Ótken jumada Prezident Qasym-Jomart Toqaev Mańǵystaýǵa arnaiy baryp, óńirdiń áleýmettik-ekonomikalyq damýy jóninde aýqymdy keńes ótkizdi. Aýyzsý, ekologiia, týrizm, áleýmettik sala, bilim, densaýlyq, t.s.s. salalar tegis qamtylyp, syni pikirler de aityldy. Saiasattanýshy Daniiar Áshimbaev Prezidenttiń Mańǵystaý saparyna qatysty pikir bildirdi, – dep habarlaidy Dalanews.kz.
"Keshirilmes kúná bolady". Toqaev Mańǵystaýda ne aitty?
Aldymen Prezidenttiń Mańǵystaýda aitqan keibir syndaryna sholý jasap shyǵýdy jón kórdik.
"Biraz sharýa jasalǵan. Jetistikter az emes, biraq kemshilikter de bar. Ony moiyndaý kerek jáne ashyq aitý qajet" degen Memleket basshysy óńirdegi eń mańyzdy máselelerge toqtaldy:
- Sý tapshylyǵy: "Oblystaǵy basty mindettiń biri – turǵyndardy taza aýyz sýmen qamtamasyz etý";
- Prezident aimaqtaǵy sý qubyry men káriz jelisiniń tozýyn asa kúrdeli másele dep atady;
- Qurylys nysandary: "6 úidiń qurylysy bitpei tur. Orynsyz, iaǵni bei-bereket salynǵan qurylys nysandary da bar";
- "Jańaózendegi gaz óńdeý zaýyty qurylysynyń keshigýi – Úkimettiń óreskel olqylyǵy";
- Ekologiia máselesi: "Aimaqtaǵy poligondarda 200 myń tonnadan astam qoqys jinalyp qalǵan. Ruqsat etilmegen jerge zańsyz tastalǵan qoqystar da kóp";
- Bilim salasy: "Aimaqta bilim sapasyn jaqsartý úshin birqatar shara qabyldandy. Biraq jumystyń nátijesi kóńil kónshitpei tur";
- Densaýlyq saqtaý salasy: "Oblystyń densaýlyq saqtaý júiesinde kemshilikter bar. ...Balalardyń tamaqtan jappai ýlaný derekteri azaimai tur. Bul – ábden uiat nárse".
"Mańǵystaý oblysyna kelsek, biz bul aimaqty jedel damýdyń úlgisi retinde kórsetýimiz kerek. Oblystyń áleýeti zor. Sony tiimdi paidalanbasaq, bárimizge keshirilmes kúná bolady", - dep túiindedi sózin Toqaev.
Mańǵystaýǵa qarqyndy damýǵa ne jetpeidi? Sarapshy pikiri
Saiasattanýshy Daniiar Áshimbaevtyń aitýynsha, Memleket basshysynyń Shymkentten keiin Aqtaýǵa sapary beker emes. Halyq sany qarqyndy ósip jatqan bul óńirdiń máselesi shash etekten.
"Memleket basshysy ózimen birge Prezident ákimshiliginiń basshysy men onyń birinshi orynbasaryn, sondai-aq, eki vitse-premerdi ala kelgen. Shymkentte Prezident jergilikti shendiler aldynda sóilese, Mańǵystaýda óńirdiń áleýmettik-ekonomikalyq damýy jóninde keńes ótkizdi", - dedi sarapshy.
Saiasattanýshynyń pikirinshe, Mańǵystaý máselesi kóp óńir bolǵanymen, ol birden mundai bola qoimaǵan.
"Toqsanynshy jyldar basyndaǵy Jańaózen oqiǵalarynan keiin óńir uzaq ýaqyt tynyshtyqta bolǵany málim. Alaida 2006 jyldan bastap aimaqta áleýmettik shielenis qaita tutandy. Eki jyldan keiin atyshýly Jańaózen ereýili jergilikti elitalardyń tender men salyqqa talasy jáne ortalyq biliktiń "qorqaqtyǵy" kesirinen órshigen bolatyn. Sol jyldardan beri narazylyq tanytýdyń ózindik "mádenieti" qalyptasty", - deidi ol.
Alaida óńirde másele az emes, Prezident olardy sheshý úshin birneshe ret tapsyrma da bergen.
"Toqaev taǵy da baqylaýsyz kóshi-qon aǵynyna nazar aýdardy. Aita ketý kerek, týý kórsetkishi joǵary bolýymen qatar, aimaq ishki jáne syrtqy kóshi-qonnyń oń saldosymen erekshelenedi. Másele burynnan bar, biraq ony eshkim sheshe almaidy (nemese qalamaidy).
Biraq osy joly Prezident Toqaev qalyptasqan ahýaldyń tereń sebepterin synai kele, "popýlizmge jol berýge bolmaitynyn" qadap aitty. Toqaev óziniń burynǵy tapsyrmalaryn iske asyrý máselesinde belgili bir nátijeler bar ekenin, biraq júielik kemshilikter de bar ekenin málimdedi. Anyqtap qarasaq, bul sózdiń astarynda qatań syn jatyr", - dedi ol.
Toqaevtyń syn tezine alǵan basty máselesi – aýyzsý tapshylyǵy.
"Aimaqtyń osy bir sozylmaly derti týraly budan on jyl burynǵy talqylaýlardy jergilikti BAQ aýyr qabyldap edi, al búgin sol túiindi Toqaevtyń ózi moiyndap otyr. Memleket basshysy istelgen jumystardy tizip, "nashar sýmen jabdyqtaý – búkil óńirdiń basty problemasy" degen qorytyndyǵa keldi", - deidi saiasattanýshy.
Odan bólek Prezident Aqtaýdaǵy jylý máselesin, gaz óńdeý zaýytynyń qurylysyn, shaǵyn jáne orta biznestiń damýyn, týrizm men logistika salalaryn, sondai-aq, óńirdiń ekologiialyq ahýalyn naqty atap ótti. Ásirese, bilim men densaýlyq saqtaý salasyndaǵy kemshilikterdi qatań synǵa aldy.
"Taǵy bir erekshe toqtalǵan máselesi – "áleýmettik alaiaqtyq". Bul másele kóterilgenine kóp bolǵan joq, biraq jaǵymsyz statistika qalyptasqan siiaqty. Óńirdiń problemalaryna qaita oralsaq, Toqaev: "birinshi talabym – adal jumys isteý" dedi. Aimaqtaǵy isterdiń jai-kúiin synaý turǵysynan bul tuspal - óte ashyq eskertý", - dep túiindedi sarapshy.
