Halyqaralyq baıqaýshylarǵa qolǵabys kórsetý ortalyǵynda ótken baspasóz máslıhatynda TMD mısıasynyń basshysy Igor Petrıshenko uıym Qazaqstandaǵy saılaý prosesin 19-ret baqylap otyrǵanyn málimdedi. Onyń aıtýynsha, qazirgi ýaqytta 161 halyqaralyq baıqaýshy akredıtasıadan ótken. Baqylaý jumystary Qazaqstannyń 9 óńirinde jáne sheteldegi 12 memlekette júrgizilýde. Osy ýaqytqa deıin baıqaýshylar 520-dan astam saılaý ýchaskesine barǵan, dep habarlaıdy Dalanews.kz.
Mısıa basshysy ózine erekshe áser qaldyrǵan bir oqıǵaǵa da toqtaldy. Onyń aıtýynsha, saılaý ýchaskeleriniń birinde daýys berip shyqqan jas jigit súıiktisine úılený týraly usynys jasap, qyz kelisimin bergen.
"Bul jaǵdaı Qazaqstan jastarynyń elektoraldyq naýqanǵa belsendi qatysyp jatqanyn kórsetedi. Sonymen qatar biz qoǵamdyq baqylaýshylardyń qatarynda jastardyń kóp ekenin baıqadyq. Jastar eldiń bolashaǵyna beıjaı qaramaıdy, onyń damýyna alańdaıdy. Menińshe, qabyldanatyn sheshimder Qazaqstannyń turaqty ári oń damýyna yqpal etedi", – dedi Igor Petrıshenko.
