Qarmet كومپانياسىنىڭ كومىر دەپارتامەنتى كاسىپورىندارىن جاڭعىرتۋ باعدارلاماسى اياسىندا شاحتالار تاۋ-كەن قازبالارىن جۇرگىزۋگە ارنالعان جاڭا جەراستى تەحنيكاسىمەن جابدىقتالدى. قازىرگى ۋاقىتتا «شاحتينسك» شاحتاسىنىڭ ماماندارى جەتكىزۋشى كومپانيا وكىلدەرىمەن بىرلەسىپ جاڭا كپ-21 ۇڭگۋ كومباينىن سىناقتان وتكىزىپ جاتىر. جەر ۇستىندە باقىلاۋ جيناعى مەن سىناق جۇمىستارى اياقتالعاننان كەيىن جابدىق بولشەكتەلىپ، جەر استىنا ءتۇسىرىلىپ، تىكەلەي كەنجاردا قايتا قۇراستىرىلىپ ورناتىلادى، دەپ حابارلايدى Dalanews.kz.
جاڭا تەحنيكا دايىندىق قازبالارىن، توننەلدەر مەن شترەكتەردى جۇرگىزۋگە ارنالعان. ءدال وسى جولدار ارقىلى كەيىن كومىر مەن جابدىقتار تاسىمالدانىپ، شاحتانىڭ جەلدەتىلۋى قامتاماسىز ەتىلەدى. بۇل جۇمىستاردىڭ جىلدامدىعى مەن ساپاسى جاڭا ءوندىرۋ ۋچاسكەلەرىن ۋاقىتىندا ىسكە قوسۋعا تىكەلەي اسەر ەتەدى.
جاڭا كومباينداردىڭ باستى ەرەكشەلىگى — قاشىقتان باسقارۋ جانە سيفرلىق مونيتورينگ جۇيەسى. ماشينا ءتۇرلى داچيكتەرمەن جانە دەرەكتەردى بەرۋ جۇيەسىمەن جابدىقتالعان، سونىڭ ارقاسىندا ونىڭ جۇمىس پارامەترلەرىن ناقتى ۋاقىت رەجيمىندە باقىلاۋعا بولادى. جابدىقتىڭ جاي-كۇيى تۋرالى اقپارات Wi-Fi ارقىلى شاحتا ديسپەچەرىنىڭ پۋلتىنە جىبەرىلەدى.
«جەر ۇستىندە وتىرىپ-اق ماشينانىڭ بارلىق جۇيەسىنىڭ جۇمىسىن، سۇيىقتىق دەڭگەيلەرىن، جۇمىس رەجيمدەرىن جانە باسقا دا پارامەترلەرىن قاشىقتان باقىلاۋعا بولادى. قاجەت بولعان جاعدايدا پروسەستى كومىر دەپارتامەنتىنىڭ ديسپەچەرلىك-تالداۋ ورتالىعىنىڭ ماماندارى دا قاداعالاي الادى»، — دەدى «شاحتينسك» شاحتاسىنىڭ وتپە جۇمىستارى جونىندەگى باس ينجەنەرىنىڭ ورىنباسارى سەرگەي سولوحين.
زاماناۋي كومباين تاۋ جىنىسىن بۇزۋدى الدەقايدا ءتيىمدى ءارى ءقاۋىپسىز ەتەدى. ماشينا ەلەكتر جەتەگى بار قۋاتتى كەسكىش جۇمىس ورگانىمەن جابدىقتالعان جانە ءارتۇرلى قاتتىلىقتاعى جىنىستارمەن جۇمىس ىستەي الادى. جابدىقتىڭ قۇرىلىمى بيىكتىگى 5،5 مەترگە دەيىنگى قازبالاردى جۇرگىزۋگە مۇمكىندىك بەرەدى. بۇزىلعان جىنىس كىرىكتىرىلگەن تيەۋ بولىگى مەن كونۆەيەرلىك جۇيە ارقىلى بىردەن تاسىمالداۋعا جىبەرىلەدى. بۇل جۇمىسشىلاردىڭ فيزيكالىق جۇكتەمەسىن ازايتىپ، قازبا جۇرگىزۋ قارقىنىن ارتتىرادى.
«شاحتينسك» شاحتاسىنىڭ №2 دايىندىق جۇمىستارى ۋچاسكەسىنىڭ باستىعى رۇستەم يمانوۆتىڭ ايتۋىنشا، جاڭا كومباين ۇڭگۋ جۇمىسىن ەداۋىر جەڭىلدەتەدى.
«ماشينانى پايدالانۋ جانە قىزمەت كورسەتۋ ىڭعايلى. بۇرىنعى كسپ-32 كومباينىمەن سالىستىرساق، وندا تەك قولمەن باسقارۋ بولعان. ال كپ-21-دە پۋلت ارقىلى قاشىقتان باسقارۋ قاراستىرىلعان، بۇل جۇمىستى ايتارلىقتاي جەڭىلدەتەدى»، — دەدى يمانوۆ.
بيىل Qarmet كومپانياسىنىڭ كومىر دەپارتامەنتى كپ-21 ۇلگىسىندەگى سەگىز ۇڭگۋ كومباينىن الادى. 2026 جىلى دەپارتامەنتتىڭ سەگىز شاحتاسىندا شامامەن 45 شاقىرىم تاۋ-كەن قازباسىن جۇرگىزۋ جوسپارلانىپ وتىر. زاماناۋي وتپەلى كومباينداردى ەنگىزۋ دايىندىق جۇمىستارىنىڭ جوعارى قارقىنىن ساقتاۋعا جانە جەراستى كومىر ءوندىرۋدىڭ تيىمدىلىگىن ارتتىرۋعا مۇمكىندىك بەرەدى.
