اسسالاۋماعالەيكۋم, قازاق ەلٸ! مۇحيت اسقان قارا بالاڭىز تاعى دا سٸزدەرمەن بايلانىسقا شىعىپ تۇر. بۇل جولى قوس قورجىنىمدى تەڭ ۇستاپ, قولداۋ بٸلدٸرگەن گەناداي بالالارىڭىزدىڭ ەرلٸگٸن ايتۋعا شىعىپ تۇرمىن. ەرينە, بٶركٸمٸزدٸ اتىپ, سٷيٸنشٸ سۇرامادىڭ دەپ سٶكپەڭٸزدەر. جەڭٸستٸڭ شاشۋى شاشىلماسا دا, جەڭٸستەن كەم تٷسپەيتٸن كەزدەسۋ بولدى, جەڭٸسكە بەرگٸسٸز ەرلٸك كٶرسەتكەن گەنناديي بالالارىڭىزعا ريزا بولدىم. جات جەردە جٷرٸپ, ەلدٸڭ نامىسىن قۇلاتپاعان ۇلدارىڭىزعا مەنەن گٶرٸ سٸزدەر ەرەكشە قۇرمەت كٶرسەتٸپ جاتقان بولارسىزدار. ەلبەتتە, سولاي بولۋعا تيٸس. مايقۇدىقتىڭ مايتالمانى قانداي قۇرمەتكە دە لايىقتى, قالاي ماقتاسا دا بولادى. سونىمەن, العاشقى امانداسۋ سٶزٸمٸزدٸ تٷيٸندەپ, نەگٸزگٸ بوكستىڭ قالاي ٶتكەنٸنە توقتالايىن.
گيمن شالقىعان كەز! عاسىر جەكپە-جەگٸ باستالاتىن ۋاقىت تا جەتتٸ. گەنناديي مەن الۆارەستٸڭ شايقاسىنىڭ الدىنداعى كەزدەسۋلەرگە توقتالىپ, سٸزدەردٸڭ ۋاقىتتارىڭىزدى المايىن. بٸز دە, سٸز دە, كٷللٸ ەلەم كٷتكەن بوكستان بٸر-اق باستايىن.
سونىمەن, ەكٸ مىقتىنىڭ جۇدىرىقتاسۋى باستالماس بۇرىن, ەكٸ ەلدٸڭ مەملەكەتتٸك گيمنٸ شىرقالدى. قۇداي-اۋ, قانداي عاجاپ دەسەڭٸزشٸ?! تەۋەلسٸز قازاق ەلٸنٸڭ گيمنٸ مۇحيتتىڭ ارعى بەتٸنەن شىرقالعانى. بۇعان دەيٸن دە تالاي دٷبٸرلٸ دودا دا كٶك بايراعىمىز قالىقتاپ, ەن ۇرانىمىز شىرقالدى ەمەس پە. ال, بٷگٸنگٸ گيمٸن مٷلدە ەرەكشە دەسەم ارتىق ايتپاعانىم. تالانتىمەن تالايدى تاڭعالدىرىپ جٷرگەن گەنناديي گولوۆكيننٸڭ قۇرمەتٸنە ورىندالعان گيمننٸڭ «ت*mobile» كەشەننٸڭ ٸشٸن تاماشا بٸر كٷيگە بٶلەگەندەي ەسەر قالدىردى. كٶڭٸل تولقىتاتىن گيمننٸڭ داۋىسىن ەستٸگەن بٸزدٸڭ كٶزٸمٸزگە ىستىق جاس ٸركٸلگەندەي ەسەر قالدىردى. قازاقتىڭ شاپانىن كيٸپ, ورتاعا سىمداي تارتىلعان قازاقتىڭ سىمباتتى جٸگٸتٸ شىعىپ ۇرانداعاندا تٶبەمٸز بٸر ەلٸ كٶككە جەتكەندەي بولدىق. ەر تۇستان, كٶك كيٸمدٸ كيگەن قازاق جانكٷيەرلەرٸنٸڭ دە داۋىسى شىعىپ, ەلٸنٸڭ گيمنٸن قوسىلا شىرقاعانىن جيىرما مىڭ جانكٷيەردٸڭ ٸشٸنەن ەستٸپ تە تۇردىم. بۇل بٸز ٷشٸن قۋانىشتى جايت. شٸركٸن, سوڭعى راۋندتان كەيٸن دەل وسىلاي شىرقالىپ جاتسا دەگەن تٸلەگٸمٸزدٸ ٸشتەي قايتالاپ تۇردىق. سونىمەن ەكٸ مەملەكەتتٸڭ گيمنٸ ورىندالىپ, سوڭىنان ەلەمگە اتى ەيگٸلٸ مايكل بافەردٸڭ داۋىسى ساڭق ەتە قالدى. ورتاعا بوكسشىلاردى شاقىردى. شارشى الاڭعا جەتكەنشە اتاق-داڭتارىن تانىستىرىپ, قوس مىقتىنىڭ ەسٸمدەرٸ ايتىلدى. قازاقتىڭ ويۋلى شاپانىن جامىلىپ, گەنناديي گولوۆكين مەن قولداۋشىلارى شۇبىرتىپ, ساۋل الۆارەستە جەتتٸ. شارشى الاڭنىڭ ەر قاپتالىنا بارىپ, ويناقشىپ جٷرگەن ساۋل جانكٷيەرلەرٸنە قۇرمەت كٶرسەتٸپ جٷر. تىعىرشىقتاي جۇمىر دەنەسٸمەن بابىندا ەكەنٸ الىستان-اق بايقالادى. بٸزدٸڭ گەنا دا قالىسار ەمەس. ونىڭ دا جاقتاۋشىلارى جەتەرلٸك. ەلدەن كەلگەن جانكٷيەرلەردٸ قوسپاعاندا گەنانى جاقسى كٶرەتٸن ٶزگە دە جانكٷيەرلەر ەسٸمٸن ايعايلاپ, دۋىلداتىپ قويا بەردٸ.
1-راۋند. گەنا ەدەتتەگٸدەي قارسىلاسىن تىقسىرتىپ شارشى الاڭدا قۋىپ جٷر. ايتارلىقتاي جويقىن سوققى جۇمساماسا دا, دجەپ سوققىلارىن باعىتتاپ ساق قيمىلداۋدا. الۆارەستە بٸردەن بەرٸلە قوياتىن وسالدار ساناتىنان ەمەس ەكەنٸ انىق. گەنانىڭ سوقىسىنان سىتىلىپ شىعىپ, تيگٸزەتٸن ەمەس. ەيتسە دە, بٸزدٸڭ جٸگٸتتٸڭ ٷش سوققىسى ساۋلدٸڭ بەتٸنە تيدٸ. مەكسيكالىق جٸگٸتتە قاراپ قالمادى. راۋندتىڭ سوڭىنا قاراي ول دا قارىمتا قايتارىپ, بٸر-ەكٸ سوققىسىن دارىتىپ ٷلگەردٸ. جالپى, بٸرٸنشٸ راۋند بارلاۋمەن بولاتىنىن ەسكەرسەك, ەكٸ بوكسشى دا سول ٷردٸستەن تايقىمادى جەنە ٶتە ساق قيمىلدادى. كٶبٸنە قورعانىسقا كٶڭٸل بٶلٸپ, بٸر-بٸرٸنٸڭ سوققىسىنا تٷسٸپ قالماۋدى ويلادى. مەنٸڭ ويىمشا بٸرٸنشٸ راۋند تەڭ دەرەجەدە ٶتتٸ جەنە سولاي دەپ باعا بەرەمٸن.
2-راۋند. نەگە ەكەنٸ بەلگٸسٸز گەنانىڭ قارقىنى بەسەڭدەۋ. بۇعان دەيٸن بولعان كەزدەسۋلەرٸندە قارسىلاستارىن تٶمپەشتەپ الاتىن گەنا بۇل جولى ونداي قادامعا بارمادى. كەرسٸنشە, الۆارەس قاۋٸپتٸ سوققىلارىمەن شابۋىلداپ, بٸر-ەكٸ سوققىسىن دا ٶتكٸزٸپ ٷلگەردٸ. ال وتانداسىمىز بولسا, كٶبٸرەك قورعانىسقا كٶڭٸل بٶلۋدە. تٸپتٸ بارعان سايىن مەكسيكالىق بوكسشى قارقىن الىپ بارا جاتقانداي. جٷرەگٸمٸز اۋزىمىزعا تىعىلىپ, قارسى سوققىعا تاپ كەلٸپ قالماسا ەكەن دەپ تٸلەپ وتىرمىز. ە, مٸنە, ەكٸنشٸ راۋند تا اياقتالدى. قاۋٸپتٸ سەتتەن امانبىز. شامامەن تەڭ اياقتالدى دەپ ەسەپتەيمٸن.
