الماتىدا قالاسىنداعى پەريناتولوگيا جانە بالالار كارديوحيرۋرگياسى ورتالىعىنىڭ جانىنان 3 ايدان 3 جاسقا دەيىنگى ەرەكشە قاجەتتىلىكتەرى بار بالالارعا ارنالعان جاڭا مەديسينالىق وڭالتۋ مەكەمەسى – «قامقورلىق» ەرتە ارالاسۋ ورتالىعى اشىلدى. بۇل ءبىر مەكەمەنىڭ اشىلۋى ەمەس، بۇل – مىڭداعان اتا-انانىڭ ءۇمىتى مەن جۇزدەگەن بالانىڭ ەرتەڭگى كۇنىنە باعىتتالعان ناقتى قادام. ەلىمىزدە ەرەكشە كۇتىمدى قاجەت ەتەتىن بالالارعا دەگەن كوزقاراستىڭ وزگەرىپ، جۇيەلى تاسىلگە بەت بۇرعانىنىڭ ايعاعى.
ورتالىقتىڭ اشىلۋىنا ق ر پرەزيدەنتى جانىنداعى حالىقتىڭ الەۋمەتتىك وسال توپتارىنىڭ قۇقىقتارى جونىندەگى ۋاكىل كەنجەعۇل سەيتجان، ءماجىلىس دەپۋتاتتارى، قالالىق دەنساۋلىق ساقتاۋ باسقارماسىنىڭ جەتەكشىلەرى، «سامۇرىق-قازىنا»، «قازاقستان حالقىنا» قورلارى مەن «قامقورلىق» كورپوراتيۆتىك قورىنىڭ وكىلدەرى قاتىستى. مۇنىڭ ءوزى بۇل باستامانىڭ تەك الەۋمەتتىك جوبا ەمەس، مەملەكەت پەن قوعامنىڭ ستراتەگيالىق سەرىكتەستىگىنە اينالعانىن كورسەتەدى.
جاڭا ورتالىقتىڭ نەگىزگى ەرەكشەلىگى – ونىڭ ءبىر عانا مەديسينالىق باعىتپەن شەكتەلمەي، دەنساۋلىق ساقتاۋ، ءبىلىم بەرۋ جانە الەۋمەتتىك قورعاۋ جۇيەلەرىنىڭ الەۋەتىن بىرىكتىرۋى. بۇل – تەك ەمدەۋ عانا ەمەس، بالانىڭ ءومىر ساپاسىن تۇتاستاي جاقسارتۋعا باعىتتالعان پلاتفورما. ەرتە ارالاسۋ دەگەنىمىز – بالانىڭ دامۋىنداعى قيىندىقتاردى مۇمكىندىگىنشە ەرتە انىقتاپ، سوعان سايكەس وڭالتۋ شارالارىن باستاۋ. دۇنيەجۇزىلىك دەنساۋلىق ساقتاۋ ۇيىمىنىڭ ساراپشىلارى 3-6 اي ارالىعىنداعى كەزەڭدى “التىن ۋاقىت” دەپ اتايدى. سەبەبى ءدال وسى كەزەڭدە باستالعان وڭالتۋ جۇمىستارى مۇگەدەكتىك تاۋەكەلىن ەداۋىر ازايتادى.
ورتالىقتا بارلىق جاعداي جاسالعان: شۋنگيتتى جانە تۇزدى بولمەلەر، سەنسورلىق ورتا، يممەرسيالىق ۆاننا، ياعني بالانىڭ سەزىمدىك جانە موتوريكا جۇيەسىن دامىتۋعا ارنالعان جاڭا بۋىن تەحنولوگيالارى. بالالارمەن نيەۆروپاتولوگ، رەابيليتولوگ، لوگوپەد، پسيحولوگ، دەفەكتولوگ، الەۋمەتتىك قىزمەتكەر جانە تاعى باسقا مامانداردان قۇرالعان مۋلتيديسيپلينارلىق كوماندا جۇمىس ىستەيدى. ءار بالا ءۇشىن جەكە باعدارلاما جاسالادى، ول ونىڭ قاجەتتىلىكتەرىنە ناقتى نەگىزدەلەدى. ەڭ باستىسى – قىزمەتتىڭ ءبارى دە مىندەتتى الەۋمەتتىك مەديسينالىق ساقتاندىرۋ اياسىندا تەگىن كورسەتىلەدى.
