Prezident Qasym-Jomart Toqaev Premer-ministr Oljas Bektenovti qabyldady. Kezdesýde ekonomikalyq reformalardy júzege asyrý jáne azamattardyń ál-aýqatyn arttyrý boiynsha berilgen tapsyrmalardyń oryndalýy talqylandy, dep habarlaidy Dalanews.kz.
Premer-ministr 2025 jyldyń qańtar-qarasha ailary aralyǵyndaǵy áleýmettik-ekonomikalyq damýdyń aldyn ala qorytyndylaryn baiandady. El ekonomikasyn ártaraptandyrý nátijesinde ishki jalpy ónimniń 70%-dan astamy ónerkásip, saýda jáne kólik salalarynyń úlesine tiedi. Atap aitqanda, kólik qyzmeti 20,3%, qurylys 14,7%, saýda 8,8%, aýyl sharýashylyǵy 6,1%, óńdeý ónerkásibi 5,9% ósim kórsetken. Negizgi kapitalǵa salynǵan investitsiialar kólemi 18,5 trln teńgeni qurap, jeke investitsiialar 9,8% ulǵaiǵan.
Memleket basshysyna 2026–2028 jyldarǵa arnalǵan makroekonomikalyq turaqtandyrý jáne halyqtyń ál-aýqatyn arttyrý jónindegi Úkimet, Ulttyq bank pen Qarjy naryǵyn retteý jáne damytý agenttiginiń birlesken is-qimyl baǵdarlamasy tanystyryldy. Onyń negizgi basymdyqtary - halyqtyń naqty tabysyn arttyrý, turmys deńgeiin kóterý jáne ishki jalpy ónimdi ulǵaitý. Sonymen qatar infliatsiia deńgeiin tómendetý sharalary qarastyrylýda.
Premer-ministr jeltoqsan aiynda shekaradaǵy bes ótkizý beketi jańǵyrtylǵanyn, Qazaqstandyq taýar óndirýshilerdiń reestri iske qosylǵanyn jáne shaǵyn biznesti qoldaýǵa arnalǵan «Isker aimaq» biryńǵai baǵdarlamasy qabyldanǵanyn habarlady. Sondai-aq jylytý maýsymy men 2026 jylǵy dala jumystaryn qarjylandyrýdyń erte bastalǵany, aýyl sharýashylyǵy ónimderin óńdeý jáne eksportqa shyǵarý, egis alqaptaryn saqtaý men ulǵaitý sharalary baiandaldy.
Prezident Úkimet basshysyna investitsiia tartý, kásipkerlikti qoldaý jáne injenerlik ári kólik infraqurylymyn jańǵyrtý boiynsha naqty tapsyrmalar berdi, sondai-aq eldiń turaqty damýyn qamtamasyz etý baǵytyndaǵy jumysty jalǵastyrýdy tapsyrdy.
