Májilis depýtaty Ermurat Bapi belsendi túrde aktivterin qaitaryp jatqan Qairat Satybaldyuly bostandyqqa shyǵýy múmkin dep qaýiptenip otyr, - dep habarlaidy Dalanews.kz.
Bul týraly depýtat Facebook paraqshasynda jazdy.
"Ony (Satybaldyulyn) merziminen buryn shartty túrde bosatýǵa nemese amnistiia jasaýǵa daiyndap jatyr ma? Urlaǵan aktivterin óz erkimen qaitaryp jatqany jaqsy. Biraq ol memleket qazynasyna túse me? Resmi derekterge sený ne senbeý ǵana qaldy. Sebebi qaitarylǵan aktivterdi baqylap otyratyn 100 paiyz memlekettik kompaniiada qoǵamdyq baqylaý joq", - deidi Ermurat Bapi.
Eske salaiyq, buǵan deiin Qairat Satybaldydan qaitarylǵan dúnie-múliktiń tizimi jariialanǵan bolatyn.
Sybailas jemqorlyqqa qarsy qyzmet Qairat Satybaldyulyna qatysty “Qazaqtelekom” AQ, “Kólik servis ortalyǵy” AQ qarajatyn asa iri mólsherde jymqyrý, qylmystyq jolmen alynǵan aqshany jáne ózge de múlikti zańdastyrý, sondai-aq kedendik bajdardy tóleýden jaltarý faktileri boiynsha qylmystyq isterdi tergedi. Antikor onyń nátijelerin jariialady.
Aita keterligi, qaitarylǵan aktivterdiń jalpy somasy 732,8 mlrd teńgeni quraidy, olar:
- «Qazaqtelekom» AQ aktsiialarynyń 28,8% - 93,8 mlrd tg.
- «KSO» AQ – 30,2 mlrd tg.
- 4 kompaniiadaǵy qatysý úlesi – 10,3 mlrd tg.
- Qazaqstandaǵy múliktik aktivter – 158,5 mlrd tg.
- Ekskliýzivti zergerlik buiymdar – 105,39 mlrd tg. (230 mln.$)
- Qazaqstandyq shottardaǵy aqsha – 36,8 mlrd tg.
- Avstriiadan kelgen aqsha – 36,8 mlrd tg. (82,1 mln.$)
- Lihtenshteinnen túsken aqsha – 116,7 mlrd tg. (260,5 mln.$)
- BAÁ-nen kelgen aqsha – 6,3 mlrd tg. (14 mln.$);
- Túrkiiadan kelgen aqsha – 2,2 mlrd tg. (4,92 mln.$);
- Baǵaly qaǵazdardy satý – 135,8 mlrd tg. (300 mln dollar).
"Máselen, quny 158 mlrd teńgeden asatyn 115 qazaqstandyq obekt memlekettik menshikke berildi, onyń ishinde 73 jyljymaityn múlik obektisi (13 úi, 10 ǵimarat, 13 jer ýchaskesi, 4 páter, 3 ǵimarat, qosymsha salynǵan 2 medrese ǵimaraty, 2 turaq orny, 25 úi-jai, 1 aiaqtalmaǵan qurylys obektisi), 37 jyljymaly múlik obektisi (29 avtomashina, 5 arnaiy tehnika, 3 kvadrotsikl) jáne ózge de múlik bar. Múliktiń bir bóligi onyń jaqyn týystaryna, affiliirlengen tulǵalaryna jáne baqylaýdaǵy kompaniialarǵa rásimdelgen", - delingen Antikor habarlamasynda.
Astana jáne Almaty qalalarynda memleketke berilgen ákimshilik ǵimarattardyń jalpy aýdany 180 myń sharshy metrden asady. Buryn bul aktivter jalǵa berilip, jyl saiyn menshik iesine milliardtaǵan tabys ákelgen, múlik qazir memleketke qaitaryldy.
Liýks nysannyń biri – Aqmola oblysynyń Barap aýylynda jalpy aýdany 1,5 myń sharshy metr, jer ýchaskesi 135 gektar burynǵy Q. Satybaldyuly rezidentsiiasy – Astana qalasynyń Bilim basqarmasyna berildi.
Bul qarajattar memleketke qaitarylyp, áleýmettik maqsattarda paidalanýǵa baǵyttaldy.
