مارعۇلان سەيسەمباي باستاعان دەلەگاسيا قۇرامىندا كييەۆتى كورىپ قايتقان حالىق قالاۋلىسى ءقازىر ۋكراينانىڭ رەفورما كوميتەتىنە باسشىلىق ەتەتىن ساياساتكەرىمەن جۇزدەسىپ، از-كەم پىكىر الماسقان.
رەسەيدىڭ ۇگىت-ناسيحات قۇرالدارى التايەۆ الگى ساپاردان وزگەرىپ ورالدى دەيدى. كييەۆتەن كەلە سالا دەپۋتات التايەۆ كرەملدىڭ قۇلاعىنا تۇرپىدەي تيەتىن مالىمەدەمە جاساعان. نازاربايەۆتىڭ "ماجوريتارلى جۇيەنىڭ مۇرتى بۇزىلمايدى" دەگەن ۇستانىمىنا قارسى كەلىپ، ىندەت اۋا جايىلعان شاقتا سايلاۋشىلارعا داۋىس بەرۋ قۇقىعىن قايتارۋدى تالاپ ەتكەن. اگەنتتىكتىڭ جازعانىنداي بۇل ونىڭ شالكەس مىنەزدى گرۋزين ساياساتكەرىنەن ۇيرەنگەنى.
"بۇل قالاي بولعانى؟! بيلىك پارتياسىنىڭ مۇشەسى پارتيا جەتەكشىسىنە قارسى كەلگەنى مە؟ سولاي سىڭايلى. قازاقستاندا جۇيەنىڭ ەسكى سۇرلەۋىمەن ءجۇرۋدى ءجون كورمەيتىن ساياساتكەرلەردىڭ جاڭا شوعىرى قالىپتاسىپ جاتقانداي.
ءبىز ايتىپ وتىرعان التايەۆ تۇنەۋكۇنى سااكاشۆيليمەن جۇزدەسىپ قايتتى. ۋكرايناداعى رەفورما كوميتەتىن باسقاراتىن ساياساتكەر قازاقستاننان كەلگەن دەلەگاسيانىڭ الدىندا ابدەن كوسىلسە كەرەك. كورگەن-بىلگەنىن ورتاعا سالىپ، ساياساتتاعى سارى اۋىز بالاپانداردى اۋىزداندىرىپ جىبەرگەنگە ۇقسايدى. ەلگە ورالا سالا التايەۆ بيلىكتىڭ ۇستانىمىنا قايشى كەلەتىن بىرنەشە داۋلى مالىمدەمە جاسادى. وسى ارقىلى قازىرگى جۇيەدەن ىرگەسىن اۋلاق سالعىسى كەلەتىن سىڭاي تانىتتى..."، – دەيدى ماقالا اۆتورى.
ال ەندى التايەۆتىڭ كييەۆتەن ورالعاننان كەيىن نە دەگەنىنە نازار اۋدارالىق.
"الدىمەن ەكونوميكا، سودان بارىپ ساياسات" دەگەن ۇستانىمنىڭ ءداۋىرى ءوتتى. وزەكتىلىگى ءولىپ، ومىرشەڭدىلىگى جوعالدى. بۇل جۇمىسقا جارامسىز پرينسيپ"، – دەگەن بولاتىن حالىق قالاۋلىسى.
نەگىزىندە جۇيەنىڭ ساياسي رەفورماعا ءزارۋ ەكەنىن ەكىنشى پرەزيدەنت تە ايتىپ ءجۇر. توقايەۆ وسى ماقساتتا ۇلتتىق كەڭەستى قۇرعانى بەلگىلى.
الايدا رەسەيلىك پروپاگاندا باسقاشا پايىمداپتى.
"التايەۆ وسى ارقىلى ءاردايىم ەكونوميكانى تورگە وزدىرىپ، ساياسي وزگەرىستەردى كەيىنگە شەگەرىپ كەلگەن تۇڭعىش پرەزيدەنتتىڭ ءسوزىن ىسكە العىسىز ەتتى. نازاربايەۆ ەكونوميكانىڭ شارۋاسىن شەشپەي، ساياسات كوشۋگە بولماسىن 30 جىل بويى قايتالاۋمەن كەلدى.
ءبىز بىلسەك التايەۆتىڭ ءبىر ساۋساعى بۇگۋلى. جوعارىدان جاسىرعان قۋلىق-سۇمدىعى كوپ. حالىقتىڭ تامىرىن باسىپ، تۇبەگەيلى ساياسي رەفورما تۋرالى ساۋالناما جۇرگىزبەك ءتۇرى بار. ءدال ءقازىر التايەۆ بەلارۋس سەنارييىن قايتالاۋدىڭ الدىندا تۇر. ول سول جولعا ءتۇستى"، – دەيدى ia-centr.
