Túrkistan oblysynyń ákimi Darhan Satybaldynyń tóraǵalyǵymen ótken májiliste Túrkistan qalasynyń áleýmettik-ekonomıkalyq damý boljamy talqylandy. Qalaǵa irgeles aýmaqtarda tarıhı jáne kóne eskertkishterdiń ornalasýyna baılanysty týrızm damyp keledi. Arnaıy ekonomıkalyq jáne ındýstrıaldy aımaqtardyń bolýy da oblys ortalyǵyn erekshelendirip otyr. Óńir basshysy qala damýyna qajetti ınfraqurylymnyń tómendigin alǵa tartyp, jan-jaqty jumystardy kúsheıtýdi tapsyrdy, – dep habarlaıdy Dalanews.kz Túrkistan oblysy ákiminiń baspasóz qyzmetine silteme jasap.
– Túrkistan qalasyna erekshe mártebe berilýi de beker emes. Oblys ortalyǵynda halyq sany artyp keledi, jumys kúshi de jetkilikti. Barlyq jaǵynan damýǵa múmkindik bar. Halyqaralyq áýejaıdyń salynýy, «Batys Evropa – Batys Qytaı» avtodálizi men temirjol torabynyń boıynda ornalasýy týrıserdi kóptep tartýǵa serpin beredi. Jýyrda ótken ınvestısıalyq forýmda biraz kelisim jasaldy. Sonyń ózi shahardyń ekonomıkasyn kóterýge úles qosady. Biraq munymen shektelmeı, ınvestısıa tartýdy toqtatpaý kerek. 2030 jylǵa qaraı Túrkistan ózin-ózi qarjylandyratyn shaharǵa aınalýy tıis. Osy baǵytta jumysty kúsheıtińizder, – dedi Darhan Satybaldy.
Jıyn barysynda Túrkistan qalasynyń ákimi Ázimbek Pazylbekuly baıandama jasady. Onyń aıtýynsha, qala halqy 234 myńnan asty. Ekonomıkalyq belsendisi 83 myńnan assa, onyń jumyspen qamtylǵany 80 myńǵa jýyqtaǵan. Sonyń ishinde ózin-ózi jumyspen qamtyǵandar 30 myń adamnan asyp otyr. «Qalanyń jalpy óńirlik ónim kólemin 2030 jylǵa qaraı 2,8 ese arttyramyz», deıdi qala ákimi.
Sońǵy 4 jylda qala ekonomıkasyna 1,3 trln. teńge ınvestısıa tartylǵan. Aldaǵy 6 jylda negizgi kapıtalǵa baǵyttalǵan ınvestısıa kólemin 4,6 trln. teńgege jetkizý josparlanyp otyr.
Talqylaýda Túrkistan oblysynyń kásipkerlik jáne ónerkásip basqarmasy men Oblystyq týrızm basqarmasynyń basshylary baıandama jasap, usynystaryn jetkizdi.
Túrkistanda aldaǵy 6 jylda birqatar jobalar iske asyrylmaq. Josparly kezeńde 541 mlrd .teńgeni quraıtyn 7 myńnan asatyn jańa jumys ornymen 192 ınvestısıalyq jobanyń pýly jasaqtalǵan. Jalpy óńirlik ónim kólemi 2,8 ese ósip, 1,1 trln. teńgege, al tartylatyn ınvestısıa kólemi 3 ese ósip, 1,2 trln. teńgege ulǵaıady. Jergilikti túsim 44,2 mlrd. teńge nemese 2,2 ese ósip, 81,2 mlrd. teńgeni quraıdy dep josparlanýda. Keletin syrtqy týrıser sany 2 ese ósip, 20 myń adamǵa artady. Sonymen qatar jumyssyzdyq deńgeıin 4,7%-ǵa tómendetip, 22 myńǵa jýyq jumys oryndaryn ashý kózdelýde. Baspanamen qamtý boıynsha 2411 myń sharshy metr turǵyn úıdi paıdalanýǵa berý josparlanyp otyr. Sonymen qatar aldaǵy jyldary óńdeý ónerkásibi óniminiń kólemi arttyrý maqsatynda jalpy ónerkásip salasynda quny 142 mlrd. teńgeni quraıtyn, 3 575 jańa jumys ornyn ashýǵa múmkindik beretin, 34 joba qarastyrylýda. Arnaıy ekonomıkalyq aımaǵynyń jalpy aýmaǵy – 180 ga. Onda jalpy quny 126 mlrd. teńgeni quraıtyn jáne 3 050 jańa jumys ornyn ashýǵa múmkindik beretin 15 jobany iske asyrý kózdelýde.
Indýstrıaldy aımaqtyń aýmaǵy 190 gektardy quraıdy. Búgingi tańda ındýstrıaldy aımaqta jalpy quny 10,5 mlrd. teńge bolatyn 954 jumys ornymen 21 joba iske asyrylǵan. Sonymen qatar aldaǵy jyldary quny 15,8 mlrd. teńge bolatyn jáne 525 adamdy jańa jumys ornymen qamtý múmkindigi bar 19 jobany iske asyrý josparlanýda.
Aldaǵy jyldary qurylys jumystarynyń kólemi jyldyq ortasha ósim 17 paıyz bolady dep boljamdanýda. Jeke ınvestısıalyq jobalar esebinen qurylys jumystaryna quny 243,9 mlrd. teńgeni quraıtyn, 2552 jańa jumys ornyn ashýǵa múmkindik beretin 136 joba qarastyrylýda. Qalanyń jalpy óńirlik óniminiń negizgi bóligin kóterme jáne bólshek saýda quraıdy. Salaǵa 6 mlrd. teńgeni quraıtyn, 340 jumys ornyn ashýǵa múmkindik beretin 8 jobany uıymdastyrý kózdelgen.
Qalany damytýdyń negizgi basym baǵyty – týrızm. Salaǵa sońǵy 2 jylda 74,2 mlrd. teńge ınvestısıa tartylsa, bıyl 53,5 mlrd. teńgege jetedi dep kózdelip otyr. Aldaǵy ýaqytta 145 mlrd. teńgeni quraıtyn, 955 jumys ornyn ashýǵa múmkindik beretin 13 jobany iske asyrý josparǵa engizilgen.
