Oqý-aǵartý ministri Juldyz Súleimenova mektep oqýlyqtary men oqý-ádistemelik keshenderdi shyǵaratyn iri otandyq baspa ókilderimen kezdesti. Jiynda oqýlyqtardy kezeń-kezeńimen jańartý jáne oqý ádebietiniń sapasyn arttyrý máseleleri talqylandy, dep habarlaidy dalanews.kz.
Ministrlik málimetinshe, kezdesý Memleket basshysy Qasym-Jomart Toqaevtyń bilim sapasyn kóterý jáne oqýshylardy zamanaýi oqý materialdarymen qamtamasyz etý jónindegi tapsyrmalary aiasynda ótken.
Kezdesý barysynda mektep oqýlyqtarynyń mazmunyn jańartý, olardyń memlekettik bilim berý standarttaryna sai bolýy, sondai-aq ministrlik, sarapshylar qaýymdastyǵy men baspalar arasyndaǵy jumysty kúsheitý máseleleri qaraldy.
Juldyz Súleimenova baspa basshylaryna oqýlyqtardy kezeń-kezeńimen jańartý boiynsha naqty mindetterdi jetkizdi. Ol jańartylǵan basylymdardy daiyndaý jáne shyǵarý merzimderin qatań saqtaý qajet ekenin atap ótti.
Ministr buǵan deiin Premer-ministrdiń orynbasary Aida Balaeva jariialaǵan taldaý nátijelerine de toqtaldy. Atalǵan taldaý barysynda qoldanystaǵy mektep oqýlyqtarynan ártúrli sipattaǵy 700-den astam eskertý men qate anyqtalǵan.
Oqýlyqtardy jańartý oqý materialdarynyń sapasyn arttyryp, olardyń qazirgi bilim berý talaptaryna jáne memlekettik standarttarǵa sáikestigin qamtamasyz etýge baǵyttalǵan.
Sondai-aq bilim berý uiymdaryn jańartylǵan oqýlyqtarmen qamtamasyz etý kestesi de aityldy. Jospar boiynsha 3 jáne 7-synyptarǵa arnalǵan jańartylǵan oqýlyqtar 2026 jylǵy 30 tamyzǵa deiin, 4 jáne 9-synyptarǵa arnalǵandary 2027 jylǵy 1 qańtarǵa deiin, al 8-synyp oqýlyqtary 2027 jylǵy 1 sáýirge deiin jetkizilýi tiis.
Kezdesý sońynda taraptar jańartylǵan oqý basylymdaryn ýaqytyly daiyndaý jáne shyǵarý boiynsha birlesken jumysty jalǵastyrýǵa daiyn ekenin jetkizdi.
