Ál-Farabi atyndaǵy Qazaq ulttyq ýniversitetiniń eki birdei túlegi Olimpiada júldegeri atandy.
Biologiia jáne biotehnologiia fakýltetiniń «Dene shynyqtyrý jáne sport» mamandyǵynyń túlegi Eldos Smetov altynnan alqa taqsa, zań fakýltetiniń túlegi – Ǵusman Qyrǵyzbaev qola júldege ie boldy.
Eldos Smetov Tokio tórinen jeńispen oralǵan sátte bilim ordasynyń basshysy Janseiit Túimebaev qabyldap, «Eren eńbegi úshin» medalimen marapattady. Sońynan stýdent jastarmen kezdesý uiymdastyrylyp, Qazaqstannyń eńbek sińirgen sport sheberi bes jasynan sportpen ainalysyp kele jatqanyn atap ótken bolatyn.
Sonymen qatar «Sport – úlken eńbek, sondyqtan ýaqytty durys basqaryp, baǵalaý qajet. Eger siz jattyǵýǵa nemquraidy qarasańyz, dodaǵa shyqqan kezde keri áserin tigizeri sózsiz. Sondyqtan óz jolyńyzda qandai kedergilerge kezikseńiz de, naqty maqsattar qoiyp, jetýge tyrysý mindet», – degen oilarymen bólisken edi.
Sportshy óziniń keleshektegi josparlary týralyda aityp, Parijde ótetin olimpiada oiyndaryna sol ýaqytta daiyndyqty bastap ketkenin jetkizgen.
Eldos ekinshi joǵary bilimdi de qara shańyraqta alǵan. 2018 jyly zań fakýltetinde quqyqtaný mamandyǵy boiynsha diplom qorǵaǵan.
Taqyryby: «Qazaqstan Respýblikasynyń qylmystyq sot óndirisinde sot ádildigin tek sottyń ǵana júzege asyrýy».
Ǵusman Qyrǵyzbaev zań fakýltetiniń maqtanyshy, inisi Ǵumar ekeýi birge oqyǵan. 2016 jyly Qytaida qazaq kúresinen ótken III álem chempionatynda Ǵusman men Ǵumar Qyrǵyzbaevtar 60 jáne 70 kelige deiingi salmaq dárejesinde 2 altyn medal jeńip alǵan.
Ǵusman 2021 jyly dziýdodan álem chempionatynyń kúmis júldesin iemdengen.
Ál-Farabi atyndaǵy QazUÝ-dyń zań fakýlteti Azamattyq quqyq jáne azamattyq is júrgizý, eńbek quqyǵy kafedrasynda diplom qorǵaǵan.
Ustazdary Ǵusmannyń kóp ýaqyty jattyǵý zalynda ótse de, oqýǵa zerek bolǵanyn aitady.
Ál-Farabi atyndaǵy QazUÝ-dyń Baspasóz qyzmeti
