قازاقستاندا مال شارۋاشىلىعىن دامىتۋ ءۇشىن جىلدىق مولشەرلەمەسى 6% بولاتىن جەڭىلدەتىلگەن نەسيە باعدارلاماسى ىسكە قوسىلدى، دەپ حابارلايدى Dala News.
اۋىل شارۋاشىلىعى مينيسترلىگىنىڭ مالىمەتىنشە، بۇل باستاما مەملەكەت باسشىسىنىڭ مال باسىن كوبەيتۋ، ونىمدىلىكتى ارتتىرۋ، وڭدەۋدى دامىتۋ جانە ەكسپورتتىق الەۋەتتى كۇشەيتۋ جونىندەگى تاپسىرماسى اياسىندا ازىرلەنگەن.
باعدارلاما 2026–2030 جىلدارعا ارنالعان مال شارۋاشىلىعىن دامىتۋ جونىندەگى كەشەندى جوسپار شەڭبەرىندە ىسكە اسىرىلىپ وتىر.
جەڭىلدەتىلگەن نەسيەنىڭ نەگىزگى شارتتارى:
•جىلدىق مولشەرلەمە – 6%؛
•سالانىڭ ەرەكشەلىكتەرىن ەسكەرەتىن يكەمدى نەسيەلەۋ مەرزىمى؛
•قارجىلاندىرۋدى «اگرارلىق نەسيە كورپوراسياسىنىڭ» فيليالدارى، كرەديتتىك سەرىكتەستىكتەر جانە ەكىنشى دەڭگەيلى بانكتەر ارقىلى الۋ مۇمكىندىگى.
بولىنگەن قاراجات اۋىل شارۋاشىلىعى جانۋارلارىن ساتىپ الۋعا جانە بورداقىلاۋ الاڭدارىن دامىتۋعا باعىتتالادى.
مينيسترلىك بۇل باعدارلاما اگرارشىلارعا مەملەكەتتىك قولداۋدى كۇشەيتىپ، قازاقستاندا مال شارۋاشىلىعىنىڭ دامۋىنا جاڭا سەرپىن بەرەدى دەپ كۇتۋدە.
