19 ساۋىردە الماتىدا توعىزىنشى Almaty Half Marathon ءوتىپ، وعان الەمنىڭ 44 ەلىنەن 10 000-نان استام ادام قاتىستى. «ءبىرىنشى بولۋعا باتىلدىق» كورپوراتيۆتىك قورى ۇيىمداستىرعان جارتىلاي مارافون ءداستۇرلى تۇردە قازاقستانداعى ءىرى جۇگىرۋ ماۋسىمىنىڭ باستاۋىن بىلدىرەدى. بيىل الماتىعا 44 ەلدەن 900-گە جۋىق جەلاياق كەلىپ، توعىز جىل ىشىندەگى شەتەلدىك قاتىسۋشىلار سانى بويىنشا رەكورد ورنادى، دەپ حابارلايدى Dalanews.kz
2026 جىلى 19 ساۋىردە وتكەن Almaty Half Marathon-عا 44 ەلدەن 10 000-نان استام ادام جينالدى. جارىس توعىزىنشى رەت ۇيىمداستىرىلىپ وتىر. قاتىسۋشىلاردىڭ دەنى قازاقستاندىق بولعانىمەن، جىل سايىن قاتىسۋشىلار گەوگرافياسى كەڭەيىپ كەلەدى. بيىل جارىسقا 821 شەتەلدىك سپورتشى (جالپى سانىنىڭ شامامەن 8%-ى) ارنايى قاتىسۋ ءۇشىن الماتىعا كەلدى.
ەڭ كوپ قاتىسقان ەلدەردىڭ ۇشتىگى: رەسەي (346)، قىرعىزستان (146) جانە وزبەكستان (81). سونىمەن قاتار جۇڭگو (37)، اقش (32)، ۇلىبريتانيا (28)، ۋكراينا (21) جانە بەلارۋس (18) ەلدەرىنەن دە قاتىسۋشىلار بولدى. بۇل دودا ازيا، ەۋروپا، سولتۇستىك جانە وڭتۇستىك امەريكا، افريكا مەن تاياۋ شىعىس ەلدەرىنەن كەلگەن جەلاياقتاردى بىرىكتىرىپ، الماتىنىڭ حالىقارالىق جۇگىرۋ كارتاسىنداعى ماڭىزدى ورتالىق ەكەنىن تاعى ءبىر مارتە دالەلدەدى.
«سپورتتىق تۋريزم – قالانى حالىقارالىق دەڭگەيدە تانىتۋدىڭ ەڭ ءتيىمدى قۇرالدارىنىڭ ءبىرى. سونداي-اق، جۇگىرۋشىلەر كوبىنە جالعىز كەلمەيدى: ولارمەن بىرگە وتباسى مۇشەلەرى مەن دوستارى دا كەلەدى، بۇل ءوز كەزەگىندە تۋريستەر سانىن ارتتىرادى. كوپتەگەن شەتەلدىك قوناق ءۇشىن بۇل جارىس قازاقستانمەن العاشقى تانىستىققا اينالىپ، قايتا ورالۋعا سەبەپ بولادى. ءبىزدىڭ زەرتتەۋىمىزگە سايكەس، باسقا قالالاردان جانە شەتەلدەن كەلگەن قاتىسۋشىلاردىڭ 79،3%-ى الماتىعا قايتا كەلۋدى جوسپارلاپ وتىر. بۇل جاڭا ساپارلار مەن قالانىڭ ينۆەستيسيالىق تارتىمدىلىعىنىڭ ارتۋىن بىلدىرەدى»، – دەدى «ءبىرىنشى بولۋ - باتىلدىق» كورپوراتيۆتىك قورى قامقورشىلىق كەڭەسىنىڭ ءتوراعاسى عالىمجان ەسەنوۆ.
ۇيىمداستىرۋشىلار ەكولوگيالىق تالاپتارعا ەرەكشە نازار اۋدارادى: ءبىر رەتتىك ماتەريالداردى پايدالانۋدى ازايتىپ، ستارتتىق جيىنتىقتاعى باسپا ونىمدەرىنەن باس تارتىپ، قالدىقتاردى قايتا وڭدەۋمەن اينالىساتىن جەرگىلىكتى كومپانيالارمەن ىنتىماقتاسادى. EcoNetwork سەرىكتەسى مارەدە ينتەراكتيۆتى ەكولوگيالىق ايماق ۇيىمداستىرىپ، جارىس باعىتى بويىندا پلاستيك قالدىقتاردى جيناۋدى قامتاماسىز ەتتى. جينالعان قالدىقتاردىڭ بارلىعى قايتا وڭدەۋگە جىبەرىلەدى.
سونداي-اق، سورە الدىندا قاتىسۋشىلار قاجەتسىز، ءبىراق جارامدى قالىڭ كيىمدەرىن قالدىرا الدى – «جىلۋ» جوباسىنىڭ كومانداسى ولاردى جيناپ، سۇرىپتاپ، مۇقتاج جاندارعا جەتكىزدى.
Almaty Half Marathon قاتىسۋشىلار ءۇشىن بۇرىنعىدان دا جايلى بولا ءتۇستى: مارەگە جەتۋ ايماعىندا انا مەن بالا بولمەسى بار، بولەك سانيتارلىق توراپتار ۇيىمداستىرىلىپ، ەرەكشە قاجەتتىلىگى بار جاندارعا ارنالعان ارنايى دارەتحانالار ورناتىلدى. بۇل تاجىريبە قازاقستانداعى جۇگىرۋ جارىستارىن ۇيىمداستىرۋشىلار اراسىندا العاشقىلاردىڭ ءبىرى بولىپ ەنگىزىلدى.
ايتا كەتەيىك، 31 مامىر كۇنى وتەتىن Astana Half Marathon جارىسىنا تىركەلۋ جالعاسۋدا. بۇل ءىس-شارا ەلىمىزدىڭ تۇكپىر-تۇكپىرىنەن جۇگىرۋ اۋەسقويلارىن بىرىكتىرەدى.
سونىمەن قاتار 2026 جىلى 27 قىركۇيەكتە وتەتىن 15ء-شى مەرەيتويلىق Almaty Marathon-عا دا تىركەلۋ اشىق. بۇل ورتالىق ازياداعى ەڭ ءىرى جۇگىرۋ جارىسى.
Almaty Half Marathon الماتى قالاسى اكىمدىگىنىڭ قولداۋىمەن ءوتتى.
