19 sáýirde Almatyda toǵyzynshy Almaty Half Marathon ótip, oǵan álemniń 44 elinen 10 000-nan astam adam qatysty. «Birinshi bolýǵa batyldyq» korporativtik qory uiymdastyrǵan jartylai marafon dástúrli túrde Qazaqstandaǵy iri júgirý maýsymynyń bastaýyn bildiredi. Biyl Almatyǵa 44 elden 900-ge jýyq jelaiaq kelip, toǵyz jyl ishindegi sheteldik qatysýshylar sany boiynsha rekord ornady, dep habarlaidy Dalanews.kz
2026 jyly 19 sáýirde ótken Almaty Half Marathon-ǵa 44 elden 10 000-nan astam adam jinaldy. Jarys toǵyzynshy ret uiymdastyrylyp otyr. Qatysýshylardyń deni qazaqstandyq bolǵanymen, jyl saiyn qatysýshylar geografiiasy keńeiip keledi. Biyl jarysqa 821 sheteldik sportshy (jalpy sanynyń shamamen 8%-y) arnaiy qatysý úshin Almatyǵa keldi.
«Sporttyq týrizm – qalany halyqaralyq deńgeide tanytýdyń eń tiimdi quraldarynyń biri. Sondai-aq, júgirýshiler kóbine jalǵyz kelmeidi: olarmen birge otbasy músheleri men dostary da keledi, bul óz kezeginde týrister sanyn arttyrady. Kóptegen sheteldik qonaq úshin bul jarys Qazaqstanmen alǵashqy tanystyqqa ainalyp, qaita oralýǵa sebep bolady. Bizdiń zertteýimizge sáikes, basqa qalalardan jáne shetelden kelgen qatysýshylardyń 79,3%-y Almatyǵa qaita kelýdi josparlap otyr. Bul jańa saparlar men qalanyń investitsiialyq tartymdylyǵynyń artýyn bildiredi», – dedi «Birinshi bolý - batyldyq» korporativtik qory qamqorshylyq keńesiniń tóraǵasy Ǵalymjan Esenov.
Uiymdastyrýshylar ekologiialyq talaptarǵa erekshe nazar aýdarady: bir rettik materialdardy paidalanýdy azaityp, starttyq jiyntyqtaǵy baspa ónimderinen bas tartyp, qaldyqtardy qaita óńdeýmen ainalysatyn jergilikti kompaniialarmen yntymaqtasady. EcoNetwork seriktesi márede interaktivti ekologiialyq aimaq uiymdastyryp, jarys baǵyty boiynda plastik qaldyqtardy jinaýdy qamtamasyz etti. Jinalǵan qaldyqtardyń barlyǵy qaita óńdeýge jiberiledi.
Sondai-aq, sóre aldynda qatysýshylar qajetsiz, biraq jaramdy qalyń kiimderin qaldyra aldy – «Jylý» jobasynyń komandasy olardy jinap, suryptap, muqtaj jandarǵa jetkizdi.
Almaty Half Marathon qatysýshylar úshin burynǵydan da jaily bola tústi: márege jetý aimaǵynda ana men bala bólmesi bar, bólek sanitarlyq toraptar uiymdastyrylyp, erekshe qajettiligi bar jandarǵa arnalǵan arnaiy dárethanalar ornatyldy. Bul tájiribe Qazaqstandaǵy júgirý jarystaryn uiymdastyrýshylar arasynda alǵashqylardyń biri bolyp engizildi.
Aita keteiik, 31 mamyr kúni ótetin Astana Half Marathon jarysyna tirkelý jalǵasýda. Bul is-shara elimizdiń túkpir-túkpirinen júgirý áýesqoilaryn biriktiredi.
Sonymen qatar 2026 jyly 27 qyrkúiekte ótetin 15-shi mereitoilyq Almaty Marathon-ǵa da tirkelý ashyq. Bul Ortalyq Aziiadaǵy eń iri júgirý jarysy.
Almaty Half Marathon Almaty qalasy ákimdiginiń qoldaýymen ótti.
