ءماجىلىس وتىرىسىندا وسكەمەندەگى اۋا ساپاسى ماسەلەسى كوتەرىلدى. دەپۋتات مارات باشيموۆتىڭ ايتۋىنشا، قالادا تىنىس الۋدىڭ ءوزى ءقاۋىپتى دەڭگەيگە جەتكەن، دەپ حابارلايدى Dalanews.kz.
ونىڭ مالىمەتىنشە، قاڭتار ايىندا اۋاداعى كۇكىرتسۋتەك پەن كۇكىرت ديوكسيدىنىڭ مولشەرى رۇقسات ەتىلگەن نورمادان 3،6 ەسە اسىپ كەتكەن. دەپۋتات بۇل جاعدايدى ماۋسىمدىق قۇبىلىس ەمەس، ۇزاق ۋاقىتتان بەرى جالعاسىپ كەلە جاتقان جۇيەلى لاستانۋ دەپ باعالادى.
باشيموۆتىڭ سوزىنشە، قالا تۇرعىندارى كۇن سايىن لاستانعان اۋامەن تىنىستاۋعا ءماجبۇر، الايدا ولار ءتيىستى وتەماقى دا، مەملەكەت تاراپىنان جۇيەلى قولداۋ دا الماي وتىر. قازىرگى شارالار كوبىنە "دالاعا سيرەك شىعۋ" سياقتى ۇسىنىمدارمەن عانا شەكتەلىپ وتىرعانىن ايتتى.
دەپۋتات ەكولوگيالىق جاعدايدى جاقسارتۋ ءۇشىن شۇعىل ءارى ناقتى شارالار قابىلداۋدى تالاپ ەتتى.
