ماڭعىستاۋ وبلىسىنىڭ ماڭعىستاۋ اۋدانىندا نوسەر جاڭبىر مەن قاتتى جەلدىڭ سالدارىنان ءىرى شىعىن تىركەلدى. الدىن الا مالىمەت بويىنشا، 100-دەن استام جىلقى قىرىلىپ، اۋىل شارۋاشىلىعى سالاسىنا ايتارلىقتاي زيان كەلگەن، دەپ حابارلايدى Dalanews.kz
Lads.kz اگەنتتىگىنىڭ جازۋىنشا، نەگىزگى شىعىن اقشىمىراۋ اۋىلى ماڭىندا جانە سايوتەس پەن 7-رازەزد ارالىعىنداعى اۋماقتا بايقالعان. بۇل ايماق اۋدان ورتالىعىنان شامامەن 120–150 شاقىرىم قاشىقتىقتا ورنالاسقان. سونىمەن قاتار، تەمىرجول بويىندا جۇرگەن وزگە دە مالدار اپات سالدارىنان قىرىلعانى حابارلاندى.
قازىرگى ۋاقىتتا قىرىلعان مالدىڭ ناقتى سانى ءالى انىقتالىپ جاتىر. شارۋاشىلىق يەلەرى مال باسىن تولىق ەسەپتەپ ۇلگەرمەگەن. جەرگىلىكتى بيلىك وكىلدەرىنىڭ مالىمەتىنشە، 14–15 ءساۋىر كۇندەرى بولعان قولايسىز اۋا رايى سايوتەس ەلدى مەكەنىندەگى ءبىرقاتار نىسانداردىڭ شاتىرلارىن زاقىمداعان.
اپات سالدارىنان كەيبىر تابىنداردى سۋ اعىزىپ اكەتسە، ەندى ءبىر بولىگى باعىتىنان جاڭىلىپ، سورتاڭ جانە شامادان تىس ىلعالدانعان جەرلەرگە كىرىپ كەتكەن. سونىڭ سالدارىنان مال باتپاققا باتىپ، شىعىنعا ۇشىراعان.
جەرگىلىكتى تۇرعىنداردىڭ ايتۋىنشا، ءاربىر شارۋاشىلىق بىرنەشە باستان ون باسقا دەيىن مالىنان ايىرىلعان. اۋىل حالقى جاعدايدىڭ كۇردەلەنە ءتۇسۋى مۇمكىن ەكەنىن ايتىپ، ءتيىستى مەملەكەتتىك ورگانداردان شۇعىل كومەك كۇتۋدە.
زارداپ كولەمىن باعالاۋ ءۇشىن 16–17 ءساۋىر كۇندەرى ارنايى كوميسسيا قۇرىلىپ، ونىڭ قۇرامىنا مەملەكەتتىك ورگانداردىڭ وكىلدەرى ەنگىزىلدى. كوميسسيا شارۋاشىلىق يەلەرىمەن بىرلەسىپ جۇمىس جۇرگىزۋدە. رەسمي مالىمەتكە سايكەس، اۋىل شارۋاشىلىعى جانۋارلارىن سايكەستەندىرۋ بازاسىندا تىركەلگەن مال شىعىنى بويىنشا وتەماقى تولەۋ ماسەلەسى قولدانىستاعى زاڭناما اياسىندا قارالادى. سوڭعى شەشىمدى توتەنشە جاعدايلار، اۋىل شارۋاشىلىعى جانە ۆەتەريناريا سالاسىنداعى ۋاكىلەتتى ورگاندار قابىلدايدى.
ىزدەستىرۋ-قۇتقارۋ جۇمىستارىنا بەينەۋ اۋدانىنان «ترەكول» جول تالعامايتىن كولىگى جىبەرىلىپ، دروندار ارقىلى اۋەدەن باقىلاۋ ۇيىمداستىرىلعان. سونىمەن قاتار، جەدەل شتاب مۇناي-گاز كومپانيالارىنا قوسىمشا تەحنيكا تارتۋ جونىندە تاپسىرما بەرگەن.
قازىرگى تاڭدا وڭىردە بارلىق كۇش پەن قۇرال جۇمىلدىرىلعان. ءىرى كاسىپورىنداردىڭ تەحنيكاسى، توتەنشە جاعدايلار قىزمەتى جانە جەرگىلىكتى اتقارۋشى ورگاندار بىرلەسە جۇمىس ىستەۋدە. سۋ سورۋ، ينفراقۇرىلىمدى قالپىنا كەلتىرۋ جانە زارداپتى ازايتۋ شارالارى كۇشەيتىلگەن رەجيمدە جالعاسىپ جاتىر. مامانداردىڭ ايتۋىنشا، جاعداي ەرەكشە باقىلاۋدا.
