Mańǵystaý oblysynyń Mańǵystaý aýdanynda nóser jańbyr men qatty jeldiń saldarynan iri shyǵyn tirkeldi. Aldyn ala málimet boiynsha, 100-den astam jylqy qyrylyp, aýyl sharýashylyǵy salasyna aitarlyqtai ziian kelgen, dep habarlaidy Dalanews.kz
Lads.kz agenttiginiń jazýynsha, negizgi shyǵyn Aqshymyraý aýyly mańynda jáne Saiótes pen 7-razezd aralyǵyndaǵy aýmaqta baiqalǵan. Bul aimaq aýdan ortalyǵynan shamamen 120–150 shaqyrym qashyqtyqta ornalasqan. Sonymen qatar, temirjol boiynda júrgen ózge de maldar apat saldarynan qyrylǵany habarlandy.
Qazirgi ýaqytta qyrylǵan maldyń naqty sany áli anyqtalyp jatyr. Sharýashylyq ieleri mal basyn tolyq eseptep úlgermegen. Jergilikti bilik ókilderiniń málimetinshe, 14–15 sáýir kúnderi bolǵan qolaisyz aýa raiy Saiótes eldi mekenindegi birqatar nysandardyń shatyrlaryn zaqymdaǵan.
Apat saldarynan keibir tabyndardy sý aǵyzyp áketse, endi bir bóligi baǵytynan jańylyp, sortań jáne shamadan tys ylǵaldanǵan jerlerge kirip ketken. Sonyń saldarynan mal batpaqqa batyp, shyǵynǵa ushyraǵan.
Jergilikti turǵyndardyń aitýynsha, árbir sharýashylyq birneshe bastan on basqa deiin malynan aiyrylǵan. Aýyl halqy jaǵdaidyń kúrdelene túsýi múmkin ekenin aityp, tiisti memlekettik organdardan shuǵyl kómek kútýde.
Zardap kólemin baǵalaý úshin 16–17 sáýir kúnderi arnaiy komissiia qurylyp, onyń quramyna memlekettik organdardyń ókilderi engizildi. Komissiia sharýashylyq ielerimen birlesip jumys júrgizýde. Resmi málimetke sáikes, aýyl sharýashylyǵy janýarlaryn sáikestendirý bazasynda tirkelgen mal shyǵyny boiynsha ótemaqy tóleý máselesi qoldanystaǵy zańnama aiasynda qaralady. Sońǵy sheshimdi tótenshe jaǵdailar, aýyl sharýashylyǵy jáne veterinariia salasyndaǵy ýákiletti organdar qabyldaidy.
Izdestirý-qutqarý jumystaryna Beineý aýdanynan «Trekol» jol talǵamaityn kóligi jiberilip, drondar arqyly áýeden baqylaý uiymdastyrylǵan. Sonymen qatar, jedel shtab munai-gaz kompaniialaryna qosymsha tehnika tartý jóninde tapsyrma bergen.
Qazirgi tańda óńirde barlyq kúsh pen qural jumyldyrylǵan. Iri kásiporyndardyń tehnikasy, tótenshe jaǵdailar qyzmeti jáne jergilikti atqarýshy organdar birlese jumys isteýde. Sý sorý, infraqurylymdy qalpyna keltirý jáne zardapty azaitý sharalary kúsheitilgen rejimde jalǵasyp jatyr. Mamandardyń aitýynsha, jaǵdai erekshe baqylaýda.
