Almaty men ózge de seismikalyq belsendi óńirlerde qurylys júrgizý tártibi ózgeredi. Bul týraly 2025 jylǵy 25 jeltoqsanda Senat kýlýarynda Ónerkásip jáne qurylys vitse-ministri Qýandyq Qajkenov málimdedi, dep habarlaidy Dalanews.kz.
Onyń aitýynsha, ózgerister jer silkinisi qaýpin eskeretin mikroaimaqtandyrý kartalaryna bailanysty. Atalǵan kartalardy Tótenshe jaǵdailar ministrligine qarasty uiym ázirlep jatyr. Qazirgi tańda mundai karta Almaty qalasy boiynsha bar.
«Bas josparlardy iske asyrý kezinde osy mikroaimaqtandyrý kartalary mindetti túrde eskeriledi. Kartada jer jarylymdary men seismikalyq qaýipti aimaqtar belgilengen. Mundai jerlerde tipti bes qabatty turǵyn úi salýǵa bolmaidy. Sondyqtan ǵylymi negizde ol aýmaqtardy rekreatsiialyq aimaqtar retinde – saiabaqtar, skverler jáne demalys oryndaryna ainaldyrý týraly sheshim qabyldanady», – dedi vitse-ministr.
Sondai-aq Qýandyq Qajkenov seismikalyq qaýipti aýmaqtarda ornalasqan ǵimarattarǵa pasporttaý júrip jatqanyn aitty. Bul jumystardyń nátijesine qarai nysandardy seismikalyq turǵydan kúsheitý nemese ózge de qaýipsizdik sharalaryn qabyldaý jóninde sheshim qabyldanbaq.
Jańa tásilder qala qurylysynyń qaýipsizdigin arttyryp, jer silkinisi qaýpi joǵary aimaqtardaǵy turǵyndardyń ómiri men múlkin qorǵaýǵa baǵyttalǵan.
