قازاقستاندا الاياقتىقتىڭ جاڭا ءتاسىلى تارالىپ جاتىر، دەپ حابارلايدى Dalanews.kz.
ەلىمىزدە الاياقتىقتىڭ جاڭا ءتۇرى تارالىپ جاتىر، وندا قاسكۇنەمدەر وزدەرىن كومپانيالاردىڭ، مەملەكەتتىك ورگانداردىڭ جانە جوعارى وقۋ ورىندارىنىڭ باسشىلارى رەتىندە تانىستىرادى.
الاياقتار جالعان اككاۋنتتار مەن نومىرلەردى پايدالانىپ، قىزمەتكەرلەرگە تەلەفون ارقىلى نەمەسە مەسسەندجەرلەر ارقىلى حابارلاسادى. ولار دەرەكتەردىڭ تارالۋى نەمەسە قارجىنىڭ ۇرلانۋ ءقاۋىپىن سىلتاۋراتىپ، جاعدايدى ادەيى كۇردەلەندىرىپ كورسەتەدى. جەدەل ارەكەت ەتۋدى تالاپ ەتەدى جانە پسيحولوگيالىق قىسىم جاسايدى.
وسىدان كەيىن ازاماتتارعا “ماماندار” نەمەسە “قۇقىق قورعاۋ ورگاندارىنىڭ قىزمەتكەرلەرى” حابارلاساتىنى ايتىلىپ، ولاردىڭ نۇسقاۋلارىن بۇلجىتپاي ورىنداۋ تالاپ ەتىلەدى.
سالدارىنان الاياقتار ادامداردى اقشاسىن الىپ، ونى “ءقاۋىپسىز شوتتارعا” اۋدارۋعا كوندىرەدى. قاراجات قولعا تۇسكەن سوڭ، بايلانىس بىردەن ۇزىلەدى.
قاسكۇنەمدەر زاماناۋي تەحنولوگيالاردى كەڭىنەن قولدانادى. اتاپ ايتقاندا، ءنومىردى اۋىستىرۋ، داۋىستى وزگەرتۋ سياقتى تاسىلدەرمەن ازاماتتاردىڭ سەنىمىنە كىرىپ، قىراعىلىعىن تومەندەتۋگە تىرىسادى.
ءىىم ەسكەرتەدى: بانكتەر مەن مەملەكەتتىك ورگانداردىڭ قىزمەتكەرلەرى ەشقاشان تەلەفون ارقىلى اقشا اۋدارۋدى تالاپ ەتپەيدى.
مينيسترلىك ازاماتتارلى بەيتانىس ادامداردىڭ نۇسقاۋلارىن ورىنداماۋعا، كەز كەلگەن اقپاراتتى تەك رەسمي دەرەككوزدەر ارقىلى تەكسەرۋگە جانە كۇماندى جاعداي تۋىنداسا، دەرەۋ قۇقىق قورعاۋ ورگاندارىنا جۇگىنۋگە شاقىردى.
