الماتىدا قورعانىس ءمينيسترى، اۆياسيا گەنەرال-لەيتەنانتى داۋرەن قوسانوۆتىڭ قاتىسۋىمەن Defense Tech IT Park قورعانىس تەحنولوگيالارى ورتالىعى اشىلدى، دەپ حابارلايدى Dala News.
جاڭا ورتالىق ارميا ءۇيى بازاسىندا ىسكە قوسىلىپ، قارۋلى كۇشتەر مەن ۇلتتىق قاۋىپسىزدىك جۇيەسىنە ارنالعان وتاندىق تەحنولوگيالىق شەشىمدەردى ازىرلەۋ جانە ەنگىزۋگە باعىتتالعان. جوبا Freedom Holding Corp. كومپانياسىنىڭ قولداۋىمەن جۇزەگە اسىرىلدى.
تانىستىرىلىمعا جاساندى ينتەللەكت جانە سيفرلىق دامۋ ۆيسە-مينيسترى دميتريي مۋن، Freedom Holding Corp. باس ديرەكتورى تيمۋر تۋرلوۆ، سونداي-اق IT سالاسى مەن عىلىمي قاۋىمداستىق وكىلدەرى قاتىستى.
Defense Tech IT Park – قورعانىس مينيسترلىگى 2022 جىلدان باستاپ جۇزەگە اسىرىپ كەلە جاتقان Defense Tech باستاماسىنىڭ جالعاسى. الاڭدا قازاقستاندىق IT-كومپانيالار مەن ستارتاپتار سيفرلىق تەحنولوگيالار، بەينەباقىلاۋ جۇيەلەرى، دەرەكتەردى تالداۋ، تەلەكوممۋنيكاسيالار جانە سپۋتنيكتىك شەشىمدەر سالاسىنداعى جوبالارىن ۇسىندى.
داۋرەن قوسانوۆتىڭ ايتۋىنشا، ورتالىقتىڭ باستى ماقساتى – يننوۆاسيالىق ازىرلەمەلەردى اسكەرگە جىلدام ەنگىزۋ.
ال Freedom Holding Corp. باسشىسى تيمۋر تۋرلوۆ جاڭا الاڭ IT سالاسىنداعى ستۋدەنتتەر مەن جاس ماماندار ءۇشىن تاجىريبە جينايتىن ورتالىققا اينالاتىنىن اتاپ ءوتتى.
قورعانىس ءمينيسترىنىڭ سيفرلىق دامۋ جونىندەگى ورىنباسارى دارحان احمەدييەۆتىڭ ايتۋىنشا، Defense Tech IT Park جاڭا تەحنولوگيالىق جوبالاردى ىرىكتەپ، يدەيادان باستاپ پروتوتيپكە دەيىن قولداۋ كورسەتەتىن جانە ولاردى اسكەردە سىناقتان وتكىزۋگە مۇمكىندىك بەرەتىن پلاتفورما بولادى.
