«Кезби» ЖШС-нің бұрынғы басқарушы директоры Ержан Кезбаев аса ірі көлемдегі сеніп тапсырылған қаражатты иемденді және салық төлеуден жалтарды деген айыппен кінәлі деп танылды, деп хабарлайды Dalanews.kz Lada.kz-ке сілтеп.

2022–2023 жылдары Ержан Кезбаев «Өзенмұнайгаз» АҚ тарапынан ұңғымаларды күрделі және жерасты жөндеуге тартылған жұмысшылардың жалақысын төлеуге бөлінген қаражаттың бір бөлігін жеке мақсатта пайдаланған. Контракттарда көзделген жалақы төлеміне арналған жалпы соманың 70 пайызынан 2022 жылы тек 51,5%-ын, ал 2023 жылы 57,7%-ын ғана жалақы ретінде бағыттаған. Қалған айырмашылық – 1,45 миллиард теңге – басқа мақсаттарға жұмсалған.

Сонымен қатар, Кезбаев басқаратын компания нөлдік салық декларацияларын тапсырып, нақты кірістерді жасырып келген. Салдарынан мемлекетке салық түрінде 1,57 миллиард теңге көлемінде залал келген.

Жалпы келтірілген залал – 3 миллиард теңгеден астам.

Айыпталушы өз кінәсін ішінара мойындады, және 2023 жылы кәсіпорын ереуілдер мен қаржыландырудың болмауынан қиын жағдайда болғанын алға тартты.

Сот Ержан Кезбаевты 10 жылға бас бостандығынан айырды. Сонымен қатар, оған 10 жыл мерзімге мұнай-газ саласындағы басшылық қызмет атқаруға тыйым салынды.

Сонымен бірге:

«Өзенмұнайгаз» АҚ пайдасына – 321 миллион теңге;

Маңғыстау облысы бойынша мемлекеттік кірістер департаментінің пайдасына – 1,5 миллиард теңгеден астам қаражат өндірілетін болды.

Маңғыстау облыстық сотының қылмыстық істер жөніндегі сот алқасы бұл үкімді өзгеріссіз қалдырды. Үкім заңды күшіне енді.