قاراشا ايىنىڭ قورىتىندىسى بويىنشا قازاقستانداعى ايىرباستاۋ پۋنكتتەرىندە اقش دوللارىن ساتۋ كولەمى قازانمەن سالىستىرعاندا 0،8% پايىز ءوسىپ، 234،7 ملرد تەڭگەنى قۇرادى. بۇل تۋرالى ۇلتتىق بانكتىڭ دەرەكتەرىندە كورسەتىلگەن، دەپ حابارلايدى Dalanews.kz.

Never.Aqsha تەلەگرام ارناسىنىڭ مالىمەتىنشە، جىلدىق ماندە امەريكالىق ۆاليۋتا بويىنشا وپەراسيالار كولەمى 2،8% پايىز ارتقان.

"ەۋروعا دەگەن سۇرانىس تا ساقتالىپ تۇر. قاراشادا رەسپۋبليكا بويىنشا ەۋرونىڭ تازا ساتىلىمى 14،2 ملرد تەڭگەنى قۇرادى. سونىمەن قاتار فۋنت ستەرلينگ (421،5 ملن تەڭگە) جانە جۇڭگو ءيۋانى (135،4 ملن تەڭگە) بويىنشا دا ازداعان وڭ سالدو تىركەلدى"، - دەيدى دەرەككوز.

ال رەسەيلىك ۆاليۋتا بويىنشا كەرى ءۇردىس بايقالادى. قاراشا ايىندا رۋبلمەن جۇرگىزىلگەن وپەراسيالاردىڭ تەرىس نەتتوسى 18،6 ملرد تەڭگەگە جەتتى، بۇل ايىرباستاۋ پۋنكتتەرىندە حالىقتىڭ ءرۋبلدى جاپپاي ساتقانىن بىلدىرەدى. ءبىر اي بۇرىن بۇل كورسەتكىش 32،1 ملرد تەڭگە بولعان. رۋبل بويىنشا تەرىس سالدو 2024 جىلعى جەلتوقساننان بەرى ۇزدىكسىز ساقتالىپ كەلەدى.

قولما-قول اقشا وپەراسيالارىنىڭ ەڭ ۇلكەن كولەمى ءداستۇرلى تۇردە ءىرى قالالارعا تيەسىلى. استانادا دوللاردىڭ تازا ساتىلىمى 16،8 ملرد تەڭگەنى، الماتىدا – 103،1 ملرد تەڭگەنى، شىمكەنتتە – 36،6 ملرد تەڭگەنى قۇرادى. وسى قالالاردا ءرۋبلدى وتكىزۋ كولەمى دە ەڭ جوعارى دەڭگەيدە تىركەلگەن.