الماتى اكىمى ەربولات دوسايەۆ 2024 جىلدىڭ جەلتوقسانىندا كۇردەلى جوندەۋدەن وتكەن پەريناتولوگيا جانە بالالار كارديوحيرۋرگياسى ورتالىعىنىڭ بازاسىندا قۇرىلعان «قامقورلىق» ەرتە ارالاسۋ ورتالىعىنا باردى. جاڭا ورتالىقتا دامۋىندا ءتۇرلى اۋىتقۋى بار جانە شالا تۋعان بالالارعا كەشەندى قولداۋ كورسەتىلەدى،- دەپ حابارلايدى Dalanews.kz
الماتى اكىمدىگى مەن «قازاقستان حالقىنا» قورى باستاماشىلىق ەتكەن بۇل بىرەگەي جوبا مەديسينالىق كومەكتەن بولەك، الەۋمەتتىك جانە ءبىلىم بەرۋ قولداۋىن دا قامتيدى.
مۇندا بالالاردىڭ ۇيلەسىمدى ءوسۋى مەن بەيىمدەلۋىنە جاعداي جاسالعان. ولارعا ابيليتاسيا (جاڭا داعدىلاردى دامىتۋ)، كوگنيتيۆتى، موتورلىق جانە كوممۋنيكاتيۆتى قابىلەتىن دامىتۋعا ارنالعان وقىتۋ جۇرگىزىلەدى.
426 شارشى مەتر اۋماقتا بىرەگەي تەراپيەۆتىك كەڭىستىكتەر قاراستىرىلعان: شۋنگيت جانە تۇزدى بولمەلەر، سەنسورلىق قابىلداۋدى جاقسارتۋعا ارنالعان يممەرسيالىق ۆاننا، سەنسورلىق بولمە بار. بالالاردى وڭالتۋعا ارنالعان جەكە باعدارلامالاردى كوپ سالالى ماماندار توبى ازىرلەيدى. ولاردىڭ قاتارىنا نيەۆرولوگ، رەابيليتولوگ، نەوناتولوگ، فيزيوتەراپيەۆت، ەدش دارىگەرى، لوگوپەد جانە دەفەكتولوگ كىرەدى.
ورتالىق كۇنىنە 50 بالا قابىلدايدى، ال جىلىنا 600 بالاعا مىندەتتى الەۋمەتتىك مەديسينالىق ساقتاندىرۋ (ءمامس) اياسىندا كومەك كورسەتىلەدى.
ەربولات دوسايەۆ ورتالىقتاعى قۇرىلىس جۇمىستارىنىڭ ناتيجەلەرىمەن تانىسىپ، انىقتالعان كەمشىلىكتەردى جويۋدى مەردىگەرگە تاپسىردى جانە ولاردىڭ ورىندالۋىن باقىلاۋعا الدى.
اكىم سونداي-اق جاڭارتىلعان پەريناتولوگيا جانە بالالار كارديوحيرۋرگياسى ورتالىعىنىڭ ەمحاناسىنىڭ جۇمىسىمەن تانىستى. 1966 جىلى سالىنعان 1300،6 شارشى مەترلىك ەكى قاباتتى عيماراتتا كۇردەلى جوندەۋ جۇرگىزىلىپ، ينجەنەرلىك جۇيەلەر جاڭعىرتىلدى. مەديسينالىق قىزمەتتى جىلدام كورسەتۋ ءۇشىن پاسيەنتتەردىڭ باعىتى وڭتايلاندىرىلىپ، مۇمكىندىگى شەكتەۋلى ازاماتتار ءۇشىن قولجەتىمدىلىك ارتتى. اتاپ ايتقاندا، ەمحانانىڭ كەڭىستىگى ايماقتارعا ءبولىنىپ، كابينەتتەردىڭ ورنالاسۋى قايتا قارالدى، بۇل باسپالداقپەن كوتەرىلۋ نەمەسە ليفت پايدالانۋ قاجەتتىلىگىن ازايتتى.
الماتى اكىمى ەرەكشە نازار اۋدارعان نىساننىڭ ءبىرى – ەمحانا بازاسىندا ورنالاسقان ۇرىق قورعاۋ ورتالىعى. مۇندا تۋا بىتكەن دامۋ كەمىستىكتەرىن پرەناتالدى دياگنوستيكالاۋ جانە ولاردى تۇزەتۋگە ارنالعان جاتىرىشىلىك وتاسى جاسالادى. بۇل الماتى اكىمىنىڭ تاپسىرماسىمەن جانە ق ر دەنساۋلىق ساقتاۋ مينيسترلىگىنىڭ قولداۋىمەن 2024 جىلدىڭ 13 ماۋسىمىندا ىسكە قوسىلعان فەتالدى حيرۋرگيانىڭ جاڭاشىل جوباسى. جىل سايىن بۇل ورتالىقتا 8 مىڭنان استام جۇكتى ايەل ۋلترادىبىستىق تەكسەرۋدەن وتەدى.
ەربولات دوسايەۆتىڭ ايتۋىنشا، پەريناتولوگيا جانە بالالار كارديوحيرۋرگياسى ورتالىعىنىڭ ءارى قاراي دامۋى جوسپارلانىپ وتىر. ونىڭ ىشىندە «اقىلدى» وپەراسيالىق بولمەلەر قۇرۋ، جىلدىق قابىلداۋ قۋاتىن 17 500-دەن 19 500-گە دەيىن ارتتىرۋ، جۇرەككە جاسالاتىن حيرۋرگيالىق وتالاردى قوسقاندا، وپەراسيا تۇرلەرىن كەڭەيتۋ، اكۋشەرلىك وتا سانىن جىلىنا 3 500-دەن 4 500-گە دەيىن ارتتىرۋ.
قازىرگى تاڭدا پەريناتولوگيا جانە بالالار كارديوحيرۋرگياسى ورتالىعى – ايەلدەر مەن بالالارعا تولىق سيكلدى مەديسينالىق قىزمەت كورسەتەتىن ءىرى كلاستەر. ونىڭ ءارى قاراي جاڭعىرتىلۋى جاتىرىشىلىك وتاسىن كەڭەيتۋگە مۇمكىندىك بەرەدى، سونداي-اق دامۋ كەمىستىكتەرىنەن بولاتىن مۇگەدەكتىك پەن نارەستە ءولىمىن 35%-عا تومەندەتۋگە ىقپال ەتەدى.
ايتا كەتەيىك، پەريناتولوگيا جانە بالالار كارديوحيرۋرگياسى ورتالىعىندا جۇرگىزىلگەن كۇردەلى جوندەۋ جۇمىستارى – «الماتى قالاسىن 2025 جىلعا دەيىن دامىتۋ باعدارلاماسى جانە 2030 جىلعا دەيىنگى ورتا مەرزىمدى پەرسپەكتيۆا» اياسىنداعى ماڭىزدى كەزەڭدەردىڭ ءبىرى. عيماراتتىڭ جالپى اۋدانى – 24،1 مىڭ شارشى مەتر.
