زاڭگەر بۇدان بولەك اكىم مەن جەر كوميسسياسىنىڭ زاڭسىز شەشىمدەرىن بۇزۋدىڭ جولىن دا ءتۇسىندىرىپ وتكەن ەكەن. ماماننىڭ وي-پىكىرىن قاز-قالپىندا ۇسىنىپ وتىرمىز.
...
جەر كوميسسياسىنىڭ ماتەريالدارىن قالاي الدىرتۋعا بولادى؟
كوپ ازاماتتارىمىز جەمقور شەنەۋنىكتەرىنەن كەسىرىنەن جەرسىز قالىپ، جەرىنەن ايرىلىپ، اكىم مەن جەر كوميسسياسىنىڭ زاڭسىز شەشىمدەرىن بۇزۋدىڭ جولىن بىلمەي وتىرادى.
جەر كوميسسياسىنىڭ شەشىمىن بۇزۋعا بولادى جانە بۇزۋ ءۇشىن جەر كوميسسياسى ماتەريالدارىن الۋ قاجەت.
ياعني، جەر كوميسسياسىنىڭ زاڭسىز شەشىمى قولىڭىزدا بولۋ كەرەك. ونى قالاي الۋعا بولادى.
بىرىنشىدەن، اكىمدىك جەر كوميسسياسىندا ءسىزدىڭ ارىزىڭىزدى قاراپ تەرىس قورىتىندى شىعارسا، وندا ول تەرىس شەشىمنىڭ كوشىرمەسىن الۋعا قۇقىعىڭىز بار.
سىزدەر جەر كوميسسياسىنىڭ جۇمىس ورگانى بولىپ ەسەپتەلەتىن - اكىمدىكتىڭ جەر قاتىناستارى بولىمىنە ارىز بەرەسىز جانە ارىزعا سايكەس، ولار 1 جۇمىس كۇنى ىشىندە كوميسسيانىڭ شەشىمىنىڭ كوشىرمەسىن سىزگە بەرەدى.
ەگەر دە، جەر قاتىناستارى ءبولىمى ماماندارى جەر كوميسسياسى ماتەريالدارىن بەرمەسە، ۋاقىتىندا بەرەتىن قۇجاتىن سوزىپ السا، مۇنداي جاعدايلاردا سىزدەر پروكۋراتۋرا ورگاندارىنا، سول سياقتى مەملەكەتتىك قىزمەت ىستەرى سالاسىندا ۋاكىلەتتى ورگاندارىنا ارىزدانۋىڭىزعا بولادى.
ەكىنشىدەن، سىزدەر جەر كوميسسياسى جينالىسىنىڭ اۋديو جانە ۆيدەو جازبالارىنىڭ كوشىرمەسىن ديسككە كوشىرىپ الۋعا قۇقىعىڭىز بار. 2018 جىلى 04 جەلتوقساندا قابىلدانعان #490 ەرەجەگە سايكەس، جەر كوميسسياسىنىڭ اۋديو جانە ۆيدەو جازبالارى ارىز بەرگەن كۇننەن باستاپ 5 جۇمىس كۇندە سىزگە بەرىلەدى. ول ءۇشىن دە، جەر قاتىناستارى بولىمىنە ارىز بەرىپ الدىرتۋعا بولادى.
ەگەر دە، جەر قاتىناستارى بولىمىنە ارىز بەرىپ سىزگە جەر كوميسسياسىنىڭ قورىتىندىسى مەن اۋديو جانە ۆيدەو جازبالارىن بەرمەسە، جاسىرسا، ارىزىڭىزعا جاۋاپ بەرمەسە، مۇنداي جاعدايلاردا پروكۋراتۋرا ورگاندارى، نە بولماسا مەملەكەتتىك قىزمەت ىستەرى سالاسىندا ۋاكىلەتتى ورگاندارىنا ارىز بەرىڭىز. مەنىڭ ەلەكتروندىق پوشتاما جىبەرىڭىز. لاۋازىمدى تۇلعانى جازاعا تارتامىز.
ۇشىنشىدەن، جەر كوميسسياسىنىڭ ماتەريالدارىن جەرگىلىكتى اتقارۋ ورگاننىڭ ۋاكىلەتتى ورگانى ياعني ءتيىستى اۋدان، قالا اكىمدىگىنىڭ جەر قاتىناستارى ءبولىمى ءوزىنىڭ ينتەرنەت پورتالىندا جاريالاۋى ءتيىس. سول ينتەرنەت پورتالدان ءتيىستى جەر كوميسسياسىنىڭ حاتتاماسىن كوشىرىپ الۋعا مۇمكىندىگىڭىز بولادى.
تورتىنشىدەن، اۋىل شارۋاشىلىق ماقساتىنداعى جەرلەردىڭ كونكۋرس ناتيجەسىندە راسىمدەلگەن حاتتامالارى اۋىل شارۋاشىلىق مينيسترلىگىنىڭ جەر رەسۋرستارىن باسقارۋ كوميتەتىنىڭ ينتەرنەت پورتالىندا جاريالانادى.
سول پورتالدان ءوزىڭىزدىڭ اۋىلشارۋاشىلىق جەرلەردى جالعا بەرۋ كونكۋرس ناتيجەسىندەگى حاتتامالارىن كوشىرىپ الىپ، جەر كوميسسياسىنىڭ حاتتاماسىن زاڭسىز دەپ تانۋعا قاتىستا سوتقا ارىز بەرە الاسىز.
مەنىڭ اقىلىمدى نازار اۋدارىپ تىڭداساڭىزدار، جەمقور شەنەۋنىكتەرگە جەم بولمايسىزدار.
جەردى وڭدى سولدى بەرە بەرگەن جەمقورلارمەن كۇرەسىپ، حالىققا قىزمەت ەتۋ، حالقىمنىڭ جەرگە قاتىستى قۇقىعىن ءتۇسىندىرىپ، قۇقىعىن قورعاپ، كوزىن اشۋ، مەن ءۇشىن ۇلكەن ساۋاپتى ءىس.
سىبايلاستار: ولار كىم؟
بۇدان بۇرىن zanmedia.kz-كە سۇحبات بەرگەن زاڭگەر جەردىڭ توڭىرەندەگى داۋ-دامايدا ۇيىمداسقان سىبايلاس توپ بار دەپ مالىمدەگەن.
«زاڭسىز الىنعان جەرىن قايتارىپ بەرگەنىڭىز ءۇشىن ەڭبەكشىقازاق اۋدانىنداعى اسىساعا اۋىلى تۇرعىندارىنىڭ العىس ايتقانىن ەستىدىك. جالپى وبلىستارداعى جاعداي قالاي؟»، – ءتىلشىنىڭ ساۋالىنا باقىتجاي بازاربەك بىلاي دەپ جاۋات قاتقان ەدى.
– ءار وڭىردە جەرگىلىكتى اكىمدىكتىڭ شەنەۋنىكتەرى، پروكۋرورلار مەن جەر ينسپەكسياسى باسقارمالارىنىڭ قىزمەتكەرلەرىنەن قۇرالعان ۇيىمداسقان سىبايلاس توپ بار دەپ ايتسام، قاتەلەسپەيمىن.
مىسالى، بقو-دا شىڭعىرلاۋ اۋداندىق جەر كوميسسياسىنىڭ مۇشەسى تەندەر جەڭىمپازى بولىپ تانىلعان. وسى وڭىردەگى بايتەرەك اۋدانىندا وتكىزىلگەن لوتتىڭ جەڭىمپازى اۋدان اكىمىنىڭ ورىنباسارى جەر كوميسسياسى ءتوراعاسىنىڭ تۋعان اعاسى بولىپ شىققان. بۇل «سىبايلاس جەمقورلىق تۋرالى» زاڭ تالاپتارىنىڭ ورەسكەل بۇزىلۋى دەپ بىلەمىن. ال الماتى وبلىسى ەڭبەكشىقازاق اۋدانىنداعى اسىساعا اۋىلىنىڭ ماڭىنداعى 10 مىڭ 500 گەكتار جەر، سونىڭ ىشىندە جايىلىمدىق جەرلەر دە بار، ءبىر وتباسىنىڭ – اكەسى، قىزى، ەكى قارىنداسى، ايەلى، ءىنىسى، كۇيەۋ بالاسىنىڭ مەنشىگىنە ءوتىپ، مالمەن كۇن كورىپ وتىرعان جەرگىلىكتى حالىقتىڭ نارازىلىعىن تۋدىرعان.
ناتيجەسىندە سىبايلاس جەمقورلىققا قارسى كۇرەس ورگاندارىنىڭ ارالاسۋىمەن الماتى وبلىسى بويىنشا جەردى قورعاۋ جانە پايدالانۋدى باقىلاۋ باسقارماسى اۋدان اكىمىنىڭ بىرنەشە قاۋلىسىن زاڭسىز دەپ تانىپ، 6500 گا جەر اسىساعا حالقىنىڭ يگىلىگىنە قايتارىلدى.
نۇر-سۇلتان قالاسىنداعى نۇكتەسى قويىلعان ۇلكەن جەر داۋى حالىقارالىق جانجالدىڭ الدىن الدى. ءسويتىپ، وڭتۇستىككورەيالىق «Megagen» كومپانياسىنىڭ ينۆەستيسياسىنا بەس جۇلدىزدى كەشەندى قوناق ءۇي سالۋدى كوزدەگەن استانالىق كاسىپكەردىڭ جەر تەلىمى يگەرىلمەۋىنە بايلانىستى مەملەكەت مۇقتاجى ءۇشىن الىپ قويۋ ماقساتىندا جەر كودەكسىنىڭ 92، 93-باپتارى بويىنشا سوتقا شاعىم تۇسىرگەن جەرگىلىكتى شەنەۋنىكتەردىڭ زاڭسىز ىس-ارەكەتى جۇزەگە اسپادى.
