Qazaqstanda jeke meditsinalyq uiymdarǵa júrgizilgen keshendi tekserýler nátijesinde shamamen 400 mekeme óz qyzmetin toqtatty, dep habarlaidy Dala News.
Densaýlyq saqtaý ministrliginiń Meditsinalyq jáne farmatsevtikalyq baqylaý komiteti 2025 jyly jeke sektordaǵy meditsinalyq uiymdarǵa baqylaýdy kúsheitken. Nátijesinde el boiynsha 500-den astam ákimshilik shara qoldanylyp, salynǵan aiyppul kólemi 70 mln teńgeden asty.
Tekserýler barysynda litsenziiasyz qyzmet kórsetý, biliktilik talaptarynyń saqtalmaýy jáne meditsinalyq kómek standarttarynyń óreskel buzylýy jii anyqtalǵan. Alǵash ret qadaǵalaý tájiribesinde jedel áreket etý tetikteri qoldanylyp, keibir uiymdardyń qyzmeti ýaqytsha toqtatylyp, meditsinalyq qyzmetkerler jumysynan shettetildi.
Negizgi nazar jeke protsedýralyq kabinetterge, narkologiialyq ońaltý ortalyqtaryna jáne stomatologiialyq klinikalarǵa aýdarylǵan. El boiynsha 1900-den astam protsedýralyq kabinet anyqtalyp, olardyń 406-sy litsenziiasyz jumys istegeni belgili boldy. Túsindirý jumystarynyń nátijesinde 247 kabinet óz erkimen jabylǵan.
Sondai-aq 39 jeke narkologiialyq jáne ońaltý ortalyǵy tekserilip, olardyń 14-inde litsenziia múlde bolmaǵan. Al 313 stomatologiialyq klinikanyń 143-i tekserýden keiin qyzmetin toqtatýǵa májbúr bolǵan.
Eń jii kezdesken zańbuzýshylyqtar qatarynda litsenziiasyz meditsinalyq qyzmet, farmatsevtikalyq erejelerdiń saqtalmaýy, kadrlardyń talapqa sai kelmeýi, tirkelmegen dárilik zattar men meditsinalyq buiymdardy qoldaný bar.
Ministrlik 2026 jyldan bastap jeke meditsinaǵa baqylaýdy odan ári kúsheitýdi josparlap otyr. Atap aitqanda, litsenziialardyń bes jyldyq merzimmen berilýi, qaita baǵalaý tetigin engizý, postlitsenziialyq baqylaýdy tsifrlandyrý jáne jasandy intellekt elementteri bar táýekelderdi basqarý júiesin iske qosý kózdelgen.
Vedomstvo qazaqstandyqtardy meditsinalyq qyzmet alar aldynda mekemeniń litsenziiasy men mamandardyń biliktiligin tekserýge shaqyrady. Zańbuzýshylyq anyqtalǵan jaǵdaida azamattar E-otinish platformasy arqyly tiisti organǵa shaǵym túsire alady.
