«ۇلتتىق اۋدارما بيۋروسىنىڭ» مالىمەتى بويىنشا، 2017-2018 جىلدارى 47 وقۋلىق قازاق تىلىنە اۋدارىلىپ، ەلىمىزدەگى 132 ۋنيۆەرسيتەتكە جەتكىزىلگەن. جاڭا وقۋلىقتار 2018-2019 وقۋ جىلىنان باستاپ جوعارى ءبىلىم بەرۋ جۇيەسىنە ەنگىزىلدى. 2019-2020 جىلدارى ءۇشىنشى لەكتەگى 30 وقۋلىق اۋدارىلىپ باسىلدى.
ولار دا جاقىن ۋاقىتتا ۋنيۆەرسيتەتتەرگە تاراتىلماق. سونداي-اق، اتالمىش بيۋرونىڭ اتقارۋشى ديرەكتورى راۋان كەنجەحان ۇلىنىڭ ايتۋىنشا، بارشا قاۋىمعا قولجەتىمدى بولۋى ءۇشىن وقۋلىقتاردىڭ ەلەكتروندى نۇسقالارى OpenU.kz پلاتفورماسى مەن Kitap.kz پورتالدارىنا ورنالاستىرىلدى.
«ءاۋ باستا اۋدارىلاتىن كىتاپتاردى تاڭداۋ ءۇشىن ەلىمىزدەگى بارلىق وقۋ ورىندارىنان ۇسىنىستار جينالىپ، جالپى سانى 800-دەن استام وقۋلىقتىڭ اتاۋىن تىزدىك. جيناقتالعان تىزىمدەردىڭ نەگىزىندە بىرنەشە رەت باسىلعان، سوڭعى باسىلىمى كەيىنگى 3 جىلدا شىققان، مازمۇندىق تۇرعىدان بەيتاراپ بولۋى قاجەت دەگەن 100 وقۋلىق تاڭدالدى. ءقازىر جوبانىڭ ءتورتىنشى كەزەڭىنە تاڭدالعان 23 وقۋلىقتى اۋدارۋ پروسەسى ءجۇرىپ جاتىر. وسى ورايدا، كوپشىلىكتىڭ پىكىرلەرى ەسكەرىلىپ، سوڭعى اۋدارىلاتىن وقۋلىقتاردىڭ قاتارىنا شىعىس كىتاپتارىن دا كوپتەپ قوستىق»، - دەدى راۋان كەنجەحان ۇلى.
ونىڭ ايتۋىنشا، اۋدارىلعان كىتاپتارعا قوعام قىزىعۋشىلىعى ارتقان سوڭ نۇر-سۇلتان جانە الماتى قالالارىنداعى ءىرى كىتاپ دۇكەندەرى ارقىلى ساتىلىمعا قويىلعان. بۇل جۇمىستار جەكەمەنشىك باسپالار ارقىلى ۇيىمداستىرىلىپ، مەملەكەت قارجىسى شىعىندالماعان.
ايتا كەتەيىك، اۋدارىلعان كىتاپتاردىڭ قاتارىندا فيلوسوفيا، پسيحولوگيا، مەنەدجمەنت، يننوۆاسيا، بيزنەس، مەديا سىندى سالالار بويىنشا الەمدىك بەستسەللەرلەر دە بار. اتاپ ايتساق، ەرنست گومبريحتىڭ «ونەر تاريحى»، يۋۆال نوي ءحاراريدىڭ «Sapiens: ادامزاتتىڭ قىسقاشا تاريحى»، كلاۋس شۆابتىڭ «ءتورتىنشى وندىرىستىك ريەۆوليۋسيا»، فيليپپ كوتلەردىڭ «ماركەتينگ نەگىزدەرى»، ريككي ۋ گريفيننىڭ «مەنەدجمەنت» سىندى كىتاپتارى ءارتۇرلى تاڭداۋلى سىنشىلاردىڭ وڭ باعاسىن العان.
قازاقستان رەسپۋبليكاسى اقپارات جانە قوعامدىق دامۋ مينيسترلىگى «رۋحاني جاڭعىرۋ» دەپارتامەنتىنىڭ ديرەكتورى نۇرلان كۇنتۋوۆتىڭ پىكىرىنشە، جوبا اياسىنداعى كىتاپتار ەلىمىزدىڭ ورتالىقتارىندا عانا ەمەس، شالعاي ايماقتاردا دا سۇرانىسقا يە.
ايماقتارعا بارعانىمىزدا بايقايمىز، بۇگىندە ستۋدەنتتەر وسى وقۋلىقتارمەن سۋسىنداپ، ءبىلىم الىپ ءجۇر. اسىرەسە اۋىلدان كەلگەن جاستارعا جاقسى – الەمنىڭ ۇزدىك كىتاپتارىن قازاق تىلىندە وقۋعا مۇمكىندىك الىپ وتىر. بۇل «رۋحاني جاڭعىرۋ» باعدارلاماسىنىڭ جەمىستى جوبالارىنىڭ بىرەگەيى، - دەدى نۇرلان كۇنتۋوۆ.
