بەلگىلى جۋرناليست ءارى مەديامەنەدجەر دانەش بايبولاتوۆ "جەتىسۋ" تەلەارناسىنىڭ ديرەكتورى قىزمەتىنە تاعايىندالدى، دەپ حابارلايدى Dalanews.kz.
دانەش بايبولاتوۆ – وتاندىق جۋرناليستيكا سالاسىندا ۇزاق جىلدىق تاجىريبەسى بار مامان. ءال-فارابي اتىنداعى قازاق ۇلتتىق ۋنيۆەرسيتەتى جۋرناليستيكا فاكۋلتەتىنىڭ تۇلەگى. 2002 جىلى «تەليەۆيزيالىق جۋرناليستيكا» ماماندىعى بويىنشا، كەيىن وسى وقۋ ورنىندا ماگيستراتۋرانى بىتىرگەن.
بۇعان دەيىن ول ءتۇرلى مەدياجوبالار مەن تەلەارنالاردا، باسپا ءسوز قىزمەتى سالاسىندا جۇمىس اتقاردى.
ەڭبەك جولىن «Gala TV» پروديۋسەرلىك ورتالىعى «حابار جەر»، «دەلا ارمەيسكيە» باعدارلامالارىندا جۋرناليست، رەداكتور رەتىندە باستاپ، ءار جىلدارى «پروگرەسس-PR» اگەنتتىگىندە PR-مامان، «ازاتتىق» حالىقارالىق راديوسىندا رەپورتەر، «جاس تولقىن» جاستار باعدارلاماسىنىڭ اۆتورى، رەداكتورى، جۇرگىزۋشىسى، اباي اتىنداعى قازۇپۋ-دىڭ حالىقارالىق قاتىناستار فاكۋلتەتىندە وقىتۋشى بولدى.
كەيىن «حابار» ارناسىنداعى «سەرپىن» ەكونوميكالىق، اقپاراتتىق-تالداما باعدارلاماسىنىڭ اۆتورى،جۇرگىزۋشىسى،جاۋاپتى رەداكتورى، «اس-ارقاۋ» باعدارلاماسىنىڭ جاۋاپتى رەداكتورى، «ەل ارنا» ارناسى «شىركىن life» رەاليتي-شوۋىنىڭ رەداكتورى، «استانا» تەلەارناسى جاڭالىقتار ءتىلشىسى رەتىندە ەڭبەك ەتتى.
ءار جىلدارى «پانوراما» پروديۋسەر ورتالىعى جاڭالىقتار ءبولىمىنىڭ پروديۋسەرى، «اپورت» تەلەكومپانياسى تەلەباعدارلامالار رەداكتورى، «جاس الاش» گازەتىندە ءتىلشى، رەسپۋبليكالىق فيزيكا-ماتەماتيكا مەكتەبىنىڭ باسپا ءسوز حاتشىسى، «نوۆوستي سەنترالنوي ازيي» حالىقارالىق جوباسىنىڭ ۆەب-رەداكتورى، «ەۆرازيا ءبىرىنشى ارناسى» «زاڭ سويلەسىن» باعدارلاماسىنىڭ جەتەكشىسى، جۇرگىزۋشىسى، الماتى كوپسالالى كلينيكالىق اۋرۋحاناسىنىڭ (امكب) باسپا ءسوز حاتشىسى، ق ر دسم ۇفعو باسپا ءسوز حاتشىسى، «الماتى» تەلەارناسى «شەشىمى بار» باعدارلاماسىنىڭ جۇرگىزۋشىسى بولدى.
2023 جىلدان بەرى «حابار» تەلەارناسى اقپاراتتىق-ساراپتامالىق باعدارلامالار قىزمەتىنىڭ باسشىسى، «ءداستۇر» باعدارلاماسىنىڭ اۆتورى، جۇرگىزۋشىسى، 2024 جىلدان «حابار» تەلەارناسى تاڭعى باعدارلامالار ءبولىمىنىڭ باسشىسى قىزمەتىن اتقارىپ كەلدى.
