قازاقستاندا بەنزين جانە باسقا دا جانارماي ماتەريالدارىن ەلدەن شىعارۋعا قويىلعان ۋاقىتشا تىيىمدى ۇزارتۋ كوزدەلىپ وتىر، دەپ حابارلايدى Dala News.
ەنەرگەتيكا مينيسترلىگىنىڭ بۇيرىق جوباسىنا سايكەس، 2026 جىلعى 21 مامىردان 21 قاراشاعا دەيىن مۇناي ونىمدەرىن اۆتوكولىك ارقىلى، ونىڭ ىشىندە ەۋرازيالىق ەكونوميكالىق وداق ەلدەرىنە شىعارۋعا تىيىم ساقتالادى. سونىمەن قاتار تەمىرجول ارقىلى جەڭىل ديستيللياتتاردى ەكسپورتتاۋعا قاتىستى شەكتەۋلەر دە كۇشىندە قالادى.
قۇجاتتا 2026 جىلعى 1 شىلدەدەن 31 جەلتوقسانعا دەيىن ەۋرازيالىق ەكونوميكالىق وداقتىڭ كەدەندىك اۋماعىنان تىس جەرلەرگە جەڭىل ديستيللياتتاردى، اۆياسيالىق كەروسيندى، ديزەل وتىنىن، گازويلدەردى، تولۋول مەن كسيلولدى جانە مۇناي بيتۋمىن شىعارۋعا قوسىمشا تىيىم ەنگىزۋ قاراستىرىلعان.
مينيسترلىك بۇل شارالار ىشكى نارىقتاعى تۇراقتىلىقتى ساقتاۋ جانە ەلدىڭ ەنەرگەتيكالىق قاۋىپسىزدىگىن قامتاماسىز ەتۋ ءۇشىن قاجەت ەكەنىن اتاپ ءوتتى.
