيدەنت قاسىم-جومارت توقايەۆ پرەمەر-مينيستر ولجاس بەكتەنوۆتى قابىلدادى. كەزدەسۋدە ەكونوميكالىق رەفورمالاردى جۇزەگە اسىرۋ جانە ازاماتتاردىڭ ءال-اۋقاتىن ارتتىرۋ بويىنشا بەرىلگەن تاپسىرمالاردىڭ ورىندالۋى تالقىلاندى، دەپ حابارلايدى Dalanews.kz.

پرەمەر-مينيستر 2025 جىلدىڭ قاڭتار-قاراشا ايلارى ارالىعىنداعى الەۋمەتتىك-ەكونوميكالىق دامۋدىڭ الدىن الا قورىتىندىلارىن باياندادى. ەل ەكونوميكاسىن ءارتاراپتاندىرۋ ناتيجەسىندە ىشكى جالپى ءونىمنىڭ 70%-دان استامى ونەركاسىپ، ساۋدا جانە كولىك سالالارىنىڭ ۇلەسىنە تيەدى. اتاپ ايتقاندا، كولىك قىزمەتى 20،3%، قۇرىلىس 14،7%، ساۋدا 8،8%، اۋىل شارۋاشىلىعى 6،1%، وڭدەۋ ونەركاسىبى 5،9% ءوسىم كورسەتكەن. نەگىزگى كاپيتالعا سالىنعان ينۆەستيسيالار كولەمى 18،5 ترلن تەڭگەنى قۇراپ، جەكە ينۆەستيسيالار 9،8% ۇلعايعان.

مەملەكەت باسشىسىنا 2026–2028 جىلدارعا ارنالعان ماكروەكونوميكالىق تۇراقتاندىرۋ جانە حالىقتىڭ ءال-اۋقاتىن ارتتىرۋ جونىندەگى ۇكىمەت، ۇلتتىق بانك پەن قارجى نارىعىن رەتتەۋ جانە دامىتۋ اگەنتتىگىنىڭ بىرلەسكەن ءىس-قيمىل باعدارلاماسى تانىستىرىلدى. ونىڭ نەگىزگى باسىمدىقتارى - حالىقتىڭ ناقتى تابىسىن ارتتىرۋ، تۇرمىس دەڭگەيىن كوتەرۋ جانە ىشكى جالپى ءونىمدى ۇلعايتۋ. سونىمەن قاتار ينفلياسيا دەڭگەيىن تومەندەتۋ شارالارى قاراستىرىلۋدا.

پرەمەر-مينيستر جەلتوقسان ايىندا شەكاراداعى بەس وتكىزۋ بەكەتى جاڭعىرتىلعانىن، قازاقستاندىق تاۋار وندىرۋشىلەردىڭ رەەسترى ىسكە قوسىلعانىن جانە شاعىن بيزنەستى قولداۋعا ارنالعان «ىسكەر ايماق» ءبىرىڭعاي باعدارلاماسى قابىلدانعانىن حابارلادى. سونداي-اق جىلىتۋ ماۋسىمى مەن 2026 جىلعى دالا جۇمىستارىن قارجىلاندىرۋدىڭ ەرتە باستالعانى، اۋىل شارۋاشىلىعى ونىمدەرىن وڭدەۋ جانە ەكسپورتقا شىعارۋ، ەگىس القاپتارىن ساقتاۋ مەن ۇلعايتۋ شارالارى باياندالدى.

پرەزيدەنت ۇكىمەت باسشىسىنا ينۆەستيسيا تارتۋ، كاسىپكەرلىكتى قولداۋ جانە ينجەنەرلىك ءارى كولىك ينفراقۇرىلىمىن جاڭعىرتۋ بويىنشا ناقتى تاپسىرمالار بەردى، سونداي-اق ەلدىڭ تۇراقتى دامۋىن قامتاماسىز ەتۋ باعىتىنداعى جۇمىستى جالعاستىرۋدى تاپسىردى.