3-راۋند. تاقىم قىسىپ, جانىمدى شٷبەرەككە تٷيٸپ وتىرمىن. گەنا بۇل جولى تىم سىلبىر. قورعانىسى دا سىر بەرٸپ جاتىر. الۆارەستٸڭ بٸرنەشە اۋىر سوققىسى ٶتٸپ كەتتٸ. قۇداي وڭداعاندا قۇلاپ قالۋدان امانبىز. وسى ۋاقىتتا قارسىلاسىن شارشى الاڭدا بٸر اۋناتىپ الاتىن گەنانىڭ بۇرىنعىداي قارقىنىن بايقاي الماي وتىرمىن. كەرسٸنشە قارقىنىنا-قارقىن قوسقان الۆارەس باسىمدىق تانىتۋدا. وڭ قولىمەن باعىتتاعان سوققىلارى قورعانىستى بۇزىپ جاتقانداي كٶرٸنەدٸ. قالاي بولعاندا دا جاستىڭ اتى جاس, اياعىمەن دە شيراق قيمىلداپ, جۇدىرىعىن دا جىلدام جۇمساپ, ۇپاي ەنشٸلەۋدە. كەيبٸر سوققىلارىنا تٸپتٸ كٶز ٸلەسپەي, قاي جەرٸنەن سارت ەتە قالعانىن دا بايقاي الماۋدامىز. ٶيتكەنٸ ٶتە جىلدام, تىم شاپشاڭ. بوكسشى ٷشٸن ەڭ كەرەكتٸسٸ دە وسى شىعار. اشىق تۇستى تەز بايقاپ, سارت ەتكٸزۋ. سونىمەن ٷشٸنشٸ راۋندتا اياقتالدى. بۇل جولى بٸر باسى باسىم بولسا دا, الۆارەستٸڭ قانجىعاسىندا كەتتٸ دەپ ويلايمىن.
4-راۋند. مەنٸڭ كٶزٸم ٶزٸنە-ٶزٸ سەنبەي وتىر. بۇعان دەيٸن قارسىلاسىنا جارق ەتٸپ تيەتٸن گەنانىڭ سوققىسىن ٸزدەيتٸندەي. باياعى كومبيناتسييا, شاپشاڭدىق, ٶگٸزدٸ قۇلاتاتىن جويقىن سوققىنىڭ بارلىعى تٶرتٸنشٸ راۋندتا جوق. الۆارەس بولسا ٷستٸ-ٷستٸنە تٶپەلەتٸپ سوققىلاپ جٷر. گەنا تەك قورعانۋدا. قورعانىستىڭ ٶزٸ كٶڭٸلگە مەدەت دەگەنٸمٸز بولماسا, اراگٸدٸك بۇزىلىپ قالىپ, قارسى سوققىلاردى بەتٸنە تيگٸزٸپ الۋدا. كەي تۇستار دا ساۋلدٸڭ باۋىر تۇستان جۇمسالعان جۇدىرىعى گەنانى تەڭسەلتٸپ جٸبەرەدٸ. قۋانىشقا وراي قۇلاپ قالماي, شارشى الاڭدا جٷر. ەرينە, مەنٸ ساۋلعا جاقتاسىپ وتىر دەۋلەرٸڭٸز مٷمكٸن. بٸراق مىنا بوكس مەن ٷشٸن قيىنعا سوعۋدا. دەل وسى كەزدەسۋدٸ گەنانىڭ ەنشٸسٸنە جازىپ جاتسا, وندا مەن سٸزدەردەن كەشٸرٸم سۇرايمىن. دەل قازٸرگٸ راۋند ساۋلدٸڭ باسىمدىعى بايقالادى. سپورت بولعاسىن ناقتى اقپارات پەن شىندىقتى ايتۋ كەرەك. ەيتپەسە, سوناۋ قازاق اۋىلىنان گەناعا جاقتاسپاعاندا مەكسيكانىڭ سارى شەگٸرٸنٸڭ شاش باۋىن كٶتەرٸپ كەلدٸ دەيسٸزدەر مە. ساۋل دەل سوققان سوققىلارىمەن كٸمدٸ بولسا دا ەرٸكسٸز ٶزٸنٸڭ جەتەگٸنە ەرتٸپ كەتەتٸندەي. سونىمەن بۇل راۋندتى دا مەن ساۋلعا بەرگەندٸ جٶن ساناپ وتىرمىن. ەرينە, بوكستىڭ تاعدىرىن شەشەتٸن, جەڭٸستٸ انىقتايتىن مەن ەمەس. مەن تەك, ٶزدەرٸڭٸز سەكٸلدٸ جانكٷيەرمٸن, ەكٸ مىقتىنىڭ اراسىنداعى شايقاس جايلى اقپارات تاراتۋعا ەلدەن كەلگەن جالعىز جۋرناليسپٸن. ال, ۇپايدى ەسەپتەۋ تٶرەشٸلەردٸڭ ەنشٸسٸندە.
