قازاقستاندىق Eurasia Agro Semey كومپانياسى كۋۆەيتكە ەت ونىمدەرىن ەكسپورتتاۋعا باعىتتالعان ماڭىزدى كەلىسىمدەرگە قول جەتكىزدى، دەپ حابارلايدى Dala News.
قازاقستان رەسپۋبليكاسىنىڭ كۋۆەيت مەملەكەتىندەگى ەلشىلىگىنىڭ قولداۋىمەن كومپانيا وكىلدەرى كۋۆەيتكە جۇمىس ساپارىمەن بارىپ، جەرگىلىكتى ءىرى اگروونەركاسىپتىك جانە ساۋدا قۇرىلىمدارىمەن كەلىسسوزدەر جۇرگىزدى.
ساپار اياسىندا Eurasia Agro Semey مەن كۋۆەيتتىك ALMARAI National Co. اراسىندا ىنتىماقتاستىق تۋرالى مەموراندۋمعا قول قويىلدى. قۇجات 2026 جىلدىڭ تامىز ايىندا سەمەيدەگى ەت وڭدەۋ كەشەنى ىسكە قوسىلعاننان كەيىن قازاقستاندىق ەت ونىمدەرىن كۋۆەيت نارىعىنا جەتكىزۋگە نيەتتى ەكەنىن بەكىتەدى.
بۇل كەلىسىم قازاقستان مەن كۋۆەيت اراسىنداعى ساۋدا-ەكونوميكالىق بايلانىستاردى كەڭەيتىپ قانا قويماي، وتاندىق اگروونەركاسىپ ونىمدەرىنىڭ تاياۋ شىعىس نارىعىنداعى ورنىن نىعايتۋعا باعىتتالعان.
سونىمەن قاتار قازاقستاندىق كومپانيا باسشىلىعى كۋۆەيتتەگى ازىق-تۇلىك ديستريبۋسياسىنداعى ءىرى ويىنشىلاردىڭ ءبىرى Al-Yasra ساۋدا توبىمەن جانە ەلدەگى ەڭ ءىرى سۋپەرماركەت جەلىلەرىنىڭ قاتارىنا كىرەتىن The Sultan Center كومپانياسىمەن كەزدەسۋلەر وتكىزدى. كەلىسسوزدەر بارىسىندا جوعارى قوسىلعان قۇنى بار قازاقستاندىق ونىمدەردى كۋۆەيت نارىعىنا جەتكىزۋدىڭ ىقتيمال فورماتتارى تالقىلاندى.
ايتا كەتەيىك، Eurasia Agro Semey جوباسى كەڭەس كەزەڭىندە سالا فلاگمانى بولعان سەمەي قالاسىنداعى كالينين اتىنداعى ەت كومبيناتى ورنالاسقان اۋماقتا جۇزەگە اسىرىلۋدا. كومپانيا ءوڭىردىڭ وندىرىستىك ءداستۇرىن ساقتاي وتىرىپ، حالىقارالىق ستاندارتتارعا ساي زاماناۋي، جوعارى تەحنولوگيالى ەت وڭدەۋ كەشەنىن سالۋدا.
جوبا تولىق ىسكە قوسىلعاننان كەيىن قازاقستاننىڭ ەكسپورتتىق الەۋەتىن ارتتىرىپ، وتاندىق ەت ونىمدەرىن جاڭا سىرتقى نارىقتارعا جۇيەلى تۇردە شىعارۋعا مۇمكىندىك بەرەدى.