نوتارۋيسقا سەنۋدىڭ قاجەتى جوق
سونداي-اق ول جەردى ساتىپ الار الدىندا نوتاريۋسقا سەنۋدىڭ قاجەتى جوعىن ايتقان.
“ول (نوتاريۋس، رەد.) تەك قانا جەردىڭ زاڭداستىرىلعانىن جانە ناقتى ءبىر شەكتەۋدىڭ، قاماۋدىڭ قويىلماعانىن، تازالىعىن تەكسەرەدى. ال، بۇل جەرگە ءۇي سالۋعا بولا ما، سانيتارلىق قورعاۋ ايماعىنا، سۋ قورعاۋ ايماعىنا، قىزىل بەلدەۋگە كىرگەن بە، ەرتەڭ مەملەكەت قاجەتتىلىكتەرى ءۇشىن الىپ قويماي ما، اۋەجاي ايماعىنداعى نەمەسە مۇناي-گاز قۇبىرىنىڭ ماڭىنداعى جەر مە دەگەن سۇراقتارعا نوتاريۋس جاۋاپ بەرمەيدى، ونداي ماسەلەلەردى تەكسەرمەيدى دە. نوتاريۋس تەك بۇل مامىلەنى راستاپ، كۋالاندىرىپ جىبەرەدى.
ەرتەڭگى زاردابىن ساتىپ العان ادام تارتادى. «اقپاراتقا قولجەتىمدىلىك تۋرالى» زاڭنىڭ 9، 12-باپتارىنا سايكەس، جەر ساتىپ الاتىن ازامات ءارتۇرلى اقپاراتتى ادۆوكات جالداپ نەمەسە ءوزى تىكەلەي ساتاتىن ادام ارقىلى الدىرتۋعا قۇقىعى بار. اقپاراتتى الىپ، كوزى جەتىپ، راستاعاننان كەيىن عانا جەردى ەمىن-ەركىن ساتىپ الۋعا بولادى. ەگەر ازاماتتار نوتاريۋسقا سەنىپ، تەكسەرمەي، ساتىپ الا بەرسە، ەرتەڭ ونىڭ قاۋىپ-قاتەر تاۋەكەلىن ءوز موينىنا الادى.
زاڭگەرلەرگە، ادۆوكاتتارعا، زارداپ شەككەن ازاماتتارعا تاعى ءبىر ايتارىم – زاڭ بۇزۋشىلىق ورىن السا، قۇقىعى بۇزىلسا، سوتقا بارماس بۇرىن دالەلدەمەلەردى جيناپ الۋ كەرەك. جيناپ بولعان سوڭ ونى ساراپتاۋ قاجەت. قاي قۇجاتتى ۇسىنۋعا بولادى، قايسىسىن بولمايدى، سونى انىقتاپ الۋ كەرەك. سوت وتىرىسىنا قۇرقول كەلۋگە بولمايدى، قارسى تاراپتىڭ كىناسىن تەك قانا قۇجاتتارمەن، زاڭمەن ناقتى دالەلدەپ قانا ادىلدىككە قول جەتكىزە الاسىزدار. ال، سوتتا، پروكۋراتۋرا جۇيەسىندە
ادىلدىك جوق دەپ ايقايلاپ، بوس سوزبەن ەشتەڭەنى دالەلدەي المايسىز. سەبەبى سوت، پروكۋراتۋرا، ادۆوكاتتار، زاڭ شىعارۋ جۇيەسى، ۇكىمەت بارلىعىنىڭ ورتاق ماقساتى – ازاماتتىق قوعام، قۇقىقتىق مەملەكەت قۇرۋ. قۇقىقتىق مەملەكەتتە بارلىعىمىز ۇلكەن قالا
تۇرعىزىپ جاتقاندايمىز، ءارقايسىسىمىزدىڭ قولىمىزدا ءبىر-بىر كىرپىش بار. سوندىقتان، بۇل كىرپىشتى قالاعان كەزدە، ءاربىر ادام ءوزىنىڭ ويىن سالماقتاپ، سارالاپ جەتكىزە ءبىلۋ كەرەك. ال، قوعامنىڭ شىرقىن بۇزۋ، بوس دۇرلىكتىرۋ جاعىمسىز ءىس دەپ ەسەپتەيمىن. ەگەر ءبىر پروكۋرور نەمەسە اكىمنىڭ زاڭسىز ىس-ارەكەتى ورىن السا، سىبايلاس جەمقورلىققا قارسى كۇرەس دەپارتامەنتىنە، پرەزيدەنتكە، پروكۋراتۋراعا حات جازۋعا، باق-قا شىعارۋعا، سوتقا شاعىم بەرۋگە بولادى.
