Ótken jyly arnaiy sarapshylarmen Túrkistan oblysynyń ekonomikalyq modeline taldaý júrgizilip, 2030 jylǵa deiin strategiialyq bastamalardy júzege asyrýdyń jol kartasy ázirlendi. Damý josparynda negizgi áleýmettik-ekonomikalyq ózekti máseleler anyqtalyp, ony sheshý joldary jáne damý basymdyqtary aiqyndaldy, dep habarlaidy Dalanews kz Túrkistan oblysy ákiminiń baspasóz qyzmetine silteme jasap.
Túrkistan oblysynyń ákimi Darhan Satybaldynyń tóraǵalyǵymen ótken jiynda jol kartasynyń basym baǵyttary men aldaǵy jospardyń basty maqsattary saralandy.
– Jospardyń basty maqsaty – 2030 jylǵa deiin jalpy óńirlik ónim kórsetkishin 2 ese kóbeitýge qol jetkizý. Árbir basqarma, árbir aýdan, qala ákimdikteri strategiiany oryndaý josparyn ázirlep, arnaiy jiynda qorǵaidy. Barlyq aýdan, qalanyń josparyn qarap shyǵamyz. Basty baǵyt – óndiris oryndaryn kóbeitý, óńirdiń ózindik kiristerin molaitý. Aýyl sharýashylyǵy, ónerkásipti damytý, investitsiia tartý syndy basym baǵyttar jáne ózge de salalar boiynsha naqty usynystar engizilýi tiis, – dedi Darhan Amangeldiuly.
Oblys aýmaǵynda egistik alqaptarǵa sý únemdeý tehnologiialaryn endirý baǵytynda aýqymdy jumystar atqarylýda. Biyl sý únemdeý tehnologiialaryn 22 myń gektar jerge engizý kózdelse, jyl basynan beri 12,9 myń gektarǵa engizildi. Sý únemdeý tehnologiialarynyń qol jetimdiligin arttyrý baǵyttynda 2 kásiporyn iske qosyldy. Atap aitqanda, jylyna 1000 dana jańbyrlatyp sýǵarý mashinalaryn shyǵaratyn «BNK Group LTD» zaýyty jáne «Turan sý» MKK-nyń tamshylatyp sýǵarý júiesin shyǵarý kásiporny óz jumysyn bastady. Osy kásiporyndar esebinen ishki qajettilik tolyq qamtamasyz etilmek. Naryqty otandyq ónimdermen qamtamasyz etý maqsatynda 45 jobany iske asyrý josparlansa, 6 aida 13 joba iske qosyldy.
Nátijesinde, 136 jańa jumys orny quryldy. Jol kartasynda indýstrializatsiiany damytýǵa úlken nazar aýdarylǵan. Ónerkásip óniminiń kólemi 6 aida 552 mlrd teńgege jetip, ósim 106,8%-dy qurady. Onyń ishinde, óńdeý ónerkásibiniń kólemi 253,1 mlrd teńgeni qurap, ósim qarqyny 111,2%-ǵa jetti. Salada jyl basynan beri 7 joba iske qosylyp, 290 jumys orny ashyldy.Jol kartasynda shaǵyn óndiristik oazister qurýǵa basymdyq berilgen. Oblysta 42 óndiristik ǵimarat ornalasatyn shaǵyn óndiristik park jobasy júzege asyrylýda. Qazirgi ýaqytta jobanyń I kezeńi aiaqtalyp, 14 ǵimarat iske qosyldy. Jalpy 30,7 mlrd teńgege 10 jobany iske asyrý josparlanǵan. Búginde 24,2 mlrd teńgege 7 joba iske qosyldy.
Oblysta aýmaǵy «TURAN» arnaiy ekonomikalyq aimaǵy jáne 10 indýstrialdy aimaq bar. Onda 93,5 mlrd teńgege 83 ónerkásiptik joba júzege asyrylýda. Onyń ishinde, 51 joba tolyq iske qosyldy. «TURAN» AEA 2 ónerkásiptik alańynda jáne «Túrkistan» indýstrialdy aimaǵynyń keńeitilgen alańynda infraqurylym salý jumystary júrgizilýde. Budan bólek, Qazyǵurt, Keles jáne Saýran aýdandarynda indýstrialdy aimaqtar quryldy. Oblys ekonomikasyna 6 aida 421 mlrd teńge investitsiia tartylyp, ótken jyldyń tiisti kezeńimen salystyrǵanda 37,8%-ǵa artty. Onyń ishinde, 82%-y jeke investitsiia quraidy. Ekonomikanyń ósimine serpin beretin 2,2 trln teńgege 145 investitsiialyq joba pýly qalyptasty. Jobalar tolyq iske qosylǵan jaǵdaida, 17,7 myń jańa jumys orny ashylmaq. Al, jyl basynan beri 601 jańa jumys ornymen 15 joba iske qosyldy. «Óńir ekonomikasynda alǵa jyljý bar. Degenmen, birqatar baǵyttar boiynsha jumystardy jandandyrý qajet» degen óńir basshysy jaýapty sala basshylaryna týrizmdi damytý jáne kreativti indýstriiany qalyptastyrý, aýyl sharýashylyǵy men óndiris salasyna jańa jobalar engizý boiynsha naqty tapsyrmalar júktedi.