اگەنتتىك ءتىلشىسىنىڭ جازعانىنداي بەلارۋس وپپوزيسياسىنىڭ ناقتى يدەياسى جوق. ەكونوميكالىق ءھام ساياسي باعدارلاماسى ەلدى داعدارىستان شىعارۋعا جارامسىز، جالعىز ارگۋمەنتى – لۋكاشەنكودان قاجىعان اۋديتوريانىڭ اشۋ-ىزاسى عانا.
الگىنى كورگەن التايەۆ تا وسىنداي جوبا-جوسپار قۇرىپ، بۇگىنگى بيلىكتىڭ بەتالىسىنا كەراعار كەلەتىن ۇسىنىستاردى ساقاداي سايلاپ قويعان.
اگەنتتىك التايەۆتى ءبىر جيىندا سويلەگەن سوزىنەن ۇستاپتى. الگىنى ايعاق رەتىندە العا تارتىپتى.
«ساياسي رەفورما؟ مۇنىڭ وتە-موتە اۋىر-بولارىن ءتۇسىنۋ كەرەك. دارى-دارمەك قايىر جوق، ودان ەم قومايدى، پاسيەنتتى اجالدان اراشالاپ قالۋ ءۇشىن وتا جاساۋعا تۋرا كەلەدى»، – دەگەن-تىن حالىق قالاۋلىسى.
دەپۋتاتتىڭ وتكەن ءومىرىن قوپارعان رەسەيلىك سايت التايەۆتىڭ بۇعان دەيىنگى ساياسي مالىمدەمەسىنەن اقاۋ ىزدەپ، اقىرى، تاپقان ەكەن.
«نۇرجان مىرزا حالىققا 42 500 تولەۋدى توقتاتپاۋ كەرەك دەيدى. بيزنەسكە سالىنار سالىقتى كۇرت تومەندەتۋ كەرەگىن ايتىپ، الاسۇرىپ ءجۇر. سوندا مەملەكەت قالاي كۇن كورەدى؟ حالىققا نەنىڭ ەسەبىنەن ايلىق تولەيدى؟ بيۋدجەت سارقىلسا، ونىڭ سوڭى نەگە الىپ كەلەرىن التايەۆ بىلمەي مە؟ ونىمەن قويماي ۇلتتىق قوردىڭ قاراجاتىن ءراسۋالاۋدى دوعارۋ كەرەك ءجۇر. ايتەۋىر بىر-بىرىمەن قابىسپايتىن، بىر-بىرىنە قايشى كەلەتىن دۇنيەلەر. تۇنىپ تۇرعان پوپۋليزم»، – دەپ ۇيعارعان ەكەن ماقالا اۆتورى.
ارتىنشا التايەۆتى تيحانوۆسكايامەن سالىستىرىپ، لۋكاشەنكو وپپونەنتتىڭ ەكونوميكالىق باعدارلاماسى ءتىپتى ساۋاتسىز ەكەنىن تىلگە تيەك ەتىپتى.
التايەۆ پەن ءبۇتىن بەلارۋس حالقى داۋىس بەرگەن تيحانوۆسكايانى سالىستىرۋ سىرت كوزگە قيسىنسىز كورىنگەنمەن، ia-centr قومسىنباعان ەكەن.
«ەكەۋى دە پوپۋليست. ايتسە دە بىرەسە ۇكىمەتتى سىناپ، ەندى بىردە جەمقورلارعا جىنىگەتىن التايەۆقا اقىر سوڭى جاقسى ورىن بۇيىرۋى مۇمكىن»، – دەپ بولجاپتى رەسەيلىك اگەنتتىك.
...
مارعۇلان سەيسەمباي باستاعان قازاقستان دەلەگاسياسىنىڭ كييەۆكە ساپارى رەسەيلىك ناسيحات قۇرالدارىنىڭ كۇن تارتىبىنەن تۇسپەي تۇر.
مىنە، بىرنەشە اي بولدى، الدىمەن سااكاشۆيليگە، ارتىنان سەيسەمبايعا، كەيىننەن ونىمەن ىلەسە بارعانداردان ىلىك ىزدەگەن كرەمل پروپاگانداسى وسى ارقىلى قازاقستاننىڭ كييەۆپەن شۇيىركەلەسكەنىن قالامايتىنىن اشىق اڭعارتۋدا.
سااكاشۆيليدىڭ ساياسي ءدارىسى قازاقستانداعى ساياسي بەلسەندىلەردىڭ ساناسىن ۋلاۋىنان سەسكەنگەن كرەمل كييەۆكە ساپار شەككەن دەلەگاسيا مۇشەلەرىنىڭ دەرلىگىنە كۇيە جاعىپ شىقتى.
بۇدان بۇرىن Dalanews.kz ماسكەۋدىڭ سەيسەمباي-سااكاشيۆيلي جۇبىنان سەزىكتەنىپ وتىرعانىن جازعان.
ازىرلەگەن دۋمان بىقاي
