Qazaqstanda alaıaqtyqtyń jańa tásili taralyp jatyr, dep habarlaıdy Dalanews.kz.

Elimizde alaıaqtyqtyń jańa túri taralyp jatyr, onda qaskúnemder ózderin kompanıalardyń, memlekettik organdardyń jáne joǵary oqý oryndarynyń basshylary retinde tanystyrady.

Alaıaqtar jalǵan akkaýnttar men nómirlerdi paıdalanyp, qyzmetkerlerge telefon arqyly nemese messendjerler arqyly habarlasady. Olar derekterdiń taralýy nemese qarjynyń urlaný qaýipin syltaýratyp, jaǵdaıdy ádeıi kúrdelendirip kórsetedi. Jedel áreket etýdi talap etedi jáne psıhologıalyq qysym jasaıdy.

Osydan keıin azamattarǵa “mamandar” nemese “quqyq qorǵaý organdarynyń qyzmetkerleri” habarlasatyny aıtylyp, olardyń nusqaýlaryn buljytpaı oryndaý talap etiledi.

Saldarynan alaıaqtar adamdardy aqshasyn alyp, ony “qaýipsiz shottarǵa” aýdarýǵa kóndiredi. Qarajat qolǵa túsken soń, baılanys birden úziledi.

Qaskúnemder zamanaýı tehnologıalardy keńinen qoldanady. Atap aıtqanda, nómirdi aýystyrý, daýysty ózgertý sıaqty tásildermen azamattardyń senimine kirip, qyraǵylyǵyn tómendetýge tyrysady.

İİM eskertedi: bankter men memlekettik organdardyń qyzmetkerleri eshqashan telefon arqyly aqsha aýdarýdy talap etpeıdi.

Mınıstrlik azamattarly beıtanys adamdardyń nusqaýlaryn oryndamaýǵa, kez kelgen aqparatty tek resmı derekkózder arqyly tekserýge jáne kúmándi jaǵdaı týyndasa, dereý quqyq qorǵaý organdaryna júginýge shaqyrdy.