الماتى مەن وزگە دە سەيسميكالىق بەلسەندى وڭىرلەردە قۇرىلىس جۇرگىزۋ ءتارتىبى وزگەرەدى. بۇل تۋرالى 2025 جىلعى 25 جەلتوقساندا سەنات كۋلۋارىندا ونەركاسىپ جانە قۇرىلىس ۆيسە-مينيسترى قۋاندىق قاجكەنوۆ مالىمدەدى، دەپ حابارلايدى Dalanews.kz.
ونىڭ ايتۋىنشا، وزگەرىستەر جەر سىلكىنىسى ءقاۋپىن ەسكەرەتىن ميكروايماقتاندىرۋ كارتالارىنا بايلانىستى. اتالعان كارتالاردى توتەنشە جاعدايلار مينيسترلىگىنە قاراستى ۇيىم ازىرلەپ جاتىر. قازىرگى تاڭدا مۇنداي كارتا الماتى قالاسى بويىنشا بار.
«باس جوسپارلاردى ىسكە اسىرۋ كەزىندە وسى ميكروايماقتاندىرۋ كارتالارى مىندەتتى تۇردە ەسكەرىلەدى. كارتادا جەر جارىلىمدارى مەن سەيسميكالىق ءقاۋىپتى ايماقتار بەلگىلەنگەن. مۇنداي جەرلەردە ءتىپتى بەس قاباتتى تۇرعىن ءۇي سالۋعا بولمايدى. سوندىقتان عىلىمي نەگىزدە ول اۋماقتاردى رەكرەاسيالىق ايماقتار رەتىندە – ساياباقتار، سكۆەرلەر جانە دەمالىس ورىندارىنا اينالدىرۋ تۋرالى شەشىم قابىلدانادى»، – دەدى ۆيسە-مينيستر.
سونداي-اق قۋاندىق قاجكەنوۆ سەيسميكالىق ءقاۋىپتى اۋماقتاردا ورنالاسقان عيماراتتارعا پاسپورتتاۋ ءجۇرىپ جاتقانىن ايتتى. بۇل جۇمىستاردىڭ ناتيجەسىنە قاراي نىسانداردى سەيسميكالىق تۇرعىدان كۇشەيتۋ نەمەسە وزگە دە قاۋىپسىزدىك شارالارىن قابىلداۋ جونىندە شەشىم قابىلدانباق.
جاڭا تاسىلدەر قالا قۇرىلىسىنىڭ قاۋىپسىزدىگىن ارتتىرىپ، جەر سىلكىنىسى ءقاۋپى جوعارى ايماقتارداعى تۇرعىنداردىڭ ءومىرى مەن مۇلكىن قورعاۋعا باعىتتالعان.
