Qazaqstandyq Eurasia Agro Semey kompaniiasy Kýveitke et ónimderin eksporttaýǵa baǵyttalǵan mańyzdy kelisimderge qol jetkizdi, dep habarlaidy Dala News.
Qazaqstan Respýblikasynyń Kýveit Memleketindegi Elshiliginiń qoldaýymen kompaniia ókilderi Kýveitke jumys saparymen baryp, jergilikti iri agroónerkásiptik jáne saýda qurylymdarymen kelissózder júrgizdi.
Sapar aiasynda Eurasia Agro Semey men kýveittik ALMARAI National Co. arasynda yntymaqtastyq týraly memorandýmǵa qol qoiyldy. Qujat 2026 jyldyń tamyz aiynda Semeidegi et óńdeý kesheni iske qosylǵannan keiin qazaqstandyq et ónimderin Kýveit naryǵyna jetkizýge nietti ekenin bekitedi.
Bul kelisim Qazaqstan men Kýveit arasyndaǵy saýda-ekonomikalyq bailanystardy keńeitip qana qoimai, otandyq agroónerkásip ónimderiniń Taiaý Shyǵys naryǵyndaǵy ornyn nyǵaitýǵa baǵyttalǵan.
Sonymen qatar qazaqstandyq kompaniia basshylyǵy Kýveittegi azyq-túlik distribýtsiiasyndaǵy iri oiynshylardyń biri Al-Yasra saýda tobymen jáne eldegi eń iri sýpermarket jelileriniń qataryna kiretin The Sultan Center kompaniiasymen kezdesýler ótkizdi. Kelissózder barysynda joǵary qosylǵan quny bar qazaqstandyq ónimderdi Kýveit naryǵyna jetkizýdiń yqtimal formattary talqylandy.
Aita keteiik, Eurasia Agro Semey jobasy keńes kezeńinde sala flagmany bolǵan Semei qalasyndaǵy Kalinin atyndaǵy et kombinaty ornalasqan aýmaqta júzege asyrylýda. Kompaniia óńirdiń óndiristik dástúrin saqtai otyryp, halyqaralyq standarttarǵa sai zamanaýi, joǵary tehnologiialy et óńdeý keshenin salýda.
Joba tolyq iske qosylǵannan keiin Qazaqstannyń eksporttyq áleýetin arttyryp, otandyq et ónimderin jańa syrtqy naryqtarǵa júieli túrde shyǵarýǵa múmkindik beredi.