ستاتيستيكاعا سۇيەنسەك، بۇگىندە الماتىدا 676 000-نان استام بالا بار، ولاردىڭ ىشىندە 7 460 بالادا مۇگەدەكتىك تىركەلگەن. كوپ تارالعان پاتولوگيالار – دسپ، سويلەۋ جانە پسيحوموتورلىق دامۋدىڭ تەجەلۋى، ورتالىق جۇيكە جۇيەسىنىڭ زاقىمدانۋى، تىرەك-قيمىل جۇيەسىنىڭ تۋا بىتكەن كەمىستىكتەرى. جاڭا ورتالىق ءدال وسىنداي دياگنوزى بار بۇلدىرشىندەر مەن ولاردىڭ اتا-انالارى ءۇشىن شىنايى كومەك الاڭىنا اينالماق.
ورتالىق جىلىنا 600 بالاعا دەيىن قابىلداي الادى. 21 كۇندىك كۋرس ىشىندە اتا-انالار بالانىڭ دامۋىنا قاجەتتى كەشەندى ەمدى تەك ءبىر جەردەن الا الادى. بۇل – تەك وڭالتۋ عانا ەمەس، بولاشاققا باستار كوپىر. ايتا كەتەرلىگى، مۇندا تەك بۇگىنگى مەديسينالىق كومەكتەرمەن شەكتەلمەيدى. 2022 جىلدان بەرى پەريناتولوگيا ورتالىعىندا ۇرىقتى قورعاۋ ورتالىعى دا جۇمىس ىستەيدى. ال 2024 جىلدان باستاپ "ءبىر كۇندىك كلينيكا" جوباسى ارقىلى 4 855 جۇكتى ايەلگە حروموسومالىق انوماليالارعا ەرتە سكرينينگ جۇرگىزىلگەن.
ال ورتالىقتىڭ حيرۋرگيالىق الەۋەتى دە جوعارى دەڭگەيدە: قازاقستاندا العاش رەت ۇرىق حيرۋرگياسى – قۇرساقىشىلىك وپەراسيالار جۇرگىزىلۋدە. قازىرگە دەيىن 40-تان استام وپەراسيا ءساتتى ءوتىپ، 30-دان استام نارەستە ومىرگە ساۋ بولىپ كەلگەن.
قالا اكىمدىگى مەكەمەنىڭ ينفراقۇرىلىمىن جاڭعىرتۋعا دا ەرەكشە نازار اۋدارىپ وتىر. 2024 جىلدىڭ سوڭىنا دەيىن ەمحانانىڭ كۇردەلى جوندەۋى اياقتالادى. سونىمەن قاتار 24 مىڭ شارشى مەتردەن استام اۋداندى قامتيتىن جاڭا جوبالار – لامينارلىق اعىنمەن جابدىقتالعان وپەراسيالىق بلوك، اقىلدى وپەراسيا بولمەلەرى، انگيوبلوكتى قايتا قۇرۋ، گوسپيتالدىق فارماسيا ءبولىمىن اشۋ جوسپارلانعان. بۇل ءوز كەزەگىندە مەكەمەنىڭ وتكىزۋ قابىلەتىن ارتتىرىپ، ءينۆازيۆتى وپەراسيالار اياسىن كەڭەيتپەك.
بولاشاقتا بوسانعاننان كەيىنگى حيرۋرگيالىق ورتالىق قۇرىلىپ، تبا بار نارەستەلەردىڭ دياگنوستيكاسى، حيرۋرگيالىق ەمى جانە وڭالتۋ شارالارى ءبىر جەردە شوعىرلانباق.
وسىلايشا، الماتىدا باستالعان «قامقورلىق» ورتالىعىنىڭ تاريحى تەك ءبىر مەكەمەنىڭ شەڭبەرىمەن شەكتەلمەيدى. بۇل – الەۋمەتتىك ساياساتتىڭ جاڭا پاراديگماسىنا قاراي جاسالعان ءساتتى قادام. بۇل – تەك قازىرگە ەمەس، بولاشاق ۇرپاقتىڭ دەنساۋلىعى مەن الەۋەتىنە سالىنعان ينۆەستيسيا. ەڭ باستىسى – مۇندا قۇر ءسوز ەمەس، ناقتى ءىس بار.
