اتىراۋداعى مۇناي وڭدەۋ زاۋىتىندا اۋقىمدى ەكولوگيالىق تالاپتاردىڭ بۇزىلعانى بەلگىلى بولدى. تەكسەرۋ قورىتىندىسى بويىنشا كاسىپورىنعا جۇزدەگەن ميلليون تەڭگە كولەمىندە ايىپپۇل سالىندى، دەپ حابارلايدى Dalanews.kz.
ەكولوگيا دەپارتامەنتى جۇرگىزگەن جوسپاردان تىس تەكسەرۋ بارىسىندا بۋلانۋ الاڭدارىنان ديامەترى 500 مم بولاتىن جاسىرىن قۇبىر انىقتالعان. مامانداردىڭ ايتۋىنشا، وسى قۇبىر ارقىلى وندىرىستىك اعىن سۋلار زاڭسىز تۇردە اشىق توپىراققا توگىلگەن.
ناتيجەسىندە ەكى ۋچاسكەدە توگىلگەن قالدىق سۋ كولەمى 44 مىڭ تەكشە مەتردەن اسقان. لاستانعان اۋماقتىڭ جالپى كولەمى شامامەن 3 گەكتاردى قۇرايدى.
بۇدان بولەك، تەكسەرىس كەزىندە اتموسفەرالىق اۋانى قورعاۋ تالاپتارىنىڭ دا ورەسكەل بۇزىلعانى انىقتالدى. كاسىپورىننىڭ ءبىرقاتار ستاسيونارلىق كوزدەرىندە وتىن جاعۋ كەزىندە رۇقسات ەتىلگەن شىعارىندىلار بويىنشا ەسەپتەر مەن نورماتيۆتەردىڭ جوق ەكەنى بەلگىلى بولدى.
سونداي-اق زاۋىتتىڭ جوسپاردان تىس توقتاۋلارى كەزىندە اپاتتى شىعارىندىلار تىركەلگەن. سونىڭ سالدارىنان اتموسفەراعا شامامەن 40 مىڭ تەكشە مەترگە جۋىق وتىن گازى تاراعان.
سوت قاۋلىسىمەن "ءاموز" ج ش س اكىمشىلىك جاۋاپكەرشىلىككە تارتىلدى. جالپى سالىنعان ايىپپۇل كولەمى 520 547 007 تەڭگەنى قۇرادى.
الايدا كاسىپورىن بۇل شەشىممەن كەلىسپەيتىنىن مالىمدەپ، سوت ۇكىمىن قايتا قاراۋعا نيەتتى ەكەنىن جەتكىزدى.