5-راۋند. بۇل راۋندتا گەنانىڭ ەنشٸسٸنە جازۋعا بولادى. ساۋلدٸ بۇرىشقا تىعىپ الىپ سابادى. سوققىلارى دا دارىدى. وسى تۇستا ايتا كەتەيٸن, گەنا ەدەتتە بۇرىشقا تىعىپ قارسىلاسىن ساباعان تۇستا, بٸرنەشە سەرييالى سوققى جۇمساپ, ەسٸرەسە باۋىر تۇستان سوعاتىن ەدەمٸ بٸر سوققىلارى بار ەدٸ. بۇل جولى ونى بٸز بايقاي الماي وتىرمىز. اراسىندا سول ەدٸسٸنە سالىپ قويادى. دەگەنمەن, ەلسٸز. تٸپتٸ ساۋلٸڭ ويىن كٶرٸپ جٷرگەندەي. گەنانىڭ سوققىلارى تيٸپ جاتسا, باسىن شايقاپ, بار بولعانى وسى ما, ماعان ەش ەسەر ەتپەدٸ دەگەندەي يشارا تانىتىپ جٷر.
6-راۋند. گەنناديي ٶزٸنٸڭ بابىنا ەندٸ كەلە جاتقانداي. شيىرشىق اتىپ, اتويلاپ شاپتى. بٸرنەشە سەرييالى سوققىلارىن جۇمساپ, ساۋلدٸ ەبٸگەرگە تٷسٸردٸ. ٶگٸز قۇلاتاتىن بٸر-ەكٸ سوققىسى دەل تيدٸ. بٸراق, ساۋل دا مىقتى ەكەن. قاتتى تيسە دە تٸزەرلەگەن جوق.
7-راۋند. بۇل راۋندتى دا گەناعا بەرەمٸن. ساۋلدٸڭ الدىنداعى باتىرلىعى بەسەڭدەپ قالعانداي. جٷزٸندە بٸر قورقىنىش پايدا بولدى. بٸر قاراعاندا شارشاپ تا قالعانداي. كەزدەسۋدٸڭ سوڭىنا قاراي گەنناديي جٸگەرلەنە باستاپ, ٶزٸنٸڭ مەنەرٸنە كٶشتٸ. ەرينە, ساۋلدٸڭ ساعى مٷلدەم سىنىپ كەتتٸ دەۋگە كەلمەيدٸ. كەزدەسۋدٸڭ تاعدىرى بۇل راۋندپەن شەشٸلٸپ كەتپەسٸ انىق. الدا ەلٸ راۋندتار بار. ول دا جاقسى بابىن دا, ەبدەن تولىقسىعان ۋاقىتى. ونىڭ ٷستٸنە گەنانى ٶتە جٸتٸ زەرتتەپ, تىڭعىلىقتى دايىندالعانى كٶرٸنٸپ تۇر.
8-راۋند. ٶمٸر دەگەن الما-كەزەك ەمەس پە. بۇل راۋندتىڭ باسىن ساۋل بەلسەندٸلٸكپەن باستادى. از دا بولسا تىنىعىپ العاسىن با, العاشقى جۇمساعان جۇدىرىقتارى گەناعا ٶتٸپ كەتتٸ. بٸراق, بٸزدٸڭ گەنا دا جۇدىرىققا-جۇدىرىقپەن جاۋاپ قايتىپ, وسالدىق تانىتپادى. ەسٸرەسە الىس قاشىقتىقتان جاساعان دجەپتەرٸ دەل تيٸپ جاتتى. تاكتيكاعا دا كٶڭٸل بٶلٸپ, جاقىن شايقاسقا بارماي, قارىمتا قايتارىپ, ۇمتىلعان تۇستا جاقسى كٷتٸپ الدى. بۇل گەنانىڭ بۇرىنعى ەدٸستەرٸنٸڭ بٸرٸ بولاتىن. گەنا راۋندتتىڭ سوڭعى سەكۋندتارىن جاقسى اياقتاپ, جويقىن بولماسا دا, دەل باعىتتاعان جۇدىرىعى دٸتتەگەن جەرٸنە تيدٸ.
