كاسپيي تەڭىزى جاعالاۋىندا تابىلعان ءولى يتبالىقتار سانى 97-دەن 191-گە دەيىن ءوستى،دەپ حابارلايدى Dalanews.kz.
بۇل تۋرالى قازاقستان رەسپۋبليكاسى اۋىل شارۋاشىلىعى مينيسترلىگىنىڭ بالىق شارۋاشىلىعى كوميتەتى حابارلادى.
ۆەدومستۆو مالىمەتىنشە، 2026 جىلعى 17 ءساۋىر ساعات 17:00-دەگى جاعداي بويىنشا ماڭعىستاۋ وبلىسىنىڭ ءتۇپقاراعان اۋدانى اۋماعىنداعى كاسپيي تەڭىزى جاعالاۋىنان قاتتى شىرىگەن (ىدىراۋدىڭ 2–4 كەزەڭى) 191 يتبالىقتىڭ ولەكسەسى انىقتالعان. بۇل دەرەك اۋداندىق ىشكى ىستەر بولىمىنە تىركەلگەن.
سونىمەن قاتار، كاسپيي يتبالىعىن زەرتتەۋمەن اينالىساتىن عىلىمي ۇيىم – گيدروبيولوگيا جانە ەكولوگيا ينستيتۋتى وقيعا ورنىندا ولەكسەلەردى اشىپ، مۇمكىن بولعان ۇلگىلەردەن سىناما العان. ال ماڭعىستاۋ وبلىسى بويىنشا ەكولوگيا دەپارتامەنتى سۋ مەن توپىراقتان سىناما جيناعان.
الايدا ولەكسەلەردىڭ قاتتى ىدىراۋىنا بايلانىستى ۆەتەريناريالىق باقىلاۋ جانە قاداعالاۋ كوميتەتىنىڭ ماماندارى جۇقپالى اۋرۋلاردى انىقتاۋ ءۇشىن پاتولوگيالىق ماتەريالداردان سىناما الا الماعان.
قازىرگى ۋاقىتتا كاسپيي تەڭىزى جاعالاۋىن باقىلاۋ جالعاسىپ جاتىر. جەرگىلىكتى اتقارۋشى ورگاندار، بالىق شارۋاشىلىعى ينسپەكسياسى جانە باسقا دا مەكەمەلەردىڭ قىزمەتكەرلەرى ولەكسەلەردى جيناپ، سانيتارلىق تالاپتارعا ساي جويعان.
مامانداردىڭ ايتۋىنشا، كوپجىلدىق زەرتتەۋلەرگە سۇيەنسەك، يتبالىقتاردىڭ قىرىلۋىنا يممۋنيتەتتىڭ السىرەۋى جانە اعزانىڭ جالپى توزىمدىلىگىنىڭ تومەندەۋى سەبەپ بولۋى مۇمكىن. بۇل ءوز كەزەگىندە جانۋارلاردىڭ جۇقپالى اۋرۋلارعا بەيىمدىلىگىن ارتتىرادى.
ەسكە سالايىق، بۇعان دەيىن ماڭعىستاۋ وبلىسىندا كاسپيي جاعالاۋىنا جۇزگە جۋىق ءولى يتبالىقتىڭ شىعارىلعانى حابارلانعان ەدى. ماماندار مۇنى قاتتى باتىس جەلىمەن بايلانىستىرعان. وقيعانىڭ سەبەپتەرىن انىقتاۋ جانە سالدارىن جويۋ ءۇشىن ۆەدومستۆوارالىق جۇمىس توبى قۇرىلعان. وقيعا ورنىنا ەكولوگتار، ۆەتەرينارلىق قىزمەت وكىلدەرى، پوليسيا جانە عىلىمي ۇيىمداردىڭ ماماندارى بارعان.
