قازاقستاندا جەكە مەديسينالىق ۇيىمدارعا جۇرگىزىلگەن كەشەندى تەكسەرۋلەر ناتيجەسىندە شامامەن 400 مەكەمە ءوز قىزمەتىن توقتاتتى، دەپ حابارلايدى Dala News.
دەنساۋلىق ساقتاۋ مينيسترلىگىنىڭ مەديسينالىق جانە فارماسيەۆتيكالىق باقىلاۋ كوميتەتى 2025 جىلى جەكە سەكتورداعى مەديسينالىق ۇيىمدارعا باقىلاۋدى كۇشەيتكەن. ناتيجەسىندە ەل بويىنشا 500-دەن استام اكىمشىلىك شارا قولدانىلىپ، سالىنعان ايىپپۇل كولەمى 70 ملن تەڭگەدەن استى.
تەكسەرۋلەر بارىسىندا ليسەنزياسىز قىزمەت كورسەتۋ، بىلىكتىلىك تالاپتارىنىڭ ساقتالماۋى جانە مەديسينالىق كومەك ستاندارتتارىنىڭ ورەسكەل بۇزىلۋى ءجيى انىقتالعان. العاش رەت قاداعالاۋ تاجىريبەسىندە جەدەل ارەكەت ەتۋ تەتىكتەرى قولدانىلىپ، كەيبىر ۇيىمداردىڭ قىزمەتى ۋاقىتشا توقتاتىلىپ، مەديسينالىق قىزمەتكەرلەر جۇمىسىنان شەتتەتىلدى.
نەگىزگى نازار جەكە پروسەدۋرالىق كابينەتتەرگە، ناركولوگيالىق وڭالتۋ ورتالىقتارىنا جانە ستوماتولوگيالىق كلينيكالارعا اۋدارىلعان. ەل بويىنشا 1900-دەن استام پروسەدۋرالىق كابينەت انىقتالىپ، ولاردىڭ 406-سى ليسەنزياسىز جۇمىس ىستەگەنى بەلگىلى بولدى. ءتۇسىندىرۋ جۇمىستارىنىڭ ناتيجەسىندە 247 كابينەت ءوز ەركىمەن جابىلعان.
سونداي-اق 39 جەكە ناركولوگيالىق جانە وڭالتۋ ورتالىعى تەكسەرىلىپ، ولاردىڭ 14-ىندە ليسەنزيا مۇلدە بولماعان. ال 313 ستوماتولوگيالىق كلينيكانىڭ 143ء-ى تەكسەرۋدەن كەيىن قىزمەتىن توقتاتۋعا ءماجبۇر بولعان.
ەڭ ءجيى كەزدەسكەن زاڭبۇزۋشىلىقتار قاتارىندا ليسەنزياسىز مەديسينالىق قىزمەت، فارماسيەۆتيكالىق ەرەجەلەردىڭ ساقتالماۋى، كادرلاردىڭ تالاپقا ساي كەلمەۋى، تىركەلمەگەن دارىلىك زاتتار مەن مەديسينالىق بۇيىمداردى قولدانۋ بار.
مينيسترلىك 2026 جىلدان باستاپ جەكە مەديسيناعا باقىلاۋدى ودان ءارى كۇشەيتۋدى جوسپارلاپ وتىر. اتاپ ايتقاندا، ليسەنزيالاردىڭ بەس جىلدىق مەرزىممەن بەرىلۋى، قايتا باعالاۋ تەتىگىن ەنگىزۋ، پوستليسەنزيالىق باقىلاۋدى سيفرلاندىرۋ جانە جاساندى ينتەللەكت ەلەمەنتتەرى بار تاۋەكەلدەردى باسقارۋ جۇيەسىن ىسكە قوسۋ كوزدەلگەن.
ۆەدومستۆو قازاقستاندىقتاردى مەديسينالىق قىزمەت الار الدىندا مەكەمەنىڭ ليسەنزياسى مەن مامانداردىڭ بىلىكتىلىگىن تەكسەرۋگە شاقىرادى. زاڭبۇزۋشىلىق انىقتالعان جاعدايدا ازاماتتار E-otinish پلاتفورماسى ارقىلى ءتيىستى ورگانعا شاعىم تۇسىرە الادى.