9-راۋند. بۇل راۋند تا ٶتە قىزىقتى بولدى. شىم-شىتىرىق سوققىلاردى جۇمساپ, بٸر-بٸرٸن تٶمپەشتەي جٶنەلدٸ. گەنانىڭ بٷركٸتشە بٷرٸپ الاتىن كەزٸ وسى راۋندتا ورىن الدى. اناۋ جٸگٸت تە تابانى جەرگە جەلٸمدەلٸپ قالعان با, اۋىر سوققىنى قانشا قابىلداسا دا قۇلاماي قالدى. ونىڭ ٷستٸنە كٶپتەگەن ماماندار مەن جانكٷيەرلەر گەنا الۆارەستٸ وسى توعىزىنشى راۋندتا قۇلاتادى دەگەن پٸكٸرلەر بولعان. سول ايتقاندارى دەل كەلمەسە دە, سەل عانا قالدى جەنە راسىندا دا وسى راۋندتا گەنا اتوي سالدى.
10-راۋند. كەزدەسۋدٸڭ كٶمبەسٸ كٶرٸنگەن سايىن بوكسشىلار قارقىن الىپ كەلەدٸ. تٸپتٸ وسى راۋندتا بٸر بٸرٸنە باعىتتاعان سوققىلارىن مەن قابىلداعانداي بولدىم. ەسەڭگٸرەپ, ميىم اۋىپ قالعانداي كٷي كەشتٸم. شىم-شىتىرىق جۇمسالعان جۇدىرىققا كٶز ٸلەسپەيدٸ. بٸر-بٸرٸنە اۋىر سوققىلارمەن جاۋاپ قايتارىپ, بەرٸلەتٸن ەمەس. قاي جەڭگەنٸڭ مەنٸكٸ دەگەندەي, سوققىلار دەل تيسە ايىزى قانعان جانكٷيەرلەر ورنىنان بٸر تۇرىپ وتىر. مەن دە گەناجان, كەزٸڭ كەلدٸ, ۇر, ۇرا تٷس, سەنٸڭ قولىڭنان كەلەدٸ, تالاي مىقتىنىڭ جٸگەرٸن قۇم ەتتٸڭ ەمەس پە دەگەن سٶزدٸ ٸشتەي كٷبٸرلەي جٶنەلدٸم. بٸراق, ەكٸ مىقتى دا بٸر-بٸرٸن قۇلاتا المادى. مەنٸڭشە, بۇل راۋند تەڭ اياقتالدى دەسەم, ەشكٸم داۋلاسا قويماس. الدا ناعىز چەمپيونداردىڭ راۋندتى كٷتٸپ تۇر جەنە ول دا باستالدى.
11-راۋند. بٸز كٷتكەن شايقاس بۇل جولى بولمادى. ەكٸ بوكسشىمىز دا شارشاپ قالعانداي كٶرٸندٸ. كٸم بٸلەدٸ, مٷمكٸن, كٷشتەرٸن سوڭعى راۋندقا ساقتاپ جٷر مە, ەيتەۋٸر, اسا تارتىستى بولمادى. جويقىن سوققىلار جۇمسامادى. بٸر سٶزبەن ايتقاندا تەڭ دەرەجەدە ٶتكٸزدٸ.
