سەمەي قالاسىنداعى مۇحتار اۋەزوۆ اتىنداعى پەداگوگيكالىق كوللەدجدە «ادال ازامات» ءبىرىڭعاي تاربيە باعدارلاماسىن جۇزەگە اسىرۋ اياسىندا وبلىس اكىمى بەرىك ءۋاليدىڭ قاتىسۋىمەن MEETUP-كەزدەسۋ ءوتتى، دەپ حابارلايدى Dalanews.kz
ءىس-شاراعا وبلىستىق ءماسليحات ءتوراعاسى، ارداگەر ۇستازدار، جوعارى وقۋ ورىندارىنىڭ باسشىلارى، مەكتەپكە دەيىنگى، ورتا، تەحنيكالىق جانە كاسىپتىك ءبىلىم بەرۋ ۇيىمدارىنىڭ وكىلدەرى مەن ستۋدەنتتەر قاتىستى.
وبلىس اكىمى بەرىك ءۋالي جيىننىڭ اشىلۋىندا سويلەگەن سوزىندە بۇل باعدارلامانىڭ ۇرپاق تاربيەسى ءۇشىن ماڭىزى زور ەكەنىن اتاپ ءوتتى.
«پرەزيدەنت قاسىم-جومارت توقايەۆ ۇلتتىق قۇرىلتايدىڭ «ادىلەتتى قازاقستان – ادال ازامات» اتتى وتىرىسىندا سويلەگەن سوزىندە اباي مۇراسىنا سۇيەنە وتىرىپ، بۇل تۇجىرىمدامانىڭ ماڭىزىن ەرەكشە اتاپ ءوتتى. پرەزيدەنتىمىزدىڭ “وزىق ويلى ۇرپاق ءوسىرۋ ءۇشىن ءبىلىم مەن تاربيە ءاردايىم قاتار ءجۇرۋى كەرەك” دەگەن ءسوزى بارشا ءبىلىم سالاسى وكىلدەرىنە ورتاق قاعيداعا اينالۋى ءتيىس»، – دەدى ايماق باسشىسى.
سونداي-اق، ول ءوڭىردىڭ ءبىلىم سالاسىندا قولعا الىنعان ءبىرقاتار جوبالارعا توقتالىپ ءوتتى. اتاپ ايتقاندا، پرەزيدەنتتىڭ تاپسىرماسىمەن سەمەي قالاسىنداعى وقۋشىلار سارايىنىڭ قۇرىلىسىنا قارجى بولىنگەنىن جانە جاستاردىڭ باستامالارىن قولداۋ ماقساتىندا جاستار ءىسى جونىندەگى باسقارما قۇرىلاتىنىن جەتكىزدى.
كەزدەسۋ بارىسىندا:
-
قازاقستاننىڭ ەڭبەك ەرى، ارداگەر ۇستاز الما شۇكىجانوۆا،
-
كوللەدج ديرەكتورى شاعانگۇل جانايەۆا،
-
وبلىستىق ءبىلىم قىزمەتكەرلەرىنىڭ ارداگەرلەر كەڭەسىنىڭ ءتورايىمى مادەنيەت احمەتوۆا،
-
ءاليحان بوكەيحان ۋنيۆەرسيتەتىنىڭ پرورەكتورى ايرات بازەنوۆ،
-
«مەكتەپكە دەيىنگى ۇيىمنىڭ ۇزدىك پەداگوگى» بايقاۋىنىڭ جەڭىمپازى يرينا بوچاروۆا،
-
«قازاقستان رەسپۋبليكاسىنىڭ ۇزدىك 100 ستۋدەنتى» بايقاۋىنىڭ جەڭىمپازى شوقان بايمۋلايەۆ
بايانداما جاساپ، ءوز ويلارىن ورتاعا سالدى.
سۇراق-جاۋاپ بولىمىندە قاتىسۋشىلار ايماق باسشىسىنا ءوز ساۋالدارىن قويىپ، ۇسىنىس-پىكىرلەرىن ءبىلدىردى. بەرىك ءۋالي ءوڭىردىڭ دامۋىنا باعىتتالعان جوبالار تۋرالى ايتىپ، اۋىلداردى كوركەيتۋ، اباتتاندىرۋ، «تازا قازاقستان» باعدارلاماسى جانە الەۋمەتتىك نىساندار قۇرىلىسى بويىنشا جوسپارلارىمەن ءبولىستى.
كەزدەسۋگە دەيىن وبلىس اكىمى كوللەدجدىڭ وقۋ كابينەتتەرىن ارالاپ، مۋزەي مەن كىتاپحانا قىزمەتىمەن تانىستى. سونداي-اق، «شابىت»، «Smart bala»، «بالالار كىتاپحاناسى»، «قامقور»، «ەڭبەگى ادال – جاس ورەن»، «ۇشقىر وي الاڭى» سياقتى جوبالار بويىنشا ۇيىمداستىرىلعان كورمەنى تاماشالادى.
