اتىراۋداعى مۇناي ٶڭدەۋ زاۋىتىندا اۋقىمدى ەكولوگييالىق تالاپتاردىڭ بۇزىلعانى بەلگٸلٸ بولدى. تەكسەرۋ قورىتىندىسى بويىنشا كەسٸپورىنعا جٷزدەگەن ميلليون تەڭگە كٶلەمٸندە ايىپپۇل سالىندى, دەپ حابارلايدى Dalanews.kz.
ەكولوگييا دەپارتامەنتٸ جٷرگٸزگەن جوسپاردان تىس تەكسەرۋ بارىسىندا بۋلانۋ الاڭدارىنان ديامەترٸ 500 مم بولاتىن جاسىرىن قۇبىر انىقتالعان. مامانداردىڭ ايتۋىنشا, وسى قۇبىر ارقىلى ٶندٸرٸستٸك اعىن سۋلار زاڭسىز تٷردە اشىق توپىراققا تٶگٸلگەن.
نەتيجەسٸندە ەكٸ ۋچاسكەدە تٶگٸلگەن قالدىق سۋ كٶلەمٸ 44 مىڭ تەكشە مەتردەن اسقان. لاستانعان اۋماقتىڭ جالپى كٶلەمٸ شامامەن 3 گەكتاردى قۇرايدى.
بۇدان بٶلەك, تەكسەرٸس كەزٸندە اتموسفەرالىق اۋانى قورعاۋ تالاپتارىنىڭ دا ٶرەسكەل بۇزىلعانى انىقتالدى. كەسٸپورىننىڭ بٸرقاتار ستاتسيونارلىق كٶزدەرٸندە وتىن جاعۋ كەزٸندە رۇقسات ەتٸلگەن شىعارىندىلار بويىنشا ەسەپتەر مەن نورماتيۆتەردٸڭ جوق ەكەنٸ بەلگٸلٸ بولدى.
سونداي-اق زاۋىتتىڭ جوسپاردان تىس توقتاۋلارى كەزٸندە اپاتتى شىعارىندىلار تٸركەلگەن. سونىڭ سالدارىنان اتموسفەراعا شامامەن 40 مىڭ تەكشە مەترگە جۋىق وتىن گازى تاراعان.
سوت قاۋلىسىمەن "امٶز" جشس ەكٸمشٸلٸك جاۋاپكەرشٸلٸككە تارتىلدى. جالپى سالىنعان ايىپپۇل كٶلەمٸ 520 547 007 تەڭگەنٸ قۇرادى.
الايدا كەسٸپورىن بۇل شەشٸممەن كەلٸسپەيتٸنٸن مەلٸمدەپ, سوت ٷكٸمٸن قايتا قاراۋعا نيەتتٸ ەكەنٸن جەتكٸزدٸ.