12-راۋند. قۇشاقتاسۋدان باستالعان راۋند سارتىلداعان سوقىلارمەن جالعاسىپ كەتتٸ. گونگ بەرٸلگەن بەتتە ساۋل بٸرنەشە اۋىر سوققىلاردى باعىتتاپ ٷلگەردٸ. دەل وسى تۇستا, جٷرەگٸمٸز اۋزىمىزعا تىعىلىپ گەنا, شىدا, قۇلاما, سەن دە سوق دەپ تاقىم قىستىق. مىقتىنى – مىقتى دەۋ كەرەك. تالاي شايقاستا ىسىلعان گەنناديي سوققىسىنا سوققىمەن جاۋاپ بەرٸپ, اشىق ايقاسقا شىقتى. ناعىز چەمپيونداردىڭ شايقاسى ەندٸ باستالعانداي. جانكٷيەرلەر دە دۋىلداپ قويا بەردٸ. بۇل راۋند كٶپ نەرسەنٸ شەشەدٸ. تٶرەشٸلەردٸڭ بۇعان دەيٸنگٸ راۋندتا قانداي باعا بەرگەنٸن بٸلمەيمٸن. بٸراق, سوڭعى راۋند چەمپيوندىقتىڭ تاعدىرى شەشٸلەتٸن كەز. مۇندا سوققى مەن قوسا, بەلسەندٸلٸك, دەلدٸك ەسەپتەلەتٸنٸن ەستەن شىعارماۋىمىز كەرەك. ونى مەنەن گٶرٸ بوكسشىلار جاقسى بٸلەدٸ. سوعان قاراي ەكەۋٸ دە تىنباي قول سەرمەپ جاتىر. مٸنە, 12 راۋندتىڭ بٸتۋٸنە 40 سەكۋند قالدى. گەنا دا قارقىنعا باستى. سوققىلاپ جاتىر. ساۋلدا قالىسار ەمەس. دەلدٸك جاعىنان گەنانىڭ باسىمدىعى بايقالادى. يە, مٸنە, 5 سەكۋند, 4 سەكۋند, 3 سەكۋند, 2 سەكۋند بٸتتٸ. ەي, جارايسىڭ! جاسىڭ 35-كە كەلگەندە جاپ-جاس مەكسيكانىڭ قابىلانىمەن ارىستانشا ايقاستىڭ. شىن شايقاستى كٶرسەتتٸڭ. ول سەنٸڭ مىقتىلىعىڭ. سوڭعى سەكۋنقا دەيٸن سوققىلارىڭدى قارشا بوراتتىڭ. مەنٸڭشە تٶرەشٸلەر تەڭ دەپ شەشەر. ەيتسە دە, بٸر سوققى بولسا دا گەنانىڭ ەنشٸسٸنە جازىلۋ كەرەك, بۇل راۋند. بٸراق, سوڭعى تولىق شەشٸمدٸ توسايىق.
تٷيٸن:
ۇلى شايقاستىڭ شەشۋشٸ كەزٸ دە كەلٸپ جەتتٸ. مەن بۇعان دەيٸنگٸ رەپورتاجدارىمدا ايتقان بولاتىنمىن. ەگەر ەكٸ بوكسشى تەڭ تٷسٸپ جاتسا تاڭعالماڭىزدار دەپ. ەكەۋٸ دە ناعىز باتىرعا لايىق بوكس كەشٸن سىيلادى. يە, تٶرەشٸ كٸمنٸڭ قولىن كٶتەرەدٸ. حابارلاۋ باستالدى. ەپ, بەرەكەلدٸ! ەكەۋٸ تەڭ تٷستٸ, تەڭ شەشٸم شىعاردى. مٸنە, مەنٸڭ ايتقانىم دەل كەلدٸ. ەرينە, بۇعان بٸز قۋانۋىمىز كەرەك. جەڭٸلٸس جوق, الدا ەلٸ شايقاس بار. قۋانىشىمىزعا وراي بٸزدٸڭ گەنناديي ٶزٸنٸڭ چەمپيوندىق اتاعىن قورعاپ قالدى. باسىمىز جەرگە قاراعان جوق. تەۋبە, ەڭسەمٸز تٸك. لايىم سولاي بولعاي! مەكسيكالىق سارى شەگٸر قارىمتا قايتارام دەيدٸ. وعان بٸزدٸڭ مىقتى دا تاستٷيٸن دايىنمىن دەپ جاتىر. ناعىز چەمپيون سول كەزدە انىقتالار. مٷمكٸن, ٷشٸنشٸ كەزدەسۋدە... قالاي بولسا دا, الدا ەلٸ شايقاس بار ەكەنٸن كٶكەيگە تٷرتٸپ الايىق. بۇل جولى نەگە انىقتالمادى دەگەنگە كەلسەك, ونىڭ بٸرنەشە سەبەبٸ بار. ونى مەن كەلەسٸ جازباما قالدىرايىن. گەنا مەن ساۋلدٸڭ شايقاسىنداي چەمپيوندىقتى جۇمباق كٷيٸندە قالدىرعانداي تامساندىرىپ قانا اياقتايىن. ال, اعايىن, مەن وسىمەن لاس-ۆەگاستاعى رەپورتاجىمدى ۋاقىتشا دوعارايىن. ەلگە بارعاسىن ۋەدە ەتكەن سەبەپتەردٸ جازاتىن بولامىن. اماندىقتا جٷزدەسكەنشە!
نەسٸپ جٷنٸسبايۇلى, اقش, لاس-ۆەگاس.
